Jaceuq 35 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Hawpir-awr Bibuq-ir Naeqlaf

Daqbir-euq cardawq

¹ Ya’we Miqyaer-or! Ngaq-anr caelar-eu deuq-anr caedan naeqlaf-awr; Ngaq-anr guirdeuv deuvlar-eu deuq-anr deuvdan naeqlaf-awq.

² Daeqdaqduq hawr-eu tanqdaqduq yur-awr nae, gawqyawf yawf-awr ngaq-anr cawba naeqle-awq.

³ Ganq gheudov-awr, ngaq-anr tae-eu deuq-anr lavnaq-awq. Ngaq-euq nuima saflar-anr heulof-aer aernaeq laf-awq, “Ngar-aq, nawq-anr bibuq-ir-eu ghaq ma.”

⁴ Ngaq-euq daefzir yur-eu laer pov-eu deuq, bi shafdawr-ir-awr daqga-ir luf-ur. Ngaq-anr lavnar-eu laer tov-eu deuq, yawbanq yawlanr-aer pyeuf-ir-awr narkhan paw ghof-ir luf-ur.

⁵ Aqyawfmaf, jaqlaer-euq maeqshi khaqpuiq lof-aer bipyeuf-awr; Ya’we Miqyaer-euq mqtav ghaqkhaer, aqyawf maf-anr taetae-aer cantae luf-ur.

⁶ Aqyawf maf-euq garma zanrtsuini bighae-awr yawjur bijur law; Ya’we Miqyaer-euq mqtav ghaqkhaer, aqyawf maf-anr taetae-aer can luf-ur.

⁷ Tiqjeq-iq maqngeur-eu gar, ngaq-euq daefzir yur-eu laer, aqyawfmaf duqkhanq khanq-awr, Garkawv maqjav-eu gar, aqyawfmaf, ngaq-anr khmrpaf-eu laer duqkhanq-anr bawghaf khmrzaf taq-euq mae.

⁸ Aqyawf maqnoeq-aer jawr-eu gar, aqyawf-euq khoertav cawv-ir-eu jeq keuvle luf-ur. Yawqha nae khmrzaf taq-euq bawghaf-anr yawqha pafler luf-ur. Cawv duidui-eu lafkhoer, aqyawf ga’anrghae luf-ur.

⁹ Khoerngae, ngaq-euq nuima saflar, Ya’we Miqyaer-euq lafkhoer laqkhaq yacaer-awr; Aqyawf-euq kakhof-eu jeq-euq lafkhoer caergha taef-a.

¹⁰ Ngaq-euq shaqyoeq dawqtawvluf heulof-aer aer taef-a, “Ya’we Miqyaer-or! Nawq-anr dur-eu aqsur ghaq jawr-eu la? Ghaq ardzaeq-aer khav-eu tsawrhaq-anr nae irshaqzaq-anr bibuq-ir-awr, Nawqdzaq khavdzaq-eu deuq-anr nae irshaqzaq hawr-eu shaqzaq zanqzaq-anr bibuq-ir-eu mae.”

¹¹ Tsawrkaq geuf-eu yawghae deuq turlar-awr, Aqyawfmaf, ngar maq siqnya-eu jeq-anr keuvni narhaq lar-eu mae.

¹² Ngaq-euq nuima cawv-ir ni, Aqyawfmaf, ngaq nae yawmuiq jeq mr-euq gar yawdoer jeq janrkhof naeqlaf-eu mae.

¹³ Aerkhawf, aqyawfmaf narluf gawrluf ngae, ngar guqdar paerzeur dm-awr, Nuima nanqyuni taq-eu lafkhoer dzardzaq sheuq-euq ma; Khoernar-aq, ngar guiqlanq shar-eu, ngaq-euq nuima-anr ghofkhoflar paq-aer shar-euq ma.

¹⁴ Ngar, yawqha-euq maernmr hawr-eu cawq lof-aer sawx-awr luvlav mr-awr; Yawqha-euq aqma-euq gharduq tsawrngoer ngoer-eu lof-aer, ghawqshaq-aer awbyav-euq ma.

