Jaceuq 22 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Aqjeq Mirnae Byaerdzae Naeqlaf-euq Le?

Car-eu paw sheuqghae-eu aqyuif ghaq-anr bofnaeq-euq, “Uqshawq paw-euq Khaqtsaev” kawqsheu, Daqbir-euq cardawq

¹ Ngaq-euq Miqyaer-or! Ngaq-euq Miqyaer-or! Aqjeq mirnae nawr, ngaq-anr byaerdzae naeqlaf-eu le? Aqjeq ghae-eu ngaq-anr maq cawba naeqlaf-aer, ngar manrluf-eu dawq-anr nae garmanr kaq-eu gar jawr-eu le?

² Ngaq-euq Miqyaer-or! Ngar nan’ghanr paw kur-eu khawf, nawr oq maq toqkhof naeqlaf-a. Uqcif-euq aryamq-anr khawf, ngar ciqcurni maqjawr-aq.

³ Aqjox-aer law-awr khawf, nawr-aq, Irsaqleqlav jaceuq-eu nuirmanq-anr nuirluf-eu yawshawr ghaq mae.

⁴ Nga’maf-euq aqpoeq deuq, nawq-anr ghoe-euq mae. Aqyawfmaf, nawq-anr ghoe-awr, nawr, aqyawf maf-anr bibuq-ir-euq mae.

⁵ Aqyawfmaf, nawq-anr gurgaq ngae, aqyawfmaf yadzeur-ir-awr; Aqyawfmaf, nawq-anr ghoe-euq mirnae, aqyawfmaf daq maqya ga-aq.

⁶ Aerkhawf, ngar-aq, tsawrhaq baqmaf hawdoer-awr, tsawrhaqzaq aerdoerduq pyeuf-eu; Tsawrhaq maqngeur-eu aqjuq tiq mawr-anr dur-eu taef mir-a.

⁷ Ngaq-anr khar mawrle-eu deuq, uiruir-aer aqjaf jaflar-awr; Aqyawfmaf maeqluq mryawf naeqlaf-eu lafkhoer, uqduq juifjuif-aer aer-eu,

⁸ “Aqyawf, Ya’we Miqyaer-anr ghoe-eu-aq, Miqyaer, aqyawf-anr bidzeur-ir luf-ur; Aqyawf, Miqyaer-euq lafkhoer laqkhaq caer-eu mirnae, Miqyaer, aqyawf-anr bibuq-ir luf-ur.”

⁹ Aerkhawf, nawr-aq, ngaq-anr zaq-euq jawrzar-anr nae bi daefle-euq ghaq pyeuf-awr; Ngar, ngaqma-euq aqcoer dawrluf ngae nae, nawq-anr bi ghoenya naeqlaf-euq mae.

¹⁰ Ngar daefle ngae nae, nawq-anr bighoe naeqlaf-euq mae. Ngar, ngaqma-euq uqmav-euq lafkhoer jawrluf ngae nae nawr-aq, ngaq-euq Miqyaer pyeuf-eu mae.

¹¹ Gardzaq garkawv dawqpae javluf-eu mirnae, ngaq-anr nae garmanr taq jawrkaq naeqlaf; Aqjeq mirnae aernar-aq, ngaq-anr cawba naeqlaf-eu tiqghaq-iq maqjawr-a.

¹² Mawrner mawrgaw ghawqmya mawr, ngaq-anr gajawq taq-euq mae. Ghaq khav-eu Baqshaq-euq mawrner mawrgaw deuq, ngaq-anr lofjawqjir taq-euq mae.

¹³ Aqyawfmaf, zir duidui-eu arlaqjaqshir joeq-eu lof-aer, Khaqmae mrnga-awr, ngaq-anr lmqluf-eu mae.

¹⁴ Ngar-aq, bi shaevdzae-euq ircuf lof-aer dur-awr, Ngaq-euq yoeqtsuif yoeqlaf puir-ir jir-euq mir-a; Ngaq-euq nuima-aq, byaqshanq lof-aer dur-awr, Ngaq-euq lafkhoer guirjir shaw-euq mir-a.

¹⁵ Ngaq-euq ghaq oeqlanqpyaeq lof-aer guicorni ghae-awr, Ngaq-euq maeqlar-aq, maeqof-anr myanqler taq-euq mir-a. Nawr, ngaq-anr bishir-eu khaqlaer tsanq-anr sheuqtaq naeqlaf-euq mae.

