Jaceuq 28 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Ngaq-euq Logur Pyeuf-eu Ya’we Miqyaer

Daqbir-euq cardawq

¹ Ngaq-euq logur pyeuf-eu Ya’we Miqyaer-or! Ngar, nawq-anr kurluf-eu ma. Ciqcurni taq jawrbyov naeqlaf. Nawr ciqcurni jawrbyov naeqlaf nar-aq, Ngar khawf, duqkhanq-anr irluf-eu tsawrhaq-anr ya durlar-eu baw-mr.

² Ngar, nawq-euq shawr-eu yawshawr jawrduq paw, Ngaq-euq aqlaf bafdir-awr, Ngar, nawq-anr gurgaq ngae, Ngar, nawq-anr tanqshar-eu tersar-anr narhaq naeqlaf-awq.

³ Nuima-euq lafkhoer yawdoer jeq anr-eu khawf, Yawqha-euq dawqpae jawr-eu deuq-anr tsaqler dzoerler-eu dawq ngaeq-eu, Yawlaeq yawca jeq mr-eu deuq hawr-eu tsawrcawv deuq naeq-aer, Ngaq-anr taq gheudzae naeqlaf.

⁴ Aqyawfmaf nae laejae-awr yawcawv jeq mr-euq gar tsaqni hawr-eu, Aqyawfmaf nae mr-euq gar tsaqni, aqyawf maf-anr bifnaeq-awq. Aqyawf maf-euq aqlaf nae gar mr-euq lof-aer tsaqni bif-awr, Aqyawfmaf za paq-aer geux-eu lof-aer aqyawf maf-anr janrnaeq-awq.

⁵ Aqyawfmaf, Ya’we Miqyaer-euq lafzar-anr hawr-eu, Aqyawf-euq aqlaf nae mryaf-euq jeq-anr maq sharnoeq-eu mirnae, Aqyawf, aqyawf maf-anr maq bihuiq maqbi manrlar-aer, aqyawf maf-anr lavcawv taef-a.

⁶ Ya’we Miqyaer-anr jaceuq ma. Aqjeq mirnae aernar-aq, aqyawf, ngar tanqshar-eu tersar-anr narhaq naeqlaf-euq mae.

⁷ Ya’we Miqyaer-aq, ngaq-euq ghaq hawr-eu daeqdaqduq pyeuf-awr, Ngaq-euq nuima, aqyawf-anr ghoe-eu naeq-aer, aqyawf, ngaq-anr cawba naeqlaf-eu mae. Khoermirnae, ngaq-euq nuima laqkhaq yawkhav-aer caer-awr, Ngar dawqcar car-awr, aqyawf-anr jaceuq ma.

⁸ Ya’we Miqyaer-aq, aqyawf maf-euq gharduq ghaq pyeuf-awr, Aqyawf nae tsaqtsov-euq ghaq-euq gharduq, bibuq-ir-eu caevzafduq pyeuf-eu mae.

⁹ Nawq-euq tsawrhaq-anr bibuq-ir-awr, Nawq-euq jeqbir-anr guiqlanq bif-awq. Yawr bo-eu lof-aer, aqyawf maf-anr bosav-awr, Aqyawf maf-anr mqmaq maqbyav yarzir ciqdir naeq-awq.