Jaceuq 36 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Tsawrhaq Yawdoer, Miqyaer Yawmuiq

Car-eu paw sheuqghae-eu aqyuif ghaq-anr bofnaeq-euq, Ya’we Miqyaer-euq kuirlaf zaqkhav pyeuf-eu Daqbir-euq cardawq

¹ Tsawrcawv banq-awr laeq-eu garkawv, Ngaq-euq nuima-euq lafkhoer anr-eu dawq-aq, heulof-aer ma. Aqyawf-euq myavkhae, Miqyaer-anr guv-eu jeq maqjav nga.

² Aqyawf, yawqha-euq myavkhae, yawqhar yawqha japoeq taq-euq mirnae, Tiqjawr-iq yawqha-euq yawlaeq yawca hawdov-awr byae-eu jeq maqanr-a.

³ Aqyawf-euq khaqmae-aq, yawcawv hawr-eu jaqmyawf maershuir-euq dawq ngaeq-awr; Aqyawf tsawrganr anr-eu lof-aer daef-awr yawmuiq jeq mr-eu byaertsaev tsaev-euq mae.

⁴ Aqyawf yufzar-anr jawr-awr nae yawcawv jeq tov-awr; Aqyawf maqmuiq-eu garma-anr can’ghae-eu mae. Aqyawf yawdoer jeq-anr nuidav maqdav-a.

⁵ Ya’we Miqyaer-or! Nawq-euq ghawqshaq gaq-eu jeq-aq, mq-euq khoertav jav-awr; Nawq-euq sarjax zif-eu jeq-aq, mqdmr-anr tuv-eu mae.

⁶ Nawq-euq tsaq-awr dawr-eu jeq-aq, Zawr huiq-eu gawqjawq deuq lof-aer dur-awr; Nawr yarkhaq dar-eu jeq-aq, zawr naf-eu mae; Ya’we Miqyaer-or! Tsawrhaqzaq hawr-eu jeqzaq deuq-anr, Nawr, ngaeqghae luf-eu mae.

⁷ Miqyaer-or! Nawr ghoer-awr gaq-eu jeq, Arnavni poeq-awr lawq-eu nga! Heu-euq baqda’nae, nawq-euq aqdanr-euq narshmr-euq uqmov, Tsawrhaqzaq ghoelar-eu mae.

⁸ Nawq-euq nymr-euq lafkhoer javbyan taq-euq jeq-euq baqda’nae, Aqyawfmaf tiqbyan tiqlof nuikhanr shir-awr; Nawr, aqyawf maf-anr, nawq-euq laqkhaq caer-eu lawrgawv-anr nae bidawr-euq mae.

⁹ Aqjeq mirnae aernar-aq, nawr daef-eu jeq bif-eu cuq jav-awr; Nawq-euq yawshaef-euq lafkhoer, nga’maf yawshaef mawrnya-eu ma.

¹⁰ Maq tsaevlerni, nawq-anr siqnya-eu deuq-anr, nawq-euq ghoer-awr gaq-eu jeq bif-awr; Nuima yawdawr deuq-anr, nawq-euq tsaq-awr dawr-eu jeq bif-awq.

¹¹ Nuima huiq-eu tsawrhaq-euq aqkuir, ngaq-anr taqbi caelar naeqlaf; Tsawrcawv-euq aqlaf nae, ngaq-anr taqbi taedzae naeqlaf.

¹² Haeq, yawlaeq yawca jeq mr-eu deuq, coq-ir shaw-euq mae; Aqyawfmaf mirtsa bi daecoq ghae-awr, maqpar turlar nya-eu mae.