¹⁶ Aqjeq mirnae aernar-aq, aqkuiq deuq, ngaq-anr gajawq taq-awr; Tsawrdoer baqmaf tiq maf, ngaq-anr jawrjawq taq-euq mae. Aqyawfmaf, ngaq-euq aqkuir aqlaf-anr tsawvbyoe naeqlaf-euq mae.

¹⁷ Ngar, ngaq-euq shaqyoeq dawqtawvluf guijir nya-awr, Aqyawfmaf, ngaq-anr haw-awr, hawtsov taq-euq mae.

¹⁸ Aqyawf maf-euq yawkaq, ngaq-euq maeqtsoeq lafnyir kanr birgeuf-awr, Ngaq-euq paerkhanq lafkhoer kanr shaevtsaq tsaqgeuf-eu mae.

¹⁹ Aerkhawf, Ya’we Miqyaer-or! Nawr, ngaq-anr nae garmanr taq jawrkaq naeqlaf; Ngaq-euq ghaq pyeuf-eu ghaq-or! Ngaq-anr yawkawr-aer cawbale naeqlaf-awq.

²⁰ Ngaq-euq nuima saflar, micaer khaeq-anr nae bibuq-ir naeqlaf-awr, Poeq-eu ngaq-euq daefzir, aqkuiq-euq baoq-anr nae bibuq-ir naeqlaf-awq.

²¹ Nawr, ngaq-anr ngaeqghae-awr, naefnyoq-euq uqcoer-anr nae bidzeur-ir naeqlaf-euq mae. Ngaq-anr arlaqjaqshir-euq khaqmae-anr nae, bibuq-ir naeqlaf-awq.

²² Ngar, ngaq-euq maernmr deuq-anr, nawq-euq tsawrmyanr dzawrgaq ma. Armur uiqler-awr jawr-eu ghanrcae, ngar, nawq-anr car-awr jaceuq ma.

²³ Ya’we Miqyaer-anr guv-eu deuq, nawmaf, aqyawf-anr jaceuq-awq! Yaqkov-euq aryoeq dawqtawvluf, nawmaf, aqyawf-anr ciqhuiq ciqmanr-awq. Irsaqleqlav-euq aryoeq dawqtawvluf, nawmaf, aqyawf-anr guv-awq.

²⁴ Aqjeq mirnae aernar-aq, aqyawf, shaqzanq-anr ya daqluf-eu tsawrhaq-anr maq hawdoer-aer nuidav maqdav-eu uqtaf; Aqyawf-anr nae, aqyawf-euq myavpyawq maq ciqzaf-a. Aerkhawf, aqyawf, aqyawf-anr kur ngae, aqyawf narhaq-eu mae.

²⁵ Tsawrhaq tiqbyanni uiqler taq-euq gar, ngar, nawq-anr jaceuq ma. Ngar, nawq-anr guv-eu deuq-euq maeqshi, ngaq nae kamqtaq-euq lof-aer mrbyan ma.

²⁶ Irshaqzaq nuikhanr tiqshir ya dzaqdaev-awr; Ya’we Miqyaer-anr pov-eu deuq, aqyawf-anr ya jaceuq taef-a. Nawq-euq nuima mqmaq maqbyav yarzir daef luf-ur!

²⁷ Mirtsaq-euq mirdzer yawqdzer navluf, Ya’we Miqyaer-anr noeqkeuv lar-awr, aqyawf jawr-eu paw ghofkhoflar taef-a. Mirkhanq-euq tsawrjeuq-euq zawfjir dawqtawvluf khawf, nawq-euq maeqshi uqduq tanqlar taef-a.

²⁸ Aqjeq mirnae aernar-aq, uvlanr-eu jeq-aq, Ya’we Miqyaer-euq pyeuf-awr; Aqyawf, mirkhanq-euq tsawrjeuq deuq-anr uvlanr luf-eu mae.

²⁹ Mirtsaq-euq smrmuiq smrbaw dawqtawvluf, yadzaq-awr uqduq yatanq taef-a; Mirtsaq-euq shaqjaev ghofpyeuf-ir-eu yawqghaq navluf, Yawqha yawqha maq daefnya-aer pyeuflar-euq deuq, Aqyawf-euq maeqshi ya awbyav taef-a.

³⁰ Aqkar-euq nanqzaq, Miqyaer-euq kuirlaf geuf taef-a. Ya’we Miqyaer-euq garkawv, tiqzir sair tiqzir ja’maeqnaeq taef-a.

³¹ Miqyaer heujeq mr-euq mae laer, aqyawfmaf lar-awr aqkar daefle-eu tsawrhaq deuq-anr, Miqyaer-euq tsaq-awr dawr-eu garkawv dzawrnaeq taef-a.