Jaceuq 33 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Huiq-awr Muiq-eu Ya’we Miqyaer

¹ Tsaq-awr dawr-eu tsawrhaq deuq-or! Ya’we Miqyaer-euq lafkhoer laqkhaq caer-awq. Dawrcoeni ghae-eu tsawrhaq, aqyawf-anr jaceuq-eu tsaq mae.

² Deur-mq cuq diq-awr Ya’we Miqyaer-anr jaceuq-awq! Tser cav tsof-eu deur-mq ma, diqdiq-aer car-awr aqyawf-anr jaceuq-awq.

³ Miqyaer-anr cardawq yawshuif carnaeq-awq. Deur-mq yawmuiq-aer diq-awr laqkhaq caer-eu lafkhoer gur-awq.

⁴ Ya’we Miqyaer-euq dawq-aq, tsaq mae. Aqyawf nae mr-euq gar dawqtawvluf yawtsaq yawdawr-euq lafkhoer mr-euq mae.

⁵ Miqyaer tsaq-awr dawr-eu jeq hawr-eu dawr-awr tsaq-eu jeq-anr gaq-awr, Mirtsaq-euq khoertav Ya’we Miqyaer-euq yawmuiq jeq byanluf-eu mae.

⁶ Mqdeuq-anr Ya’we Miqyaer-euq dawq nae bae-awr, Mqtav tsaeq-eu jeq dawqtawvluf, aqyawf-euq khaqmae-euq saf nae bae-euq mae.

⁷ Aqyawf, iqmalavshav-euq ircuf-anr irtuiv tuiv-awr, ircuf-euq yawnaf, ircuf taqduq-anr bijav-euq mae.

⁸ Mirtsaq dawqtawvluf, Ya’we Miqyaer-anr guv-awr; Mirtsaq tanqkhawr-anr kharjawr-eu deuq aqyawf-anr zeu-awq.

⁹ Aqjeq mirnae aernar-aq, aqyawf nae kharaer-euq jeq javlar-awr; Aqyawf nae dawq bif-euq lof-aer zifdanni javluf-eu mae.

¹⁰ Ya’we Miqyaer, mirkhanq tsawrjeuq-euq maeqbawq-anr yawqngaef-aer bipyeuf-ir-awr; Tsawrhaqzaq nae bawqtov tov-euq jeq, gardanq maqbi tsoeqlerni janrnaeq-eu mae.

¹¹ Ya’we Miqyaer-euq maeqbawq-aq, mqmaq maqbyav yarzir zif-awr, Aqyawf-euq nuima-euq bawqtov-aq, yawqzir navluf-euq gharduq zif-eu mae.

¹² Miqyaer nae aqyawf-euq jeqbir lof-aer tserdov-euq tsawrhaq; Ya’we Miqyaer-anr, aqyawf maf-euq Miqyaer bipyeuf-eu tsawrjeuq tsawrca-aq, guiqlanq huiq-eu mae.

¹³ Ya’we Miqyaer, mqtav nae hawkalef ngae; Tsawrhaq-euq zaqdeuq dawqtawv luf-anr hawmawr luf-eu mae.

¹⁴ Aqyawf, aqyawf-euq jawrduq-anr nae, mirtsaqzaq dawqtawv luf-anr hawluf-eu mae.

¹⁵ Aqyawf nae aqyawf ghaq aqyawf-aer nuima bae’anr naeq-awr; Aqyawf, aqyawfmaf kharmr-eu jeq-anr sharnoeq sharsawx-eu mae.

¹⁶ Sanqpaq tiq ghaq, guirmaf myaq-eu mirnae buq-ir nya-eu maqngeur-a. Ghaq khav-eu tiq ghaq, ghaq yawkhav mirnae, dzeur-ir nya-eu maqngeur-a.

¹⁷ Ghaqler-eu gharduq manq-anr noeqtmq-eu-aq, gardanr maqtsoeq-a. Aqyawf-euq ghaq yawkhav khawf, tiqghaq-anr-iq maqbi buq-ir nya-a.

¹⁸ Hawsher-eq, Ya’we Miqyaer-euq myavnuiv-aq, aqyawf-anr guv-eu tsawrhaq hawr-eu, Aqyawf ghawqshaq gaq-eu jeq-anr noeqtmq-eu tsawrhaq-anr hawluf-eu mae.

¹⁹ Aqyawf maf-euq nuima saflar shir-eu jeq-anr nae bibuq-ir-awr, Maef-awr shuf ngae bi daefdzeur nya’ni ngaeqghae naeq-eu mae.

²⁰ Aqdui-euq nuima saflar, Ya’we Miqyaer-anr dawq ma. Aqyawf-aq, aqdui-anr cawba-eu aqdui-euq daeqdaqduq pyeuf-eu mae.

²¹ Aqdui, aqyawf-euq shawr-eu tsawrmyanr-anr ghoe-euq mirnae, Aqdui-euq nuima, aqyawf-euq lafkhoer laqkhaq yacaer taef-a.

²² Ya’we Miqyaer-or! Nga’maf, nawq-anr noeqtmq-eu lof-aer, Nawq-euq ghawqshaq gaq-eu jeq, nga’maf-euq khoertav bi keuvle naeqlaf-awq.