Jaceuq 38 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Miqyaer-or! Cawba Naeqlaf-awq

Noeqmawr-awr noeqkeuv-eu Daqbir-euq cardawq

¹ Ya’we Miqyaer-or! Nawr nuima paer-eu lafkhoer, ngaq-anr taq maeqpar naeqlaf; Nawr nuimapaer duidui ngae, ngaq-anr taqdaeq naeqlaf.

² Aqjeq mirnae aernar-aq, nawq-euq kavmyaq ngaq-anr beuvtsov taq-awr, Nawq-euq aqlaf, ngaq-anr daeqaw taq-euq mir-a.

³ Nawr nuima paer-eu mirnae, ngaq-euq shiqshaq yawtsaq yawtsanr jeq maqanr nya; Ngaq nae mr-euq iqbax-euq baqda’nae, ngaq-euq shaqyoeq ghaq maqanr nya.

⁴ Ngaq-euq yawlaeq yawca, ngaq-euq uqduq-anr cantsaev luf-awr, Kan-eu khavbaev lof-aer dur-awr, ngaq-euq gharduq ardzaeq-aer kanluf nya.

⁵ Ngaq-euq yawdzawq yawgan-euq baqda’nae, Ngaq-euq marnar marbyanr byanrler taq-awr baeflaf-eu mae.

⁶ Ngar yawkhav-aer bi gheu’aw-awr shaqzanq naf-eu lafkhoer, Nan’ga-i tsawrngoer ngoerluf-eu ma.

⁷ Aqjeq mirnae aernar-aq, ngaq-euq dawqdzmr-anr yawpir yawlanr lanrluf-awr, Ngaq-euq shiqshaq tiqpawf-iq maqtsaq maqtsanr nya.

⁸ Ngar ghaq maqanr-aer, shaqyoeq shaqlaf khaef-ir khoev-ir-euq mir-a. Ngaq-euq nuima yawbanq yawlanr-aer ghae-eu mirnae, ngar manrluf-eu ma.

⁹ Sanqpaq Miqyaer-or! Ngar geufmawf-eu jeq, nawq-euq maeqshi javluf-eu mae. Ngar yawkhav-aer manrluf-eu heu-aq, Nawq-anr nae zaftaq-euq jeq maqngeur-a.

¹⁰ Ngaq-euq nuima caertanq tanq-awr, Ngaq-euq ghaq juq-ir taq-euq mir-a. Ngaq-euq myavnuiv-euq yawshaef khawf, Ngaq-euq myav-anr nae byov-ir-euq mir-a.

¹¹ Ngaq-euq nargawr gawrma-euq baqda’nae, Ngar gaq-eu deuq hawr-eu ngaq-euq cawqdeuq, ngaq-anr maq larpaeni yawf-awr, Ngaq-euq aqyuif aqnyir deuq khawf, garmanr kaq-eu gar yawfluf-eu mae.

¹² Ngaq-euq daefzir yur-eu laer pov-eu tsawrhaq deuq, ngaq-euq maeqshi lanrju khmrtaq-awr, Ngaq-anr lavnar-eu laer pov-eu deuq, nan’ga-i jaqmyawf maershuir-euq bawqtov tov-awr lavcawv-eu gharduq ngaeq-eu mae.

¹³ Aerkhawf, ngar-aq, naqbawq lof-aer maq gaqnya-aer, Ngar-aq, aqdzawq lof-aer khaqmae dawq maq ngaeqdovnya nya.

¹⁴ Khoermirnae, ngar-aq, maq gaqnya-eu tiq ghaq-anr dur-awr, Khaqmae nae dawqpov maq povnya-eu gar dur-eu ma.

¹⁵ Aerkhawf, Ya’we Miqyaer-or! Ngar, nawq-euq lafkhoer noeqtmq ma. Ngaq-euq Miqyaer pyeuf-eu Sanqpaq Miqyaer-or, Nawr ngaeqkhof naeqlaf mae.

¹⁶ Aqjeq mirnae aernar-aq, ngar heulof-aer aermawf mir-a; “Ngaq-anr narhaq naeqlaf-awq! Maqngeur nar-aq, ngaq-euq aqkuir sanqtiftif ngae, Aqyawfmaf, yawqhar yawqha, ngaq-euq khoertav ciqgor-awr, ngaq-anr uiruir-aer caergha-eu baw-mr.”

¹⁷ Aqjeq mirnae aernar-aq, ngar coq-ir luf-eu mir-a, Ngar ghawqshaq-aer ghae-eu jeq aqmyanluf, Ngaq-euq maeqshi javluf-eu mae.

¹⁸ Ngar, ngaq-euq yawlaeq yawca dzawrdov ma. Ngar, ngaq-euq iqbax-euq baqda’nae nuima narluf-eu ma.

¹⁹ Aerkhawf, ngaq-anr muir-eu deuq-aq, ghaq khav-awr ghae duidui-eu mae. Tiqjeq-iq maqngeur-eu gar, ngaq-anr byae-eu deuq khawf, myaqlar taq-euq mae.

²⁰ Ngar yawmuiq jeq-anr cantae-eu mirnae, Yawmuiq-anr yawdoer janrkhof naeqlaf-eu tsawrhaq deuq khawf, Ngaq-anr muir-eu deuq pyeuf-eu mae.

²¹ Ya’we Miqyaer-or! Ngaq-anr taq byaernaeqlaf. Ngaq-euq Miqyaer-or! Ngaq-anr nae ghawqmanr-aer taq jawrkaq naeqlaf!

²² Ya’we Miqyaer-or! Ngaq-anr kakhof naeqlaf-awq, Ngaq-anr yawkawr-aer cawba naeqle-awq!