Jaceuq 27 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Ngaq-euq Yawshaef Pyeuf-eu Miqyaer

Daqbir-euq cardawq

¹ Ya’we Miqyaer-aq, ngaq-euq yawshaef hawr-eu ngaq-anr bibuq-ir-eu ghaq mae. Ngar, aqsur ghaq-anr yaguv-eu la? Ya’we Miqyaer-aq, ngaq-euq daefzir-euq ghaq pyeuf-eu mae. Ngar, aqsur ghaq-anr guvkhar parza-eu la?

² Ngaq-anr muir-eu deuq hawr-eu ngaq-anr caelar-eu tsawrdoer deuq, Ngaq-euq shaqjir kawfdzaq-eu laer lar ngae, aqyawfmaf sanqtif tif-awr gacoq ghae-euq mae.

³ Ngaq-anr guirdeuv deuv-eu laer turlar-awr, Ngaq-euq tiqjawq guirmaf lofjawqjir taq-euq khawf, Ngaq-euq nuima maqguv. Ngaq-anr guirdeuv deuv-eu jeq keuvle taq-euq khawf, heu-euq lafkhoer, Ngar yawduq baw-eu ma.

⁴ Ngar, Ya’we Miqyaer-anr nae tiq jeq geufmawf mir-a, Khoerjeq-anr ngar pov-eu ma. Khoer-aq, ngar khardaef-eu arnan aryamq dawqtawvluf, Ya’we Miqyaer-euq nymr-euq lafkhoer jawr-awr nae, Hawmuiq-eu Ya’we Miqyaer-euq yawmuiq-anr hawhaw-aer, Aqyawf-euq uqduq tanqnymr nymrma-euq lafkhoer narhaqtser mawf mir-a.

⁵ Aqjeq mirnae aernar-aq, gardzaq garkawv keuvle-eu aryamq-anr, Aqyawf, ngaq-anr aqyawf-euq saeqghawv-euq lafkhoer bi caevzaf naeqlaf-awr; Aqyawf-euq saqpar saeqghawv-euq lafkhoer jav-eu zaftaq-euq jawrduq-anr, Aqyawf, ngaq-anr bi caevzaf naeqlaf taef-a. Aqyawf, ngaq-anr logur-euq khoertav yawgor-anr ciqdav naeqlaf taef-a.

⁶ Nymq-mr ngar, ngaq-euq tiqjawq jawrbyan taq-euq, Ngaq-anr muir-eu deuq-euq khoertav, ngaq-euq uqduq bafdir ma. Khoernar-aq, ngar, Miqyaer-euq saqpar saeqghawv-euq lafkhoer, laqkhaq caer-awr lawr-eu jeq lawrnaeq ma. Ngar dawqcar car ma. Ngar car-awr Ya’we Miqyaer-anr jaceuq ma.

⁷ Ya’we Miqyaer-or! Ngar, ngaq-euq tersar nae kur ngae, narhaq naeqlaf! Ngaq-anr ghawqshaq gaq-awr ngaeqghae naeqlaf-awq.

⁸ “Ngaq-euq myavpyawq-anr pov-awq” laer nawr aer ngae, “Ya’we Miqyaer-or, ngar, nawq-euq myavpyawq-anr pov ma” laer ngaq-euq nuima, nawq-anr aernaeq-euq ma.

⁹ Ngaq-anr bibuq-ir-eu Miqyaer-or! Ngaq-anr byaerdzae-awr, ngar taef-aer taqbi jawr naeqlaf. Nawr, ngaq-anr cawba-eu ghaq pyeufyaf-euq mae. Nawq-euq myavpyawq, ngaq-anr nae taq ciqzaf naeqlaf. Nuima paer-awr nawq-euq kuirlaf zaqkhav-anr taq taedzae naeqlaf.

¹⁰ Ngaqma hawr-eu ngaqda, ngaq-anr byaerdzae naeqlaf ngae, Ya’we Miqyaer, ngaq-anr ngaeqghae naeqlaf taef-a.

¹¹ Ya’we Miqyaer-or! Ngaq-anr nawq-euq garma maeqnaeq laf-awq. Ngaq-anr muir-eu deuq jawr-eu mirnae, Ngaq-anr cankawv yawdi paw sheuqghae naeqlaf-awq.

¹² Ngaq-anr muir-eu deuq mrmawf-eu lof-aer bimrni, Ngaq-euq mawrdo, aqyawf maf-anr taq a’naeq. Aqjeq mirnae aernar-aq, maqtsaq maqdawr-eu tsawrkaq, ngaq-anr deuqni turlar-awr, Coeqlar civlar paq-aer ghae-eu saf ghawrdovlef luf-eu mae.

¹³ Yawdaefzaq-euq mirkhanq-euq lafkhoer, Ngar, Ya’we Miqyaer-euq yawmuiq jeq ya’mawr taef-a laer jan-euq maqngeur lawnmr-aq, Ngar nuima nuighaq baq-ir shaw-euq law mir-a.

¹⁴ Ya’we Miqyaer-anr dawq-awq. Yawmuiq-aer mrghanr-awq. Aqyawf, nawq-euq nuima-anr nuighaq bifnaeqlaf taef-a. Ya’we Miqyaer-anr dawq-awq.