Jaceuq 37 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Tsawrmuiq Tsawrdoer-euq Jeqbir

Daqbir-euq cardawq

¹ Yawdoer jeq mr-eu deuq-euq baqda’nae nuima taqlanr, Yawlaeq yawca jeq mr-eu deuq-anr myavnav taqnav.

² Aqjeq mirnae aernar-aq, ghawqmyanr maqghae-aer, Aqyawfmaf yarmof lof-aer bi myaqdzae-awr, Javgav lof-aer nyoeq-ir jir taef-a.

³ Ya’we Miqyaer-anr ghoe-awr, yawmuiq jeq mr-awq. Mirtsaq-euq khoertav jawr ngae, sarjax zif-eu ghaq naeq-aer cawq-awq.

⁴ Ya’we Miqyaer-euq lafkhoer laqkhaq caer-awq; Aqyawf, nawq-euq nuima geufmawf-eu jeq bifnaeqlaf taef-a.

⁵ Nawq-euq garma Ya’we Miqyaer-anr a’naeq-awr, Aqyawf-anr ghoe-awq; Khoerlof-aer nar-aq, aqyawf, nawq-anr ngaeqghae naeqlaf taef-a.

⁶ Aqyawf, nawq-euq tsaq-awr dawr-eu jeq-euq yawshaef bi byalar-awr; Nawq-euq dawr-awr tsaq-eu jeq nan’ghanr lof-aer bi pyeuflar taef-a.

⁷ Ya’we Miqyaer-euq lafkhoer ghaqnaq naq-awr, Or-awr nae aqyawf-anr dawq-awq; Yawdoer mr-eu bawqtov mrpyeuf-awr garma khardov-ir-eu paw muiqlar sanrlar-eu deuq-euq baqda’nae nuima taqlanr.

⁸ Nuima paer-eu naq-awr, nuima nuipaer byaerdzae-awq. Nuima taqlanr. Heu-aq, deuqlar narlar-eu jeq bi dovlar-eu taef mae.

⁹ Aqjeq mirnae aernar-aq, tsawrdoer-aq, yabi deuvtsaev dzae-eu khawf, Ya’we Miqyaer-anr dawq-eu deuq-aq, jeqbir of-awr mirkhanq za taef-a.

¹⁰ Aqjeq mirnae aernar-aq, ghawqmyanr maqghae-aer tsawrcawv yabyov-ir jir taef-a. Nawr, aqyawf-euq jawrduq sharnoeq-awr nae pov khawf, maq povmawr nya-ar.

¹¹ Aerkhawf, nuinanq nuiyu anr-eu deuq-aq, jeqbir of-awr mirkhanq za taef-a. Khoernar-aq, aqyawfmaf nuisar of-eu jeq byan-eu mirnae laqkhaq yacaer taef-a.

¹² Tsawrcawv-aq, dawrcoeni ghae-eu tsawrhaq-anr muir-eu jeq tov-awr, Aqyawf-euq seuq teufhaw naeq-eu mae.

¹³ Sanqpaq Miqyaer, aqyawf-euq arnan keuvle luf-eu gar mawrnya-eu mirnae, aqyawf-anr uir-eu mae.

¹⁴ Irshaqzaq hawr-eu shaqzaq zanqzaq-anr lavcoq-awr, Dawrcoeni daef-eu deuq-anr deuvsaef-eu gharduq; Tsawrcawv, micaer ghawrdov-awr, kav ngofdav taq-euq mae.

¹⁵ Aqyawf maf-euq micaer-aq, yawqha-euq nuima-anr tsawvbyoe-awr, Aqyawf maf-euq kavmyaq khawf, yabi ngawqkhaefjir taef-a.

¹⁶ Tsaq-awr dawr-eu tsawrhaq uicuiv taef-aer jav-eu khoer-aq, Tsawrcawv deuq pyurshuir ghawqmya’ni jav-eu navmaqtser muiqdzaeq-eu mae.

¹⁷ Aqjeq mirnae aernar-aq, tsawrcawv-euq lafdu yakhaef-ir taef-a. Aerkhawf, Ya’we Miqyaer, tsaq-awr dawr-eu tsawrhaq-anr gheuturnaeq taef-a.

¹⁸ Ya’we Miqyaer, dawrcoeni ghae-eu tsawrhaq-euq arnan siqnya-awr, Aqyawf maf-euq jeqbir-aq, mqmaq maqbyav yarzir zif taef-a.

¹⁹ Aqyawfmaf, yawdoer aryamq keuvle khawf, maqya shafdawr-aer; Maef-awr shuf-eu arnan keuvle khawf, tiqdaev dzaq-eu jeq jav taef-a.

²⁰ Aerkhawf, tsawrcawv-aq, yacawv-ir taef-a; Ya’we Miqyaer-anr muir-eu deuq-aq, Poqmuiq haw-euq aryaev lof-aer yabyov-ir-awr, Aqyawfmaf uqkhoeq lof-aer yabyov-ir jir taef-a.

²¹ Tsawrcawv-aq, sharngaq sharpar-euq jeq, bifkhof tsoeqkhof-eu maqbaw-a. Aerkhawf, tsaq-awr dawr-eu tsawrhaq-aq, bif-awr ghawqshaq gaq-eu bi mawrlar-eu mae.

