Jaceuq 31 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Ngaq-anr Taqbi Shafdawr-ir Naeqlaf

Car-eu paw sheuqghae-eu aqyuif ghaq-anr bofnaeq-euq, Daqbir-euq cardawq

¹ Ya’we Miqyaer-or! Ngar, nawq-anr ghoe ma. Ngaq-anr tiqjawr-iq taqbi shafdawr-ir naeqlaf; Nawq-euq tsaq-awr dawr-eu lafkhoer, ngaq-anr bibuq-ir naeqlaf-awq.

² Nawq-euq naqbawr, ngaq-anr ciqkhmr ghaelef naeqlaf-awr, Ngaq-anr yawkawr-aer bibuq-ir naeqlaf-awq. Ngaq-euq caevzafduq logur pyeufnaeq laf-awr; Ngar yabuq-ir ni, lofpir-eu zif-eu lanrlof pyeufnaeq laf-awq.

³ Aqjeq mirnae aernar-aq, nawr-aq, ngaq-euq lanrlof hawr-eu logur pyeuf-eu mae. Khoermirnae, nawq-euq tsawrmyanr baqda’nae, Ngaq-anr sheuqghae-awr sheuqmaeq naeqlaf-awq.

⁴ Nawr, ngaq-euq ghaq pyeuf-eu mirnae, Aqyawfmaf nae yawzaf-anr khmrtaq-euq lanrju-anr nae, gheudov naeqlaf-awq.

⁵ Ngar, ngaq-euq saflar, nawq-euq aqlaf-euq lafkhoer a’naeq ma. Yawtsaq yawdawr-euq Miqyaer pyeuf-eu, Ya’we Miqyaer-or! Nawr, ngaq-anr kakhof naeqlaf-euq mae.

⁶ Ngar, gardanr maqtsoeq-eu tanqpanq aqma mawrkawr-anr noeqpoeq-eu deuq-anr byae-euq ma. Ngar, Ya’we Miqyaer-anr taef-aer ghoe-eu ma.

⁷ Nawr ghawqshaq gaqnya-eu gar, ngar laqkhaq caer-awr lurgha caergha ma. Aqjeq mirnae aernar-aq, ngar shaqzanq daqluf-eu gar, Nawr hawmawr-awr, ngaq-euq nuima saflar shaq-awr zanq-eu siqnya-eu mae.

⁸ Nawr, ngaq-anr muir-eu deuq-euq aqlaf-euq lafkhoer maqbi anrlerni, Nawr, ngaq-euq aqkuir-anr jerloni ghae-eu jawrduq-anr ciqtaq naeqlaf-euq mae.

⁹ Ya’we Miqyaer-or! Ngar shaq-awr zanqluf-eu mirnae, Ngaq-anr ghawqshaq gaqnaeq laf-awq. Ngar nuima cawv-eu mirnae, ngaq-euq myavnuiv ghaq baq-awr, Ngaq-euq nuima saflar hawr-eu ngaq-euq mawrdo khawf, ghaq baq mir-a.

¹⁰ Ngaq-euq daefzir nuima cawv-eu lafkhoer zir jirle luf-awr, Ngaq-euq arkhof arla-aq, saf safma ghawr-eu lafkhoer jirleluf mir-a. Ngaq-euq yawlaeq yawca-euq baqda’nae, ngar ghaq juq-ir luf-awr, Ngaq-euq shaqyoeq shaqlaf ghaq baq-ir luf mir-a.

¹¹ Ngaq-anr muir-eu tsawrhaq dawqtawvluf, ngaq-anr aerdoer-awr, Ngaq-euq dawqpae jawr-eu deuq par aerdoer dzaeq-eu mae. Ngar myavpyawq shuq-eu tsawrhaq, ngaq-anr guv-awr, Lafnyir paw ngaq-anr mawr-euq tsawrhaq dawqpae maqoeni caev-eu mae.

¹² Aqcawq, ngaq-anr shirbyov-euq tsawrhaq-anr lof-aer, ngaerjir naeqlaf-euq mae. Ngar-aq, meur-ir-euq oeqlanq-anr dur-eu mir-a.

