Jaceuq 41 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Nargawr Bi Taqler Naeqlaf-awq

Car-eu paw sheuqghae-eu aqyuif ghaq-anr bofnaeq-euq, Daqbir-euq cardawq

¹ Irshaqzaq-anr sharnoeq naeq-eu tsawrhaq-aq, guiqlanq huiq-eu mae. Gardzaq garkawv keuvle-eu aryamq-anr, Ya’we Miqyaer, aqyawf-anr bibuq-ir taef-a.

² Ya’we Miqyaer, aqyawf-anr bidaef-awr hawpir naeq-eu uqtaf, Mirtsaq-euq khoertav, aqyawf guiqlanq za taef-a. Nawr, aqyawf-anr muir-eu deuq mrmawf-eu lof-aer bimrni maq a’naeq-ar.

³ Aqyawf nar-awr yufzar-euq khoertav galuf-eu gar, Ya’we Miqyaer, aqyawf-anr ghaq bif taef-a. Nawr, aqyawf-euq nargawr-euq yufzar-anr yufluf-eu gar bi taqler taef-a.

⁴ Ngar heulof-aer aer-euq ma, “Ya’we Miqyaer-or, Ngar, nawq-anr iqbax mr-euq mir-a, Ngaq-anr ghawqshaq gaqnaeq laf-awr, Ngaq-euq nuima saflar lavsavtaq naeqlaf-awq.”

⁵ Ngaq-anr muir-eu deuq, ngaq-anr yawdoer aer-eu mae; “Aqyawf-euq tsawrmyanr byov-ir ni, aqmyan shir-eu laer ghae-eu la?”

⁶ Aqyawf, ngar jawr-eu gar larmawr nar-aq, jaqmyawf-euq dawq ngaeq-awr; Aqyawf, aqyawf-euq nuima-anr yawlaeq yawca juiruiq taq-awr; Aqyawf dov-ir ngae, jaja-aer can-ir-eu mae.

⁷ Ngaq-anr kharbyae-eu deuq, ngaq-anr muir-eu laer khoeqsav-awr, Aqyawfmaf, ngaq-anr lavtanq lavnar-eu laer tovluf-eu mae.

⁸ Aqyawfmaf aer-eu, “Zawr doer-eu nargawr, aqyawf-anr nyawqler taq-awr, Aqyawf gayufghae ngae, tiqjawr-iq maqpar turlar nya-eu mae.”

⁹ Ngaq-euq kaqmur bidzaq-awr ngaq nae ghoe-euq ngaq-euq ghoercawq khawf, Aqyawf-euq kuirnuif bafdir-awr, ngaq-anr muirlar-eu mae.

¹⁰ Aerkhawf, Ya’we Miqyaer-or! Nawr, ngaq-anr ghawqshaq gaq-awr, Ngar, aqyawf maf-anr janrkhof nya’ni, ngaq-anr bi turlar naeqlaf-awq.

¹¹ Ngaq-anr muir-eu deuq, ngaq-anr maq ghaqlar-eu mirnae, Nawr, ngaq-anr nuikhanr shir-eu nga laer ngar siqduq-euq ma.

¹² Ngaq-anr-aq, nawr, ngaq-euq yawmuiq yawjaq-euq lafkhoer ngaeqghae naeqlaf-awr; Ngaq-anr nawq-euq myavpyawq-euq maeqshi mqmaq maqbyav yarzir bijawr naeqlaf-euq mae.

¹³ Mqmaq maqbyav yarzir-anr nae, mqmaq maqbyav yarzir-anr keuvni, Irsaqleqlav-euq Miqyaer pyeuf-eu Ya’we Miqyaer-anr jaceuq-awq! Aqmeq hawr-eu Aqmeq.