Jaceuq 24 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Yawshaef Khanqsaer-euq Sanqpaq

Daqbir-euq cardawq

¹ Mirtsaq hawr-eu mirtsaq-euq khoertav kharjawr kharjav-eu yawqjeq navluf, Ya’we Miqyaer-euq mae; Mirtsaq tanqkhawr hawr-eu mirtsaq tanqkhawr-euq lafkhoer daef-awr jawr-eu deuq khawf, aqyawf-euq mae.

² Aqjeq mirnae aernar-aq, aqyawf nae iqmalavshav-euq khoertav, mirtsaq ciqtsaq taq-awr; Ircuf-euq khoertav, mirtsaq lavzif taq-euq mae.

³ Ya’we Miqyaer-euq gawqjawq-anr, aqsur ghaq ya davler-eu la? Maqngeur nar-aq, aqyawf-euq shawr-eu jawrduq-anr, aqsur ghaq yayawf-eu la?

⁴ Aqlaf shawr-awr nuima shawrjaevni ghae-eu tsawrhaq, Nuima saflar, tanqpanq aqma mawrkawr-anr maq ciqnaeq-aer, Maershuir shuir-eu laer maqkamq-eu tsawrhaq mae.

⁵ Heulof-aer ghae-eu tsawrhaq-aq, Ya’we Miqyaer-euq guiqlanq za-awr, Aqyawf-anr kakhof-eu Miqyaer-anr nae tsaq-awr dawr-eu jeq khawf za taef-a.

⁶ Heu-aq, Yaqkov mae, Miqyaer-anr pov-eu tsawrtsuif, Miqyaer-euq myavpyawq-anr pov-eu tsawrhaq mae. Sela.

⁷ Ghovkhaeq deuq-or, nawq-euq uqduq bafdir-awq! Mqmaq maqbyav yarzir-euq larghov deuq-or, bafdir-awq! Khoernar-aq, yawshaef khanqsaer-euq Sanqpaq urlar taef-a.

⁸ Yawshaef khanqsaer-euq Sanqpaq heughaq aqsur ghaq la? Ghaq khav-awr, ghae duidui-eu Ya’we Miqyaer mae, Guirdeuvdeuv ngae, ghae duidui-eu Ya’we Miqyaer mae.

⁹ Ghovkhaeq deuq-or, nawq-euq uqduq bafdir-awq! Mqmaq maqbyav yarzir-euq larghov deuq-or, bafdir-awq! Khoernar-aq, yawshaef khanqsaer-euq Sanqpaq urlar taef-a.

¹⁰ Yawshaef khanqsaer-euq Sanqpaq heughaq aqsur ghaq la? Guirmaf-euq Ya’we Miqyaer mae. Aqyawf-aq, yawshaef khanqsaer-euq Sanqpaq mae. Sela.