Jaceuq 39 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Iqbax Pyaeq-awr Zaqsiq Tsawrganr Bifnaeqlaf

Car-eu paw sheuqghae-eu aqyuif ghaq-anr bofnaeq-euq, Yeqduqtur kawqsheu, Daqbir-euq cardawq

¹ Ngar heulof-aer aer-eu ma; “Ngar, ngaq-euq maeqlar nae iqbax maqya mrni, Ngaq-euq garma yanryanr-aer daef ma. Tsawrcawv deuq, ngaq-euq maeqshi jawrluf ngae, Ngar, ngaq-euq khaqmae maeqkawf kawf-awr dzanqtaeq ma.”

² Ngar yawmuiq jeq khawf maqngaeqni, Aqdzawq lof-aer ciqcurni jawr ngae, Ngaq-euq ghawqshaq-aer ghae-eu jeq tanqdav laf-eu mir-a.

³ Ngaq-euq lafkhoer ngaq-euq nuima yawkhav-aer lanrluf-awr, Ngar sharnoeq sharsawx ngae, miqdzaq puivlar-eu mae. Khoermirnae, ngaq-euq maeqlar nae ngar ngaeq-euq ma.

⁴ “Ya’we Miqyaer-or! Ngar, ngaq-euq zir arnavni nymr-eu nga laer yasiqni, Ngar arsaq aqjox-aer saq-ir-eu la laer hawr-eu ngaq-euq arnan armyavni jav-eu la laer bisiq naeqlaf-awq.

⁵ Nawq nae ngaq-anr bidaef naeqlaf-eu arnan aryamq-aq, lafzaq tiq daq byan’ni taef mae. Nawq-euq maeqshi ngaq-euq arkhof arla-aq, tiqpawf-iq aernyaf maqnyeuv-a. Tsawrhaqzaq yawqghaq navluf daefmuiq duidui-eu aryamq-aq, ircuf-euq safkhoeq lof-aer dur-eu taef mae. Sela.

⁶ Aqdir aernar-aq, tsawrhaq yawqghaq navluf doedoe-aer canluf-eu heu-aq, narshmr-anr dur-awr, Aqyawfmaf tiqjeq-iq gardanr maqtsoeq-eu gar banqghasaef luf-eu mae. Aqyawf, pyurshuir myawqganq povcu taq-euq khawf, aqsur ghaq-anr of-ir-eu laer maq siqnya-a.

⁷ “Sanqpaq Miqyaer-or! Nymq-mr ngar aqjeq-anr pardawq-eu? Ngar, nawq-euq lafkhoer noeqtmq ma.

⁸ Ngaq-euq yawbanq yawlaeq dawqtawv luf-anr nae bibuq-ir naeqlaf-awq; Ngaq-anr, aqdzawq argan deuq aerdoerduq taqbi pyeufnaeqlaf.

⁹ Ngar, ngaq-euq khaqmae maq ghawrpavni, aqdzawq pyeuf-ir-euq ma; Nawr, ngaq-anr khoerlof-aer janrnaeq laf-euq mae.

¹⁰ Nawq-euq nargawr gawrma, ngaq-anr nae yurdzae naeqlaf-awq. Nawq-euq aqlaf diq-eu mirnae, ngar shir shaw-iq mir-a.

¹¹ Nawr, tsawrhaq tiq ghaq-anr yawlaeq yawca-euq baqda’nae dzawpar naeq-eu laer maeqparnaeq ngae, Nawr, aqyawf-euq hawmuiq-eu jeq-anr boeqcoer bidzaq-euq gar dur-eu mae. Aqdir aer ngae, tsawrhaq yawqghaq navluf, ircuf-euq safkhoeq lof-aer taef mae. Sela.

¹² “Ya’we Miqyaer-or! Ngaq-euq guiqlanq shardawq-anr narhaq naeqlaf-awr, Ngar gur-eu gar, nawq-euq naqbawr ciqkhmr naeqlaf-awq. Ngar myavbir dovluf-eu gar haw-awr ciqcurni taq jawrbyov naeqlaf. Ngar khawf, ngaq-euq aqpoeq aqbawr deuq lof-aer, Nawq naeq-aer mirkhanq-anr can-eu daqyan tiq ghaq pyeuf-awr jawrluf-eu ma.

¹³ Ngaq-anr tiqjawr-iq maqpar ya’mawrni, ngar irbyov-eu laer ghae-eu maeqhu, Ngar ghaq tiq pov par zakhofni, nawr, ngaq-anr taq hawtsovtaq naeqlaf.”