Jaceuq 29 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Baoq Khanqsaer Huiq-eu Ya’we Miqyaer

Daqbir-euq cardawq

¹ Mqtav-euq zaqdeuq-or! Ya’we Miqyaer-anr damq-awq! Ghaq hawr-eu yawshaef khanqsaer, Ya’we Miqyaer-anr damq-awq.

² Ya’we Miqyaer-euq tsawrmyanr-anr geuxni, yawshaef khanqsaer damq-awq! Hawmuiq-eu yawshawr-euq lafkhoer, Ya’we Miqyaer-anr uqduq tanq-awq.

³ Ya’we Miqyaer-euq tersar ircuf-euq khoertav javluf-awr; Yawshaef khanqsaer-euq Miqyaer mqjeq jeq-eu mae. Ya’we Miqyaer-aq, ghawqmya’ni ghae-eu ircuf-euq khoertav jawrluf-eu mae.

⁴ Ya’we Miqyaer-euq tersar-aq, baoq huiq-awr; Ya’we Miqyaer-euq tersar-aq, khanqsaer byan-eu tersar mae.

⁵ Ya’we Miqyaer-euq tersar shuqlir bawrma daekhaef ghae-awr, Ya’we Miqyaer, Leqbaqnoq-euq shuqlir-anr gheukhaefjir naeq-eu mae.

⁶ Aqyawf, Leqbaqnoq hawr-eu Sirliqoq-anr, Mawrner mawrgawzaq lof-aer bi durlar-awr, mawrnerzaq lof-aer bi tsawqlar-euq mae.

⁷ Ya’we Miqyaer-euq tersar, miqdzaq miqlmr lof-aer tanqpavghae lef-eu mae.

⁸ Ya’we Miqyaer-euq tersar, bawrtsanq bawrdanr-anr gheunyae-awr, Ya’we Miqyaer, Kadeqshar bawrtsanq bawrdanr-anr gheunyae-euq mae.

⁹ Ya’we Miqyaer-euq tersar-euq baqda’nae khaqtsaev aqma zaq baw-awr, Arbawr sanqkhav deqkovni pyeuf-ir-euq mae. Khoermirnae, aqyawf-euq uqduq tanqnymr nymrma-euq lafkhoer, Yawqghaq navluf, “Yawshaef khanqsaer hui luf-ur” laer aer-eu mae.

¹⁰ Ya’we Miqyaer, ircuf danqpymq taq-euq khoertav nuirluf-eu mae. Ya’we Miqyaer-aq, mqmaq maqbyav yarzir-euq Sanqpaq geuf-awr nuirluf-eu mae.

¹¹ Ya’we Miqyaer, aqyawf-euq tsawrhaq-anr ghaq bif taef-a; Ya’we Miqyaer, aqyawf-euq tsawrhaq-anr nuisar of-eu guiqlanq bif taef-a.