Jaceuq 40 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Ngaq-anr Hawpir Naeqlaf-awq

Car-eu paw sheuqghae-eu aqyuif ghaq-anr bofnaeq-euq, Daqbir-euq cardawq

¹ Ngar or-awr Ya’we Miqyaer-anr dawq-euq ma. Aqyawf, ngar jawr-eu paw ciqpyawr lef-awr, Ngar gur-eu gar narhaq naeqlaf-euq mae.

² Aqyawf, ngaq-anr lan’yaq lansix hawr-eu zawr doer-eu duqkhanq-anr nae gheudov naeqlaf-awr, Ngaq-euq aqkuir khaqlo-euq khoertav ciqdav naeqlaf-euq uqtaf, Ngaq-euq kuirtof lavzif naeqlaf-euq mae.

³ Aqyawf, ngaq-euq khaqmae-euq lafkhoer, Aqdui-euq Miqyaer-anr jaceuq-eu cardawq yawshuif dawvanr naeqlaf-euq mae. Tsawrhaq ghawqmya’ni ya’mawr-awr Ya’we Miqyaer-anr guv-eu lafkhoer, aqyawf-anr ghoelar taef-a.

⁴ Ya’we Miqyaer-anr aqyawf-euq ghoeduq bipyeuf-euq tsawrhaq-aq, guiqlanq huiq-eu mae. Aerkhawf, nuima huiq-awr, jaqmyawf myawf-eu tsawrhaq-aq, guiqlanq maqza-a.

⁵ Ngaq-euq Miqyaer pyeuf-eu Ya’we Miqyaer-or, Nawq nae mr-euq zanqler paq-aer muiq-eu jeq, Ghawqmya’ni myaq-eu mae. Nga’maf-euq gharduq, nawq-euq nuinoeq teu-aq, Tiqjeq sair tiqjeq gui ngae maq guijir coer-a. Ngar dzawr-awr ngaeq-eu lawnmr khawf, Ardzaeq-aer myaq-eu mirnae maq sawxdovjir coer-a.

⁶ Nawr, lawr-eu jeq hawr-eu damq-eu jeq-anr geufmawf-eu maqngeur-a, Ngaq-euq naqbawr, nawq nae pannaeq laf-euq mae. Nawr, miqdzaq dzanpuiv-awr lawr-eu jeq hawr-eu iqbax-euq gharduq lawr-eu jeq maqshar-a.

⁷ Khoermirnae, ngar heulof-aer aer-eu ma, “Haeq, ngar larkeuv-euq ma. Sanqbof paryov-euq lafkhoer, ngaq-euq garkawv boftaq-euq mae.

⁸ Ngaq-euq Miqyaer-or! Ngar, nawq-euq nuima tsaq-eu jeq mr-eu laqkhaq caer-awr, Nawq-euq zanrdawq, ngaq-euq nuima-euq lafkhoer anrluf ma.”

⁹ Ya’we Miqyaer-or! Nawr siqnya-eu lof-aer, Haeq, ngar, ngaq-euq maeqluq-anr maq lavnaqni, Tsawrhaq ghawqmya’ni uiqler taq-awr jawr-eu gar, Ngar, tsaq-awr dawr-eu garkawv dawqmaeq maeqnaeq-euq ma.

¹⁰ Ngar, nawq-euq tsaq-awr dawr-eu jeq, Ngaq-euq nuima-euq lafkhoer maq yurzaf taq-aer, Ngar, nawq-euq sarjax zif-eu jeq hawr-eu nawq-euq kakhof-eu jeq-euq garkawv dawqdzawr mr-euq ma. Ngar, tsawrhaq baqmaf mafma-anr nae nawq-euq ghoer-awr gaq-eu jeq hawr-eu nawq-euq yawtsaq yawdawr jeq maqzaf-aq.

¹¹ Ya’we Miqyaer-or! Nawr nanqyuni ghawqshaq gaq-eu jeq, Ngaq-anr maqbi keuvle-aer taqghae naeqlaf. Nawr, ngaq-anr nawq-euq ghoer-awr gaq-eu jeq hawr-eu nawq-euq yawtsaq yawdawr nae, Ngaq-anr aqmyanluf hawpir naeqlaf-awq.

¹² Aqjeq mirnae aernar-aq, maq guijircoer paq-aer myaq-eu yawdoer jeq, ngaq-anr gajawq taq-euq mae. Ngaq-euq uqduq tsaerkanr myavmaqtser myaq-eu ngaq-euq yawlaeq yawca, Ngaq-anr taemilar taq-euq mirnae, ngar tiqjeq-anr-iq maqpar hawmawrnya mir-a. Khoermirnae, ngaq-euq nuima nuighaq baq-ir jir taq-euq mir-a.

¹³ Ya’we Miqyaer-or! Ngaq-anr nuima tsaq-awr bibuq-ir naeqlaf-awq. Ya’we Miqyaer-or! Ngaq-anr yawkawr-aer cawba naeqlaf-awq.

¹⁴ Ngaq-euq daefzir lavcawv-eu laer pov-eu deuq, Yawbanq yawlanr-aer pyeuf-ir-awr shafdawr-ir luf-ur. Ngaq-anr yawdoer jeq bi keuvle mawf-eu deuq, Narkhan paw bi taekhof ghae-awr daqga-ir luf-ur.

¹⁵ Ngaq-anr “Haeq lawr, haeq lawr” laer aer-eu deuq, Aqyawf maf-euq daqga-eu jeq-euq baqda’nae yawbanq yawlanr-aer pyeuf-ir luf-ur.

¹⁶ Aerkhawf, nawq-anr pov-eu tsawrhaq dawqtawvluf, Nawq-euq lafkhoer laqkhaq caer-awr lurgha caergha luf-ur. Nawq-euq kakhof-eu jeq-anr gaq-eu deuq, Aqmyanluf heulof-aer aer luf-ur, “Ya’we Miqyaer-anr ciqhuiq ciqmanr ma.”

¹⁷ Ngar irshaq shaq-awr shaqzaq zanqzaq pyeuf-eu khawf, Sanqpaq Miqyaer, ngaq-euq garkawv sharnoeq naeqlaf-eu mae. Ngaq-euq Miqyaer-or, taq nyinaq naeqlaf. Nawr-aq, ngaq-anr cawba-awr bibuq-ir-eu ghaq mae.