Jaceuq 44 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Kakhof Naeqlaf Laer Shar-eu Shardawq

Car-eu paw sheuqghae-eu aqyuif ghaq-anr bofnaeq-euq, Korlav-euq zaqyo deuq-euq Maqsaqkir

¹ Miqyaer-or! Arhuba, aqyawf maf-euq zir-anr nawq nae mr-euq garkawv, Aqpoeq aqpiq ja’naeq laf-euq gar, nga’maf-euq naqbawr nae yagaq-euq ma.

² Nawq-euq aqlaf nae aqcawq tsawrjeuq tsawrca deuq-anr taedzae-awr, Nga’maf-euq aqpoeq aqpiq-anr khoergar jawrduq biza-euq mae. Nawr, tsawrjeuq khoerdeuq-anr yawdoer jeq bi keuvle-awr, aqyawf maf-anr taedzae-euq mae.

³ Aqyawfmaf, yawqha-euq micaer nae mirtsaq deuvza-euq maqngeur-a. Yawqha-euq lafdu nae ghaqler-euq khawf maqngeur-a. Aerkhawf, nawr, aqyawf maf-anr ghoer mr-eu nawq-euq myavpyawq-euq yawshaef hawr-eu, Nawq-euq armar laf-euq lafdu-euq baqda’nae mae.

⁴ Miqyaer-or! Nawr-aq, ngaq-euq Sanqpaq mae; Yaqkov ghaqlerni nawr dawq bif-awq.

⁵ Nga’maf, nawq-anr ghoe-awr, nga’maf-anr muirlar-eu deuq-anr daeqaw ghae-awr, Nga’maf, nawq-euq tsawrmyanr-anr ghoe-awr, tur-awr nga’maf-anr muirlar-eu deuq-anr nawqpyaevghae ma.

⁶ Aqjeq mirnae aernar-aq, ngar, ngaq-euq kav-anr maqghoe. Ngaq-euq micaer khawf, ngaq-anr bibuq-ir nya-eu maqngeur-a.

⁷ Aerkhawf, nawr, nga’maf-anr muir-eu deuq-anr nae bibuq-ir naeqlaf-awr, Nga’maf-anr byae-eu deuq-anr bi shafdawr-ir-euq mae.

⁸ Nga’maf nan’ga-i Miqyaer-euq lafkhoer khanqsaer jaev-awr, Li-eu maqbawni, nawq-euq tsawrmyanr-anr jaceuq ma. Sela.

⁹ Aerkhawf, nawr, nga’maf-anr taedzae-awr bi shafdawr-ir naeqlaf-euq uqtaf, Nawr, nga’maf-euq guirmaf naeq-aer maqpar dov-ir naeqlaf-eu mae.

¹⁰ Nawr, nga’maf-anr muir-eu deuq-anr nae narkhan paw bi caevkhof laf-awr, Nga’maf-anr byae-eu deuq nae, yawqha-euq gharduq myawqganq yurgeuf jir-euq mae.

¹¹ Nawr, nga’maf-anr bi diqsaef dzaq-eu yawrzaq lof-aer bipyeuf-ir-awr, Aqcawq tsawrjeuq-euq ghanrcae nga’maf-anr taebyav naeqlaf-euq mae.

¹² Nawr, nawq-euq tsawrhaq-anr yarkheuni anqdzae-awr, Anq-euq khawf, maqmuiq maq sanrdzaeq lar-aq.

¹³ Nawr, nga’maf-anr aqcawq caeflaef kaduq bipyeuf-ir naeqlaf-awr, Nga’maf-euq tiqjawq jawr-eu deuq uiruir-aer jadoerduq bipyeuf-ir naeqlaf-euq mae.

¹⁴ Nawr, aqcawq tsawrjeuq nae nga’maf-anr dawqdaq bidaq-awr, Tsawrhaqzaq, nga’maf-anr naqlaf bizeuv-euq mae.

¹⁵ Ngar daqga-eu jeq, aqmyanluf ngaq-euq maeqshi javluf-awr, Ngaq-euq myavpyawq-anr shafdawr-eu jeq nae daeqkaq taq-euq mae.

¹⁶ Khoer-aq, ngaq-anr muir-eu deuq, lafpov povkhof mawf-eu deuq, Ngaeqdoer lar-eu hawr-eu, ngaeqcoeq lar-eu tersar-euq baqda’nae mae.

¹⁷ Heudeuq dawqtawvluf, nga’maf-euq khoertav keuvle taq-euq mae. Aerkhawf, nga’maf, nawq-anr maqngaer-aq. Nawq-euq dawqma sarjax-anr maqtsaq-eu jeq maqmr-aq.

¹⁸ Nga’maf-euq nuima, narkhan paw maq ciqpyawr-aq. Nga’maf-euq kuirtof khawf, nawq-euq garma-anr nae maqdov-ir-aq.

¹⁹ Aerkhawf, nawr, nga’maf-anr khaqyaer jawrduq-anr ngawqkhaef ngawqkhoev naeqlaf-awr, Nga’maf-anr shir-eu narshmr nae dzaetsanq naeqlaf-euq mae.

²⁰ Nga’maf, nga’maf-euq Miqyaer-euq tsawrmyanr-anr ngaer-awr, Nga’maf-euq aqlaf, boermiq siqkhaq-euq miqyaer-anr cawqja naeq-euq ngeur nar-aq,

²¹ Miqyaer maq hawmawr-aer jav taef-a laq? Aqjeq mirnae aernar-aq, aqyawf nuima-euq lafkhoer zaftaq-euq jeq khawf siqnya-eu mae.

²² Aerkhawf, nawq-euq gharduq, nga’maf nan’ga-i saef-eu gar ya daqluf-eu ma. Nga’maf-aq, yabi saef-eu laer ghae-eu yawr lof-aer bi sawxtaq-euq ma.

²³ Sanqpaq Miqyaer-or! Noeqlar-awq. Nawr aqjeq mirnae yufluf-eu le? Turlar-awq! Li-eu maqbawni, nga’maf-anr taq taedzae naeqlaf.

²⁴ Nawr, nawq-euq myavpyawq aqjeq ghae-eu ciqzaf taq-awr, Nga’maf-anr nyaefsuf lar-eu jeq hawr-eu nga’maf-euq shaqzanq ngaer naeqlaf-eu le?

²⁵ Aqjeq mirnae aernar-aq, nga’maf-euq nuima saflar-aq, khaqlaer-anr awbyav taq-awr, Nga’maf-euq mawrdo-aq, mirtsaq-anr myanqler taq-euq mir-a.

²⁶ Turlar-awr, nga’maf-anr cawba le-awq. Nawr ghawqshaq gaq-eu baqda’nae, nga’maf-anr kakhof naeqlaf-awq.