Jaceuq 19 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Miqyaer-euq Lafzar

Car-eu paw sheuqghae-eu aqyuif ghaq-anr bofnaeq-euq, Daqbir-euq cardawq

¹ Mqtav mirkhanq, Miqyaer-euq yawshaef khanqsaer dzawrgaq naeqluf-awr, Mq-aq, aqyawf-euq lafzar bimawr naeqluf-eu mae.

² Arnan tiqnan sair tiqnan dawqngaeq ngaeq duidui luf-awr, Uqcif tiqmir sair tiqmir siqnya-eu tsawrganr panmaeq naeqluf-eu mae.

³ Dawq maqzmq-aer, dawqbav maqbav-eu uqtaf, Aqyawf maf-euq tersar manr-eu maqya gaq-a.

⁴ Aerkhawf, aqyawf maf-euq tersar mirkhanq doeni irkhawqghae luf-awr, Aqyawf maf-euq dawq mqdzer mirdzer irkeuv luf-eu mae. Miqyaer nae mq-euq lafkhoer nanrma-anr saeqghawv ghawvnaeq-euq mae.

⁵ Yoshuif, aqyawf-euq kuvlawv-anr nae dovlar-eu lof-aer hawr-eu, Ghaq khav-eu tsawrhaq caevcae cae-eu lof-aer laqkhaq caer-eu mae.

⁶ Nanrma, mqdzer mirdzer tiq pyawq-anr nae dovlar-awr, Mqdzer mirdzer yawqpyawq yawq-anr irjawq ghae-eu mae. Aqyawf-euq yawlanr-anr nae tiqjeq-iq maq jawrzaf nya-a.

Ya’we Miqyaer-euq Zanrdawq

⁷ Ya’we Miqyaer-euq zanrdawq-aq, byan duidui-awr, nuima saflar-anr lavmuiq lavpar-eu mae. Ya’we Miqyaer-euq dawqdzawr-aq, yawduq baw-awr maqdzaw-euq zaq-anr tsawrganr bi anrlar-eu mae.

⁸ Ya’we Miqyaer-euq zanrtaq khoftaq-aq, tsaq-awr nuima-anr laqkhaq bi caerlar-eu mae. Ya’we Miqyaer-euq zanrdawq khofdawq-aq, shawrjaevni ghae-awr, myavnuiv-anr bi mawrshawr lar-eu mae.

⁹ Ya’we Miqyaer-anr guv-eu jeq-aq, shawr-awr mqmaq maqbyav yarzir gmq-eu mae. Ya’we Miqyaer yarkhaq dar-eu jeq-aq, dawrcoeni ghae-awr, dawqtawvluf tsaq-awr dawr-eu mae.

¹⁰ Shuir navmaqtser muiq duidui-eu, shuir navmaqtser geufmawf paq-aer ghae-awr, Byaqyav-anr nae yoerdov lef-eu byaquir navmaqtser coerdzaeq-eu mae.

¹¹ Khoeruqtaf, dawq heudeuq-euq baqda’nae nawq-euq kuirlaf zaqkhav, noeqnya yanrnya lar-awr, Dawq heudeuq-anr mrcaw-eu mirnae huiq-eu mrpoeq lafsawq za-eu mae.

¹² Yawqha-euq yawlaeq ghovshaw nya-eu aqsur ghaq jawr-eu la? Zaftaq-euq yawbanq-anr nae ngaq-anr tsiqshawr naeqlaf-awq.

¹³ Nawq-euq kuirlaf zaqkhav, maqyanrni iqbax mr-eu gar nae gheukhof naeqlaf-awr, Iqbax nae ngaq-anr taqbi uvlanr naeqlaf. Khoernar-aq, ngar aerkhar maqza-eu tsawrhaq pyeuf-awr, Huiq-eu yawbanq yawlaeq maqmr-eu tsawrhaq pyeuf taef-a.

¹⁴ Ngaq-euq logur pyeuf-awr, Ngaq-anr kakhof-eu Ya’we Miqyaer-or! Ngaq-euq khaqmae-anr nae ngaeqdov lef-euq dawq, Ngaq-euq nuima-euq lafkhoer dzardziv dziv-euq jeq, Nawq-euq maeqshi, nawr nuima tsaq-eu jeq bipyeuf law.