¹³ Aqcawq ghawqmya’ni jabu jadoer-eu, ngaq-anr gaqlar luf-eu mirnae, Guvlar paq-aer ghae-eu jeq yawqpaw navluf tiqjawq javluf-eu mae. Aqyawfmaf tiqgar uiqler-awr, Ngaq-euq daefzir-anr deuqni maeqbawq bawqluf ngae, Ngaq-anr saef-eu laer bawqtov tovluf-eu mae.

¹⁴ Aerkhawf, Ya’we Miqyaer-or! Ngar lawnmr-aq, nawq-anr ghoe ma. “Nawr-aq, ngaq-euq Miqyaer ma” laer ngar aer ma.

¹⁵ Ngaq-euq arnan aryamq-aq, nawq-euq aqlaf-euq lafkhoer jav-eu mae. Ngaq-anr muir-eu deuq-euq aqlaf-anr nae hawr-eu, Ngaq-anr khaeq-awr khav-eu deuq-anr nae bibuq-ir naeqlaf-awq.

¹⁶ Nawq-euq myavpyawq-euq yawshaef, nawq-euq kuirlaf zaqkhav-euq khoertav byadav naeqlef-awr, Nawq-euq ghawqshaq gaq-eu jeq-euq baqda’nae, ngaq-anr kakhof naeqlaf-awq.

¹⁷ Ya’we Miqyaer-or! Ngar, nawq-anr kur-euq mirnae, Ngaq-anr daq taqbi ga naeqlaf. Tsawrcawv deuq-anr, daq biga-ir-awr, Aqyawf maf-anr lmqbymr-euq lafkhoer ciqcurni bijawr-ir-awq.

¹⁸ Nuima huiq-awr janrghae-eu lafkhoer, Tsaq-awr dawr-eu tsawrhaq-anr hawdoer-awr khanqsaer jaevjaev-aer, Jaqmyawf myawf-eu maeqluq deuq, ciqcur savni bipyeuf-ir-awq.

¹⁹ Or-oq, nawq-anr guv-eu deuq-euq khoertav bi keuvle-awr, Nawq nae tsawrhaq-euq zaqdeuq-euq maeqshi, Nawq-anr ghoe-eu deuq-euq gharduq laeqhmq taq-euq yawmuiq jeq arnavni huiq-eu nga.

²⁰ Nawr, aqyawf maf-anr tsawrhaq-euq bawqtov-anr nae bibuq-ir ni, Nawq-euq maeqshi jav-eu zaftaq-euq jawrduq-anr sheuqzaf-awr; Caecawq shar-eu maeqlar deuq-anr nae, Nawr, aqyawf maf-anr nawq-euq saeqghawv-euq lafkhoer bi jawrzaf taq-eu mae.

²¹ Ya’we Miqyaer-anr jaceuq ma. Aqjeq mirnae aernar-aq, zifdanni ghae-eu meuq-euq lafkhoer, Aqyawf, ngaq-anr aqyawf-euq zanqler paq-aer muiq-eu ghawqshaq gaq-eu jeq bimawr naeqlaf-euq mae.

²² “Nawq-euq myavnuiv maqmawr-eu gar, ngaq-anr taedzae naeqlaf-euq ngar-a” laer ngar ardzaeq-aer ngaeqkawr-euq mir-a. Aerkhawf, ngar, nawq-anr gurgaq ngae, ngar tanqshar-eu tersar-anr, nawr narhaq naeqlaf-euq mae.

²³ Or-oq, nawmaf, Miqyaer-euq tsawrshawr deuq-or! Ya’we Miqyaer-anr gaq-awq! Aqjeq mirnae aernar-aq, Ya’we Miqyaer, sarjax zif-eu tsawrhaq deuq-anr hawpir naeq-awr, Nuima huiq-eu tsawrhaq-anr byanbyan’ni janrkhof naeq-eu mae.

²⁴ Ya’we Miqyaer-anr noeqtmq-eu yawqghaq navluf, nuima mrdeur-awr khaqduqni ghaelar-awq.