²² Miqyaer nae guiqlanq bif-euq deuq-aq, jeqbir of-awr mirkhanq za taef-a. Aerkhawf, Miqyaer nae yaqkhaer yaq-euq deuq-aq, yabi deuvtsaevdzae taef-a.

²³ Tsawrhaq yawmuiq-euq kuirtof-aq, Ya’we Miqyaer nae ciqtsaq taq-euq mae. Aqyawf-euq garma-anr Miqyaer nuikhanr shir-eu mae.

²⁴ Aqyawf coq-ir-eu law-awr khawf, aqdir coqdzae ghae-eu gar maqya keuv-ar, Aqjeq mirnae aernar-aq, Ya’we Miqyaer-euq aqlaf, aqyawf-anr gheutur taef-a.

²⁵ Ngar zaqguq guqhaw-awr, nymq-mr mawqle-euq mir-a; Aerkhawf, Ya’we Miqyaer nae tsaq-awr dawr-eu tsawrhaq-anr byaerdzae naeq-euq gar maq mawrhaw-aq; Aqyawf-euq aryoeq deuq hawqshar shar-eu khawf maq mawrhaw-aq.

²⁶ Aqyawf aqmyanluf ghawqshaq gaq-awr bingaq bipar-eu mae; Aqyawf-euq aryoeq deuq-aq, guiqlanq huiq-eu mae.

²⁷ Yawdoer jeq byaer-awr, yawmuiq jeq mr-awq; Mqmaq maqbyav yarzir yajawr taef-a.

²⁸ Ya’we Miqyaer dawr-awr tsaq-eu jeq-anr gaq-eu mirnae, Aqyawf-euq tsawrshawr deuq-anr maq byaerdzae-a; Aqyawf, aqyawf maf-anr mqmaq maqbyav yarzir hawpirnaeq taef-a. Aerkhawf, tsawrcawv-euq aryoeq deuq-aq, yabi deuvtsaevdzae taef-a.

²⁹ Tsaq-awr dawr-eu tsawrhaq-anr, jeqbir lof-aer mirkhanq of-awr; Heu-euq lafkhoer mqmaq maqbyav yarzir yajawr taef-a.

³⁰ Tsaq-awr dawr-eu tsawrhaq-euq khaqmae-aq, Zaqsiq tsawrganr anr-eu jeq ngaeq-awr, Aqyawf-euq maeqlar-aq, dawr-awr tsaq-eu jeq ja-eu mae.

³¹ Aqyawf-euq Miqyaer-euq zanrdawq, aqyawf-euq nuima-euq lafkhoer anr-eu mirnae, Aqyawf kuirtof ciq ngae maqjur-ir-ar.

³² Tsawrcawv-aq, tsaq-awr dawr-eu tsawrhaq-anr mawqtsov taq-awr, Aqyawf-anr saef-eu laer povluf-eu mae.

³³ Aerkhawf, Ya’we Miqyaer, tsaq-awr dawr-eu tsawrhaq-anr, Tsawrcawv-euq aqlaf-euq lafkhoer maq byaerdzae yaf-ar; Aqyawf-anr yarkhaq dar-eu khawf, yawlaeq nga laer maqya bidar-ar.

³⁴ Ya’we Miqyaer-anr dawq-awr, aqyawf-euq garma-anr can-awq. Aqyawf, nawq-anr ciqgor-awr, jeqbir lof-aer mirkhanq bi’of taef-a; Tsawrcawv bi deuvtsaevdzae ngae, nawr ya’mawr taef-a.

³⁵ Arbawr bawrma yawqha-euq daefduq-anr daef-awr huiq-ir maer-ir-eu lof-aer; Tsawrcawv guvlar paq-aer ghae-eu baoq za-euq gar, ngar ya’mawr-euq ma.

³⁶ Aerkhawf, aqyawf ledzeur-awr, Haeq! Aqyawf jawr-eu maqpar ya’mawr-a. Ngar, aqyawf-anr povler-euq khawf, aqyawf-anr maq povmawr nya-aq.

³⁷ Aerkhar maqza-eu tsawrhaq-anr hawtsov taq-awr, Dawrcoeni ghae-eu tsawrhaq-anr hawtaq-awq; Aqjeq mirnae aernar-aq, tsaqler dzoerlerni mr-eu tsawrhaq-aq, Arsaq yawmuiq-aer saqnya taef-a.

³⁸ Aerkhawf, yawbanq yawlaeq jeq mr-eu deuq-aq, tiqkawv lof-aer yabi lavcawv-awr; Tsawrcawv-aq, maeqhu paw yabi deuvtsaevdzae taef-a.

³⁹ Aerkhawf, Ya’we Miqyaer-aq, tsaq-awr dawr-eu tsawrhaq-anr kakhof naeq-awr; Aqyawfmaf gardzaq garkawv ya’mawr-eu aryamq-anr, aqyawf maf-euq gharduq ghaq pyeufnaeq taef-a.

⁴⁰ Ya’we Miqyaer, aqyawf maf-anr cawba-awr aqyawf maf-anr bibuq-ir taef-a; Aqyawfmaf, Miqyaer-euq lafkhoer caevzaf-eu mirnae, Aqyawf, aqyawf maf-anr tsawrcawv-anr nae kakhof-awr bibuq-ir taef-a.