Jaceuq 42 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

JACEUQ-EU SANQBOF NYIQ PAV TIQPAV: Jaceuq-eu 42-72 Miqyaer-euq Dawqpae Jawrmawf-eu

Car-eu paw sheuqghae-eu aqyuif ghaq-anr bofnaeq-euq, Korlav-euq zaqdeuq-euq Maqsaqkir

¹ Khaqtsaev ircuf lawrgawv-anr nuikhanr jav-eu lof-aer, Miqyaer-or! Ngaq-euq nuima saflar khawf, nawq-anr nuikhanr jav-eu ma.

² Ngaq-euq nuima saflar-aq, Miqyaer-anr maef mir-a, Daefluf-eu Miqyaer-anr mawrmawf mir-a. Ngar, nawr jawr-eu gar aqmyan yalar-awr, nawq-euq maeqshi ya larmawr-eu la?

³ Aqcawq, ngaq-anr maq tsaevlerni aer-eu, “Aqlaeq, nawq-euq Miqyaer aqgeugar jawr-eu la?” Khoermirnae, uqcif nan’ghanr maqaer, Ngaq-euq myavbir-aq, ngaq-euq dzaqdzaq dawrdawr pyeuflar taq-euq mae.

⁴ Ngar, tsawrhaq armaf mafma naeq-aer le-awr, Ngar, aqyawfmaf naeq-aer Miqyaer-euq nymr-anr le-euq ma. Laqkhaq caer-eu tersar hawr-eu jaceuq-eu lafkhoer, Tsawrhaq armaf mafma naeq-aer guiqlanq-euq yawbui bui-eu mae. Ngar heudeuq-anr noeqmawrlar ngae, Ngaq-euq nuima saflar shaevdov lef-euq ma.

⁵ Ngaq-euq nuima saflar-or, Aqjeq ghae-eu mrnyoeq saef-eu le? Aqjeq mirnae, nawr, ngaq-euq lafkhoer maqsar marsar-aer ghaesaef-eu le? Miqyaer-anr noeqtmq-awq. Aqjeq mirnae aernar-aq, Miqyaer, ngaq naeq-aer jawr-awr cawba naeqlaf-eu mirnae, Ngar, aqyawf-anr jaceuq le siq.

⁶ Ngaq-euq Miqyaer-or, Ngaq-euq nuima saflar, ngaq-euq lafkhoer nyoeqkheurni javluf-eu mae. Teumirnae, ngar, Yawrdaq mirtsaq-anr jawr-awr nae Heqlaqmoq gawqjawq yawgor hawr-eu, Mizar-euq gawqdur-anr jawr-awr nae nawq-anr noeqkeuv ma.

⁷ Nawq-euq ircuf tsawqga ga-eu tersar nae, yawnaf-aq, yawnaf-anr kurluf-eu mae. Nawq-euq irluv hawr-eu irkhawr dawqtawvluf, ngaq-anr danqpymq taq-euq mae.

⁸ Nan’ghanr paw, Ya’we Miqyaer, aqyawf-euq ghoer-awr gaq-eu jeq khaerlef taef-a, Uqcif paw-aq, aqyawf-euq cardawq, ngaq naeq-aer jav-awr, Ngaq-euq daefzir-euq Miqyaer-anr guiqlanq shar-eu jeq pyeuf taef-a.

⁹ Ngaq-euq logur pyeuf-eu, ngaq-euq Miqyaer-anr ngar heulof-aer aernaeq ma, “Nawr, aqjeq ghae-eu ngaq-anr ngaer naeqlaf-eu le? Ngar, aqjeq ghae-eu muir-eu deuq nyaefsuf lar-eu baqda’nae tsawrngoer ya’ngoer-eu la?”

¹⁰ Aqyawfmaf, yawqnan navluf ngaq-anr narhaq lar-eu, “Aqlaeq, nawq-euq Miqyaer aqgeugar jawr-eu la?” Ngaq-anr muir-eu deuq, ngaq-anr heulof-aer caeflaef kalar-eu khoer-aq, Ngaq-euq shaqyoeq bi ngawqkhaef-euq gar dur-eu mir-a.

¹¹ Ngaq-euq nuima saflar-or! Aqjeq ghae-eu mrnyoeq saef-eu le? Aqjeq mirnae nawr, ngaq-euq lafkhoer maqsar marsar-aer ghaesaef-eu le? Miqyaer-anr noeqtmq-awq. Aqjeq mirnae aernar-aq, ngaq-euq Miqyaer, Ngaq naeq-aer jawr-awr cawba naeqlaf-eu mirnae ngar, aqyawf-anr jaceuq le siq.