Jaceuq 34 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Myeufhaw-awr, Miqyaer-euq Yawmuiq Hawmawr-awq

Daqbir tsawruq uq-ir-euq geuf-awr, Aqbirmaqlaev-euq maeqshi nae bi taedzae-awr yadov-ir-euq, Daqbir-euq cardawq

¹ Ngar aqmyanluf, Ya’we Miqyaer-anr jaceuq ma; Ngaq-euq khaqmae, maq naqlerni aqyawf-anr jaceuq ma.

² Ngaq-euq nuima saflar, Ya’we Miqyaer-euq lafkhoer khanqsaer jaev ma; Nuima nanqyuni ghae-eu tsawrhaq yagaq ngae, laqkhaqcaer taef-a.

³ Or-oq, ngaq naeq-aer Ya’we Miqyaer-anr ciqhuiq ciqmanr lar-awq; Aqdui tiqkawv lof-aer, aqyawf-euq tsawrmyanr-anr ciqpoeq ciqgor kar-eur.

⁴ Ngar, Ya’we Miqyaer-anr pov ngae, Aqyawf, ngaq-anr narhaq naeqlaf-awr, Ngar guv-eu jeq dawqtawv luf-anr nae, Ngaq-anr bibuq-ir naeqlaf-euq mae.

⁵ Aqyawfmaf, aqyawf-anr haw ngae, yawshaef byalar-awr, Aqyawf maf-euq myavpyawq daq maqya ga-ar.

⁶ Irshaqzaq heughaq gur-eu gar, Ya’we Miqyaer narhaq naeqlaf-awr, Aqyawf-euq gardzaq garkawv dawqtawv luf-anr nae, Bibuq-ir naeqlaf-euq mae.

⁷ Ya’we Miqyaer-euq mqtav ghaqkhaer, Miqyaer-anr guv-eu deuq-euq tiqjawq lofjawq taq-awr, Aqyawf maf-anr bibuq-ir-eu mae.

⁸ Haeq, myeufhaw-awr Ya’we Miqyaer-aq, Yawmuiq ngar-a laer hawmawr-awq! Aqyawf-anr ghoe-eu tsawrhaq-aq, guiqlanq huiq-eu mae.

⁹ Miqyaer-euq tsawrshawr deuq-or! Ya’we Miqyaer-anr guv-awq. Aqyawf-anr guv-eu tsawrhaq-aq, tiqjeq-iq maqnym-ar.

¹⁰ Arlaqjaqshir zaqguq dzaq-eu maqjav-aer maef-eu gar keuv-eu khawf, Ya’we Miqyaer-anr pov-eu deuq-aq, yawmuiq jeq maqnym-ar.

¹¹ Nawmaf zaqdeuq lar-awr, ngaq-anr narhaq lar-awq. Ngar, nawmaf-anr Ya’we Miqyaer-anr guv-eu jeq maeqnaeq nyar.

¹² Yawmuiq jeq ya’mawrni, arnan aryamq-anr gaq-awr, daefzir za’mawf-eu aqsur ghaq le?

¹³ Nawq-euq maeqlar yawdoer maqngaeqni yanr-awr, Nawq-euq maeqluq jaqmyawf maqmyawfni yanr-awq.

¹⁴ Yawdoer jeq-anr byaer-awr yawmuiq jeq mr-awq. Tsaqler dzoerler-eu jeq-anr pov-awr cantae ghae-awq.

¹⁵ Ya’we Miqyaer-euq myavnuiv-aq, tsaq-awr dawr-eu tsawrhaq deuq-anr hawluf-awr, Aqyawf-euq naqbawr-aq, aqyawfmaf gur-eu gar narhaq luf-eu mae.

¹⁶ Ya’we Miqyaer-euq myavpyawq-aq, yawdoer jeq mr-eu deuq-anr lavtsoeq-awr, Mirtsaq-euq khoertav aqyawf maf-anr maqbi noeqkeuvni deuvtsaev dzae-eu mae.

¹⁷ Tsaq-awr dawr-eu deuq gur-eu gar, Ya’we Miqyaer narhaq naeq-awr, Aqyawf maf-anr, aqyawf maf-euq gardzaq garkawv-anr nae bibuq-ir-eu mae.

¹⁸ Ya’we Miqyaer, nuima tsawqpav taq-euq deuq-euq dawqpae jawrluf-awr, Aqyawf, nuima ghawqshaq-aer ghae-eu deuq-anr bibuq-ir-eu mae.

¹⁹ Tsaq-awr dawr-eu tsawrhaq shaqzanq ghawqmya’ni yadaq-eu mae. Aerkhawf, Ya’we Miqyaer, aqyawf-anr shaqzanq dawqtawv luf-anr nae bibuq-ir-eu mae.

²⁰ Miqyaer, aqyawf-euq shaqyoeq dawqtawv luf-anr hawpir naeq-awr; Shaqyoeq tiqkanq-iq maqbi khaef-ir-a.

²¹ Yawdoer jeq, tsawrcawv-anr saef taef-a. Tsaq-awr dawr-eu jeq-anr byae-eu tsawrhaq-aq, yarkhaq yabi dar taef-a.

²² Ya’we Miqyaer, aqyawf-euq kuirlaf zaqkhav deuq-euq nuima saflar-anr kakhof-awr, Aqyawf-anr ghoe-eu deuq, tiqghaq-iq yarkhaq dar-eu gar maqya daq-ar.