Jaceuq 4 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Uqcif Paw-euq Guiqlanq Shardawq

Car-eu paw sheuqghae-eu aqyuif ghaq-anr bofnaeq-euq, arcav tsof-eu keuka zmq-eu, Daqbir-euq cardawq

¹ Ngaq-euq tsaq-awr dawr-eu Miqyaer-or! Ngar kur-eu gar narhaq naeqlaf-awq! Ngar guv-awr gav-eu jeq-anr ya’mawr ngae, nawr, ngaq-anr ngaeqghaedzeur naeqlaf-euq mae. Ngaq-anr ghawqshaq gaq-awr, ngaq-euq guiqlanq shardawq-anr narhaq naeqlaf-awq.

² Tsawrhaq-euq zaqdeuq-or! Nawmaf aqmyan keuvni, ngaq-euq khanqsaer yur-awr, daqga-eu jeq lavpyeuf-eu laer ghae-eu le? Nawmaf, aqmyan keuvni gardanr maqtsoeq-eu jeq-anr gaq-awr, jaqmyawf-anr pov-eu laer le? Sela.

³ Aerkhawf, nawmaf heu-anr siqnya-awq. Ya’we Miqyaer, aqyawf-euq gharduq aqyawf-anr yawzeu baw-eu tsawrhaq tserdov taq-euq mae. Ngar, Ya’we Miqyaer-anr kur ngae, aqyawf, ngaq-anr narhaq naeqlaf-eu mae.

⁴ Nuima paerdzuqdzuq khawf, iqbax taqmr. Ciqcur savni jawr-awr, nawq-euq yufzar-anr jawr ngae, Garkawv heu nawq-euq nuima-euq lafkhoer dzardziv dziv-awq. Sela.

⁵ Tsaq-awr dawr-eu lawr-eu jeq lawrnaeq-awr, Nawmaf, Ya’we Miqyaer-anr taef-aer ghoe-awq.

⁶ Tsawrhaq ghawqmya’ni aer-eu, “Aqsur ghaq, aqdui-anr yawmuiq tiqjeqnav bimawr naeqlaf-eu?” Ya’we Miqyaer-or! Yawshaef bya-eu nawq-euq myavpyawq, nga’maf jawr-eu paw ciqpyawr lef-awq.

⁷ Nawq nae ngaq-euq nuima-euq lafkhoer, laqkhaq caer-eu jeq bifnaeq laf-euq khoer-aq, Dzaqla ghovcaer hawr-eu aqgaf dzaruir yawshuif za’myaq dzaeq-eu yamq-anr navmaqtser laqkhaq caer-eu jeq bifnaeq laf-euq mae.

⁸ Ngar nuima sarlaevni joeyuf ghae-awr yufkhav ma. Aqjeq mirnae aernar-aq, Ya’we Miqyaer-or! Nawr taef-aer, ngaq-anr guvkhar maqza’ni bidaef naeqlaf nya-eu mae.