Jaceuq 20 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Tiqghaqnav, Manq-anr Ghoe-eu mae

Car-eu paw sheuqghae-eu aqyuif ghaq-anr bofnaeq-euq, Daqbir-euq cardawq

¹ Nawr gardzaq garkawv yadaq-eu arnan-anr, Ya’we Miqyaer ngaeqghae naeq luf-ur. Yaqkov-euq Miqyaer-euq tsawrmyanr, nawq-anr daqpirnaeq luf-ur.

² Yawshawr Jawrduq-anr nae nawq-anr cawba-eu jeq bi keuvle-awr, Ziroq-anr nae nawq-anr ghaq bif-eu jeq bi dovle luf-ur.

³ Miqyaer, nawq nae khar damqnaeq-euq jeq-anr noeqkeuv-awr, Nawq-euq dzanpuiv-awr lawr-eu jeq-anr, nuikhanr shir-awr hageuf luf-ur. Sela.

⁴ Miqyaer, nawq-euq nuima geufmawf-eu lof-aer bifnaeq-awr, Nawq-euq bawqtov mrbyannaeq luf-ur.

⁵ Nawr bibuq-ir naeqlaf-euq mirnae, nga’maf laqkhaq caer-awr, Aqdui-euq Miqyaer-euq tsawrmyanr-euq lafkhoer, parloq parlaer katurnaeq ma! Nawr kharshar-eu yawqjeq navluf, Ya’we Miqyaer mrbyanjir naeq luf-ur.

⁶ Ya’we Miqyaer, aqyawf nae tsaqtsov-euq ghaq-anr kakhofnaeq nga laer, nymq-mr ngar siqnya lar-euq ma. Aqyawf kakhof-eu ghaq anr-eu aqyawf-euq armar laf nae, Aqyawf-euq shawr-eu mqtav mirkhanq-anr nae ngaeqghae naeq-eu mae.

⁷ Tiqghaqnav, manq lavlawq-anr ghoe-awr; tiqghaqnav, manq-anr ghoe-eu mae. Aerkhawf, aqdui-aq, aqdui-euq Miqyaer pyeuf-eu Ya’we Miqyaer-euq tsawrmyanr-anr noeqkeuv ma.

⁸ Aqyawf maf-aq, awbyav ghae-awr gacoq-euq mae. Aerkhawf, aqdui maf-aq, turlar-awr dawrcoeni yawfluf ma.

⁹ Ya’we Miqyaer-or! Kakhof naeqlaf-awq! Aqdui kur ngae, Sanqpaq, aqdui-anr ngaeqghae naeqlaf luf-ur.