Jaceuq 25 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Taqbi Shafdawr-ir Naeqlaf

Daqbir-euq cardawq

¹ Ya’we Miqyaer-or! Ngar, ngaq-euq nuima saflar nawq-anr a’naeq ma.

² Ngaq-euq Miqyaer-or! Ngar, nawq-anr ghoe ma. Ngaq-anr taqbi shafdawr-ir naeqlaf; Ngaq-anr muir-eu deuq ngaq-anr taqbi ghaqlar naeqlaf.

³ Nawq-anr khar dawqluf-eu tsawrhaq-anr khawf, taqbi shafdawr-ir naeqlaf. Tiqjeq-iq maqngeur-eu gar janrdoer naeqlaf-euq deuq-anr bi shafdawr-ir-awq.

⁴ Ya’we Miqyaer, nawq-euq garma deuq, ngaq-anr bimawr naeqlaf-awr; Nawq-euq cankawv deuq, ngaq-anr maeqnaeq laf-awq.

⁵ Ngaq-anr nawq-euq yawtsaq yawdawr-euq lafkhoer sheuqghae naeqlaf-awr, ngaq-anr maeqnaeq laf-awq; Aqjeq mirnae aernar-aq, nawr-aq, ngaq-anr bibuq-ir-eu Miqyaer mae; Nan’ga-i ngar, nawq-anr dawqluf-eu ma.

⁶ Ya’we Miqyaer-or! Arhuba nae jav-eu, nawq-euq nanqyuni ghawqshaq gaq-eu jeq hawr-eu, Nawq-euq ghoer-awr gaq-eu jeq-anr noeqkeuv naeqlaf-awq.

⁷ Ya’we Miqyaer-or! Nawr muiq-eu baqda’nae, Nawr ghawqshaq gaqnya-eu gar tsaqni, ngaq-anr noeqkeuv naeqlaf-awq. Ngar, zaqguq pyeuf ngae mr-euq iqbax hawr-eu ngaq-euq yawbanq yawlaeq deuq-anr taq noeqkeuv naeqlaf.

⁸ Ya’we Miqyaer muiq-awr dawrcoeni ghae-eu mirnae, Iqbaxzaq, aqyawf-euq garma-anr canni maeqnaeq-eu mae.

⁹ Aqyawf, nuinanq nuiyu anr-eu deuq-anr, dawr-awr tsaq-eu paw sheuqghae naeq-awr; Aqyawf, nuinanq nuiyu anr-eu tsawrhaq-anr, aqyawf-euq garma maeqnaeq-eu mae.

¹⁰ Aqyawf-euq dawqma sarjax hawr-eu aqyawf-euq dawqdzawr-anr cantae-eu tsawrhaq-euq gharduq-aq, Ya’we Miqyaer-euq cankawv dawqtawvluf, yawtsaq yawdawr hawr-eu ghawqshaq gaq-eu jeq pyeuf-eu mae.

¹¹ Ya’we Miqyaer-or! Nawq-euq tsawrmyanr baqda’nae, Ngaq-euq yawlaeq yawca yawkhav-aer huiq-eu khawf, pyaeqnaeq laf-awq.

¹² Ya’we Miqyaer-anr guv-eu tsawrhaq aqsur ghaq la? Aqyawf tsergeuf paq-aer ghae-eu garma, Miqyaer maeqnaeq taef-a.

¹³ Aqyawf-euq nuima saflar-aq, bawle zale-eu lafkhoer yadaef-awr, Aqyawf-euq aryoeq deuq-anr-aq, mirkhanq of taef-a.

¹⁴ Ya’we Miqyaer nae zaftaq-euq jeq-aq, aqyawf-anr guv-eu tsawrhaq deuq naeq-aer jav-awr; Aqyawf, aqyawf maf-anr aqyawf-euq dawqma sarjax bimawr-eu mae.

¹⁵ Ngaq-euq myavnuiv, aqmyanluf Ya’we Miqyaer-anr hawtsov taq-euq ma. Khoermirnae, aqyawf, ngaq-euq aqkuir lanrju-anr nae gheudov naeqlaf taef-a.

¹⁶ Ngar jawr-eu paw ciqpyawr lef-awr, ngaq-anr ghawqshaq gaqnaeq laf-awq. Aqjeq mirnae aernar-aq, ngar tiq ghaq taef-aer jawr-awr shaqzanq ya daqluf nya.

¹⁷ Ngaq-euq nuima-euq lafkhoer gardzaq garkawv huiqlar taq-euq mae. Ngar noeqshaq duidui luf-eu gar nae sheuqdov naeqlaf-awq.

¹⁸ Ngar shaqzanq ya daqluf-eu gar hawr-eu narluf gawrluf-eu gar haw-awr, Ngaq-euq iqbax dawqtawvluf pyaeqnaeq laf-awq.

¹⁹ Ngaq-anr muir-eu deuq-euq garkawv sharnoeq naeqlaf sher-eq. Aqjeq mirnae aernar-aq, aqyawfmaf zawr myaq-awr, aqyawfmaf, ngaq-anr byae-eu khoer deuqlar paq-aer byae-eu mae.

²⁰ Ngaq-anr bibuq-ir naeqlaf-awr, ngaq-euq nuima saflar hawpir naeqlaf-awq. Ngaq-anr taqbi shafdawr-ir naeqlaf. Aqjeq mirnae aernar-aq, ngar, nawq-euq lafkhoer caevzaflar ma.

²¹ Ngar, nawq-anr dawqluf-eu mirnae, Yawmuiq yawjaq hawr-eu yawdawr yawtsaq jeq nae, ngaq-anr hawpir naeqlaf-awq.

²² Miqyaer-or! Aqyawf maf-euq gardzaq garkawv dawqtawv luf-anr nae, Irsaqleqlav-anr kakhof naeq-awq.