Jaceuq 21 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Kakhof-eu Jeq Za-awr Laqkhaq Caer-eu

Car-eu paw sheuqghae-eu aqyuif ghaq-anr bofnaeq-euq, Daqbir-euq cardawq

¹ Ya’we Miqyaer-or! Nawq-euq ghaq-euq baqda’nae, sanqpaq laqkhaqcaer taef-a. Nawq-euq kakhof-eu jeq-euq lafkhoer, aqyawf yawkhav-aer lurgha caergha taef-a.

² Nawr, aqyawf-euq nuima khar geufmawf-eu jeq bifnaeq-awr, Aqyawf-euq maeqboeq nae shar-eu jeq-anr maqbif-aer maq ghaenaeq-aq. Sela.

³ Nawr, aqyawf-anr yawmuiq-euq guiqlanq bifnaeq-awr, Aqyawf-euq uqduq-anr shawr-eu shuir uqkhov nyaefkhov naeq-euq mae.

⁴ Aqyawf, nawq-anr daefzir shar ngae, Nawr, aqyawf-anr bif-euq mae—li-eu maqbaw-eu mqmaq maqbyav yarzir, zirbaw zirza-eu jeq bif-euq mae.

⁵ Nawq-euq kakhof-eu jeq-euq lafkhoer, Aqyawf-euq yawshaef khanqsaer huiq duidui-awr; Nawr, aqyawf-euq khoertav taqhuiq taqmanr-eu jeq hawr-eu khanqsaer biftaq-euq mae.

⁶ Nawr, aqyawf-anr mqmaq maqbyav yarzir guiqlanq biza duidui-awr; Nawq-euq maeqshi, nawr, aqyawf-anr laqkhaq yawkhav-aer bicaer-euq mae.

⁷ Sanqpaq-aq, Ya’we Miqyaer-anr ghoe-eu mirnae, Gor duidui-eu ghaq ghawqshaq gaq-eu baqda’nae, aqyawf maq nyilar-ar.

⁸ Nawq-euq aqlaf, nawq-anr kharmuir-eu deuq-anr povmawr-awr; Nawq-euq armar laf, nawq-anr byae-eu deuq-anr povmawr taef-a.

⁹ Nawr nuima paer-eu aryamq-anr, nawr, aqyawf maf-anr miqdzaq tsawqbym lof-aer bi pyeuflar-awr; Ya’we Miqyaer nuima yawkhav-aer paer-eu lafkhoer, aqyawf maf-anr myeufanr jir-awr; Khoernar-aq, miqdzaq, aqyawf maf-anr puivdzaqjir taef-a.

¹⁰ Nawr, aqyawf maf-euq zaqdeuq uvdeuq-anr mirtsaq-euq khoertav maqbi dzaeqlar-aer; Aqyawf maf-euq aryoeq-anr tsawrhaq-euq zaqdeuq-euq ghanrcae maqbi dzerlarni lavcawvjir naeq taef-a.

¹¹ Aqjeq mirnae aernar-aq, aqyawfmaf, nawq-anr yawdoer jeq janr-eu laer laeqhmq taq-euq khawf; Aqyawfmaf nae maqmuiq-eu bawqtov tovtaq-euq lof-aer maq mrbyan nya-ar.

¹² Khoermirnae, nawr, aqyawfmaf narkhan ciqpyawr-awr caevni janrnaeq taef-a; Nawr, kavpi-euq khoertav kavmyaq yurdav-awr, aqyawf maf-euq myavpyawq-anr ciqmawqnaeq taef-a.

¹³ Ya’we Miqyaer-or! Nawr ghaq khav-eu gar ciqpoeq ciqgor ma. Nga’maf car-awr nawq-euq baoq-anr jaceuq-eu ma.