Jaceuq 30 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Uqshawq Paw Za-eu Laqkhaq Caer-eu Jeq

Miqyaer-euq nymr-anr nymrdavdav ngae car-euq Daqbir-euq cardawq

¹ Ya’we Miqyaer-or! Nawr, ngaq-anr muir-eu deuq-anr ngaq-euq baqda’nae laqkhaq maqbi caer-aer; Nawr, ngaq-anr gheudov naeqlaf-euq mirnae; Ngar, nawq-anr ciqpoeq ciqgor ma.

² Ngaq-euq Miqyaer pyeuf-eu Ya’we Miqyaer-or! Ngar, nawq-anr gurgaq ngae, Nawr, ngaq-anr lavsavtaq naeqlaf-euq mae.

³ Ya’we Miqyaer-or! Nawr, ngaq-euq nuima saflar-anr lmqbymr-anr nae, Yurdov naeqlaf-euq mae. Ngar, duqkhanq-anr maqbi ga’anr ghaeni, Nawr, ngaq-anr yawdaef bidaef naeqlaf-euq mae.

⁴ Nawmaf, Ya’we Miqyaer-euq tsawrshawr deuq, Dawqcar car-awr Miqyaer-anr jaceuq-awq. Aqyawf-euq shawr-eu tsawrmyanr-anr jaceuq-awq.

⁵ Aqjeq mirnae aernar-aq, aqyawf nuima paer-eu tiqkhaeq larkhaeq taef-aer paer-awr; Aqyawf ghoer mr-eu jeq-aq, tiqzir zif-eu mae. Uqcif mirlan-aer ya’ngoer-eu law-awr khawf, Uqshawq paw laqkhaq caer-eu jeq keuvle-eu mae.

⁶ Ngar daefdzaq daefdawr-eu lafkhoer, “Ngar-aq, tiqjawr-iq nyinyi-aer maq ghaelar” laer aer-eu ma.

⁷ Ya’we Miqyaer-or! Nawr ghoer mr-eu jeq nae, Ngaq-euq gawqjawq zifdanni bi yawfnaeq laf-euq mae. Nawr, nawq-euq myavpyawq ciqzaf ngae, Ngar shaqzanq naf-euq ma.

⁸ Ya’we Miqyaer-or! Ngar, nawq-anr gurgaq-eu ma. Sanqpaq Miqyaer-anr ngar tanqshar-eu ma.

⁹ “Ngar, duqkhanq-anr ir ngae, ngaq-euq shiq aqjeq gardanr tsoeq-eu la? Mirtsaq-euq shaqjaev nawq-anr jaceuq taef-a lor? Nawq-euq yawtsaq yawdawr-euq garkawv dawqdzawr mrnya taef-a laq?

¹⁰ Ya’we Miqyaer-or! Narhaq naeqlaf-awr, ngaq-anr ghawqshaq gaqnaeq laf-awq. Ya’we Miqyaer-or! Ngaq-anr cawba-eu ghaq pyeufnaeq laf-awq.”

¹¹ Nawr, ngaq-euq gharduq tsawrngoer ngoer-eu jeq yur-awr, Garnyae nyae-eu jeq lavpyeuf naeqlaf-euq mae; Ngar dmluf-eu guqdar paerzeur maeqtsoeq nyaeflaev-awr, Laqkhaq caer-eu jeq bidm naeqlaf-euq mae.

¹² Khoermirnae, ciqcurni maqjawr-aer, ngaq-euq khanqsaer-anr nae, Car-awr nawq-anr jaceuq-eu ma. Ngaq-euq Miqyaer pyeuf-eu Ya’we Miqyaer-or! Ngar, nawq-anr mqmaq maqbyav yarzir jaceuq ma.