¹⁵ Aerkhawf, ngar sanqtiftif ngae, Aqyawfmaf laqkhaq caer-eu lafkhoer, tiqkawv lof-aer uiqler-awr, Ngaq-anr muir-eu laer bymrler taef-a laer ngar maq siqnya-aq. Aqyawfmaf, maq naqlerni ngaq-anr gheupyaeq lar-eu mae.

¹⁶ Miqyaer-anr maqzeu-aer aqjaf jaf-eu deuq yawbui-anr jawr-awr, Ngaq-anr aqyawf maf-euq seuq teufhaw naeqlaf-eu mae.

¹⁷ Sanqpaq Miqyaer-or! Nawr aqmyan keuvni hawhaw-aer jawr-eu laer ghae-eu le? Poeq-eu ngaq-euq daefzir-anr arlaqjaqshir lavcawv lar-eu gar nae bidzeur-ir naeqlaf-awq.

¹⁸ Tsawrhaq baqmaf mafma uiqler taq-awr jawr-eu maeqshi, Nawq-euq guiqlanq-anr jaceuq ma. Tsawrhaq ghawqmya’ni ghae-eu maeqshi, ngar, nawq-anr jaceuq ma.

¹⁹ Ngar tiqjeq-iq maqlaeq-eu gar muir-eu deuq, Ngaq-euq baqda’nae laqkhaq taqbi caer law. Tiqjeq-iq maqngeur-eu gar, ngaq-anr byae-eu deuq myavtaev taqbi taevcawq law.

²⁰ Aqjeq mirnae aernar-aq, aqyawfmaf tsaqler dzoerler-eu dawq maqngaeq-aer, Mirkhanq-anr jawr-eu ciqcurni ghae-eu tsawrhaq-anr maershuir shuir-eu jeq tov-eu mae.

²¹ Aqyawfmaf, ngaq-anr muir-eu laer khaqmae ghawqloeni mrnga-awr aer-eu, “Haeqde-eq, haeqde-eq! Nga’maf-euq myavnuiv nae mawrjir-euq ma.”

²² Ya’we Miqyaer-or! Nawr, heu-anr mawrjir taq-euq mae; Ciqcurni taq jawrbyov naeqlaf. Sanqpaq Miqyaer-or! Ngaq-anr nae ghawqmanr-aer taq jawrkaq naeqlaf.

²³ Ngaq-euq Sanqpaq, ngaq-euq Miqyaer-or! Ngaq-euq gardzaq hawr-eu ngaq-euq garkawv-euq gharduq, Tsawqtur-awr, yawqhar yawqha lavzor-awr japir naeqlaf-awq.

²⁴ Ngaq-euq Miqyaer pyeuf-eu Ya’we Miqyaer-or! Nawr tsaq-awr dawr-eu gar tsaqni, ngaq-anr japir naeqlaf-awr; Ngaq-euq baqda’nae aqyawfmaf laqkhaq taqbi caer law.

²⁵ Aqyawf maf-euq nuima-euq lafkhoer heulof-aer taqbi aer law, “Haeq, aqdui nae kharnoeq-euq lof-aer pyeuflar-euq ngar-a.” Aqyawfmaf heulof-aer taqbi aer law, “Aqduimaf nae aqyawf-anr myeufanr-euq ma.”

²⁶ Ngar narluf-eu gar laqkhaq caer-eu deuq, Daq biga-ir-awr yawbanq yawlanr-aer bipyeuf-ir law. Ngaq-anr janrghaehaw lar-eu deuq, Daqga-eu jeq hawr-eu shafdawr-eu jeq yadm luf-ur.

²⁷ Ngar tsaq-awr dawr-eu jeq mr-eu gar nuikhanr shir-eu tsawrhaq deuq, Laqkhaq caer-eu mirnae gurgur-aer bi caergha law; Aqyawfmaf maq naqlerni heulof-aer bi’aer law, “Aqyawf-euq kuirlaf zaqkhav muiqlar sanrlar-eu gar nuikhanr shir-eu Ya’we Miqyaer-anr ciqhuiq ciqmanr kar-eur.”

²⁸ Khoernar-aq, ngaq-euq maeqlar, Nawq-euq tsaq-awr dawr-eu garkawv ngaeq-awr, Nan’ga-i nawq-anr jaceuq ma.