Jaceuq 2 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Miqyaer Nae Tsaqtsov-euq Sanqpaq

¹ Aqjeq ghae-eu tsawrjeuq tsawrca deuq paersaef-eu nga? Aqjeq ghae-eu tsawrhaqzaq gardanr maqtsoeq-eu bawqtov tovluf-eu la?

² Mirkhanq sanqpaq deuq mrghanr-awr, uvlanr-eu tsawrhaq deuq gmler-awr, Ya’we Miqyaer hawr-eu aqyawf nae tsaqtsov-euq ghaq-anr puiq-eu laer maeqbawq mrluf-eu mae.

³ Aqyawfmaf aer-eu, “Aqyawf-euq shmrcav gheutsaev dzae-awr, Aqdui-anr paftaq-euq arcav baevlaevdzae kar-eur!”

⁴ Mq-euq khoertav nuirluf-eu ghaq uir-eu mae; Sanqpaq Miqyaer, aqyawf maf-anr haw-awr uiryoer-eu mae.

⁵ Khoernar-aq, Miqyaer, aqyawf maf-anr nuima paer-eu lafkhoer dawq ngaeqnaeq taef-a. Miqyaer nuima paer duidui-awr, aqyawfmaf tsawqguv-ir paq-aer aer-eu,

⁶ “Ngaq-euq shawr-eu gawqjawq, Ziroq gawqjawq-euq khoertav, Ngar, ngaq-euq Sanqpaq tiq ghaq tsovtaq-euq ma.”

⁷ Ngar, Ya’we Miqyaer-euq zanrtaq khoftaq bisiq bigaq ma. Ya’we Miqyaer, ngaq-anr heulof-aer aernaeq laf-euq mae, “Nawr-aq, ngaq-euq Zaqyo mae. Iqnan, ngar, nawq-euq Aqda pyeuflar-euq ma.

⁸ Ngaq-anr shar-awq, ngar, nawq-anr jeqbir lof-aer tsawrjeuq tsawrca deuq bifnaeq-awr, Mqdzer mirdzer-anr keuvni, nawq-euq myawqganq bi pyeuflar ma.

⁹ Nawr, aqyawf maf-anr shmr-euq ganqkawq nae daepav-awr, Nawr, mirtsaq oeqlanq-anr dae-eu lof-aer aqyawf maf-anr daepav daeshav-awr daemeur daeloerjir naeq taef-a. ”

¹⁰ Khoermirnae, sanqpaq deuq-or! Nymq-mr tsawrganr anrlar-awq; Mirtsaq-anr yarkhaq dar-eu deuq khawf, maeqdawq tsovdawq-anr narhaq-awq.

¹¹ Guv-eu lafkhoer Ya’we Miqyaer-euq gar mr-awr, Yawdzuq gan’gan-aer laqkhaq caer-awq.

¹² Zaqyo-anr maeqsaw saw-awq, maqngeur nar-aq, aqyawf nuima paerlar-awr, Nawr, garma-anr yacawv-ir-eu baw-mr. Aqjeq mirnae aernar-aq, aqyawf-euq nuipaer yawkawr-aer keuvle nya-eu mae. Aqyawf-anr ghoe-eu tsawrhaq dawqtawvluf, guiqlanq huiq-eu mae.