Jaceuq 32 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Iqbax-anr Buq-ir-awr Laqkhaq Caer-eu

Daqbir-euq cardawq, Maqsaqkir kawqsheu

¹ Yawqha-euq iqbax bi daeqkaq-awr, Yawqha-euq yawbanq yawlaeq-euq gharduq, Iqbax bipyaeq-euq tsawrhaq-aq, guiqlanq huiq-eu mae.

² Saflar-euq lafkhoer jaqmyawf maershuir maqanr-aer, Ya’we Miqyaer yawlaeq yawca maq sawxnaeq-euq tsawrhaq-aq, guiqlanq huiq-eu mae.

³ Ngar ciqcurni jawr ngae, ngar nan’ga-i manr-eu mirnae, Ngaq-euq shaqyoeq gui-ir luf-eu mae.

⁴ Uqcif nan’ghanr maqaer, nawq-euq aqlaf, ngaq-euq khoertav kanluf-eu mirnae; Ngar daef-eu jeq, jawrla-euq yawgui lof-aer pyeuflar taq-euq mir-a. Sela.

⁵ Ngar, ngaq-euq yawlaeq yawca maqzafni, Ngaq-euq iqbax nawq-anr ja’naeq-euq ma. Ngar heulof-aer aer-euq ma, “Ngar, ngaq-euq yawbanq yawlaeq, Ya’we Miqyaer-anr aerdovnaeq ma.” Khoerngae, nawr, ngaq-euq yawbanq yawlaeq-anr sivbyov naeqlaf-euq mae. Sela.

⁶ Heu-euq baqda’nae, nawq-anr sarjax zif-eu yawqghaq navluf, Nawq-anr mawrnya-eu aryamq pyeuf ngae, Nawq-anr guiqlanqshar taef-a. Ircuf ghawqmya’ni danqlar-eu khawf, Yawduq bawni, aqyawf-euq dawqpae maq danqkeuv lar-ar.

⁷ Nawr-aq, ngar caevzafduq pyeuf-eu mae. Nawr, ngaq-anr gardzaq garkawv maqbi keuvle-aer hawpir naeqlaf-awr; Nawr, ngaq-euq tiqjawq buq-ir-euq cardawq nae tsanrlanr naeqlaf-eu mae. Sela.

⁸ Miqyaer aer-eu, “Ngar, nawr ya’ir-eu garma, nawq-anr maeqnaeq-awr bi ganrlar ma. Ngar, nawq-anr, ngaq-euq myavnuiv nae sheuqghaenaeq ma.

⁹ Ghovshaw nya-eu jeq maqanr-eu manq hawr-eu manqtanqlav lof-aer taqghae. Aqjeq mirnae aernar-aq, aqyawf maf-aq, maeqkawf hawr-eu maeqkaf dawv-awr nae tsanr-eu maqngeur nar-aq, nawq-euq dawqpae maqlar-a.”

¹⁰ Tsawrcawv-aq, nuima cawv-eu ghawqmya jeq yadaq taef-a; Aerkhawf, Ya’we Miqyaer-anr ghoe-eu tsawrhaq-euq tiqjawq, ghawqshaq gaq-eu jeq jav taef-a.

¹¹ Tsaq-awr dawr-eu tsawrhaq deuq-or! Ya’we Miqyaer-euq lafkhoer laqkhaq caer-awr lurgha caergha-awq. Nuima dawrcoeni ghae-eu tsawrhaq dawqtawvluf, laqkhaqcaer duidui-awr gur-awq.