Jaceuq 26 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Yawmuiq Yawshawr Ma Laer Yawduq Baw-eu

Daqbir-euq cardawq

¹ Ya’we Miqyaer-or! Ngaq-anr yarkhaq dar-awq. Aqjeq mirnae aernar-aq, ngar yawmuiq yawjaq-euq lafkhoer daeflaf-euq ma. Ngar, Ya’we Miqyaer-anr ghoe-euq mirnae, ngar povpov lavlav-aer maqghae.

² Ya’we Miqyaer-or! Ngaq-anr tsermr haw-awr, ngaq-anr pyaevtser duq-awq. Ngaq-euq nuinoeq hawr-eu ngaq-euq nuima-anr povtser duq-awq.

³ Nawq-euq ghoer-awr gaq-eu jeq, ngaq-euq myavnuiv-euq maeqshi javluf-eu mirnae, Ngar, nawq-euq yawtsaq yawdawr-euq lafkhoer can-euq ma.

⁴ Ngar, maershuir shuir-eu tsawrhaq naeq-aer maq nuirtaf-aq; Ngar, jaqmyawf myawf-eu tsawrhaq naeq-aer khawf maq gawfler-aq.

⁵ Ngar, yawdoer jeq mr-eu deuq uiqler-eu gar byae-awr; Ngar, yawcawv jeq mr-eu deuq naeq-aer dawqnuir maq nuirtaf.

⁶ Ya’we Miqyaer-or! Ngar, nawq-euq lawrduq jawqjawq-aer cannya’ni, Ngar shawrjaevni ghae-eu ma laer aqlaf dzuifshawrler ma.

⁷ Khoernar-aq, ngar, dawqdzawr mr-eu jaceuq-eu tersar nae, Nawq nae zanqler paq-aer muiq-eu gardeuq mr-euq garkawv dawqtawvluf ja’naeq ma.

⁸ Ya’we Miqyaer-or! Ngar, nawq-euq yawshaef khanqsaer jav-eu jawrduq hawr-eu, Nawq-euq jawrduq pyeuf-eu nawq-euq nymr-anr gaq-euq ma.

⁹ Ngaq-euq nuima saflar, iqbaxzaq naeq-aer taq yavbymr naeqlaf. Ngaq-euq daefzir khawf, shiq maef-eu tsawrhaq naeq-aer taq yavbymr naeqlaf.

¹⁰ Aqyawf maf-euq aqlaf-euq lafkhoer maqmuiq-eu bawqtov tuvtaeq taq-awr, Aqyawf maf-euq armar laf-aq, lafnmf nmf-eu jeq tiqbyanni anr-eu mae.

¹¹ Aerkhawf, ngar-aq, ngaq-euq yawmuiq yawjaq-euq lafkhoer can ma. Ngaq-anr ghawqshaq gaq-awr kakhof naeqlaf-awq.

¹² Ngaq-euq aqkuir-aq, jawrduq yawdi-anr yawfluf-eu ma. Ngar, tsawrhaq baqmaf-euq ghanrcae, Ya’we Miqyaer-anr jaceuq ma.