Jaceuq 18 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Ngaq-euq Ghaq Pyeuf-eu Miqyaer

Daqbir, Sawrluv-euq aqlaf hawr-eu aqyawf-anr muir-eu tsawrhaq dawqtawv luf-euq aqlaf-anr nae Ya’we Miqyaer nae bibuq-ir ngae nan, Ya’we Miqyaer-euq kuirlaf pyeuf-eu Daqbir nae Ya’we Miqyaer-anr ngaeqnaeq-euq, car-eu paw sheuqghae-eu aqyuif ghaq-anr bofnaeq-euq, Daqbir-euq cardawq. Aqyawf aer-eu:

¹ Ngaq-euq ghaq pyeuf-eu, Ya’we Miqyaer-or! Ngar, nawq-anr gaq mir-a.

² Ya’we Miqyaer-aq, ngaq-euq logur, ngaq-euq lanrlof nymrzif hawr-eu ngaq-anr bibuq-ir-eu ghaq pyeuf-awr, Ngaq-euq Miqyaer, ngaq-euq logur hawr-eu ngar ghoeduq pyeuf-eu uqtaf, Ngaq-euq daeqdaqduq, ngaq-anr kakhof-eu uqcoer hawr-eu ngaq-euq zifduq pyeuf-eu mae.

³ Ngar, jaceuq paq-aer geux-eu Ya’we Miqyaer-anr kur ngae, Ngaq-anr muir-eu deuq-anr nae yabuq-ir taef-a.

⁴ Shir-eu cavkhmr, ngaq-anr gheujawqle taq-awr, Maqshawr-eu jeq-euq irjeuq, ngaq-anr lavguv luf-eu mae.

⁵ Shir-eu mirkhanq-euq cavkhmr, ngaq-anr gheupaf-awr, Shir-eu jeq-euq lanrju, ngaq-euq maeqshi khmrtaq-euq mae.

⁶ Ngar guv-awr gav-eu lafkhoer Ya’we Miqyaer-anr kur-awr, Ngaq-euq Miqyaer-anr gurgaq-eu ma. Aqyawf, aqyawf-euq uqduq tanqnymr nymrma-anr jawr-eu, ngaq-euq tersar gaq-awr, Ngar gur-eu khoer, aqyawf-euq naqbawr-anr gaqkeuv ler-euq mae.

⁷ Khoernar-aq, aqyawf nuima paer-eu mirnae, Gawqdur-euq dawqpaeq duqpur khawf, luvluv-aer ghaelar-awr nyinyi-aer ghaelar-euq uqtaf, Mirtsaq tanqkhawr khawf nyaenyae-aer ghaelar taq-euq mae.

⁸ Aqyawf-euq narmaerbanq-anr nae uqkhoeq dovle-awr; Aqyawf-euq khaqmae-anr nae puivdzaqjir nya-eu miqdzaq miqlmr dovle-awr, khaqgheuq deuq-anr dofler-euq mae.

⁹ Aqyawf, mq ngawqghm-awr zafkale ngae, Yawzanr-aq, aqyawf-euq aqkuir-euq uqmov jav-eu mae.

¹⁰ Aqyawf, Jeqlurbeq-anr dziq-awr zaw-eu mae; Aqyawf, jaqlaer-euq aqdanr-euq khoertav zaw-eu mae.

¹¹ Aqyawf, yawzanr-anr aqyawf-euq jawrzafduq bipyeuf-awr, Mq-anr navcawfni ircuf tiqbyan danq-eu mqdmr-aq, aqyawf-euq tiqjawq saeqghawv bipyeuf-euq mae.

¹² Aqyawf-euq maeqshi byacaevni yawshaef bya-eu gar nae, Uqyaer arsiq hawr-eu miqdzaq miqdziv-euq mqdmr cantsaev lef-eu mae.

¹³ Ya’we Miqyaer, mq-anr nae mqjeq jeq-awr, Gor duidui-eu ghaq, uqyaer arsiq hawr-eu miqdzaq miqdziv-anr ghoe-awr, Dawqtmr mr-eu tersar bi gaqkeuv le-euq mae.

¹⁴ Aqyawf kavmyaq beuvdovghae lef-awr, muir-eu deuq-anr taebyav-euq mae. Aqyawf, mqmyawf yawkhav-aer myawfmyawf-aer, aqyawf maf-anr lavbanq lavlanr naeq-euq mae.

¹⁵ Ya’we Miqyaer-or! Nawr lmqnaeq ngae, Nawq-euq narmaer narsaf bawghae lef-awr, Iqmalavshav dawqdan mawrlar jir-awr, mirtsaq-euq dawqpaeq duqpur byacaevni javluf-eu mae.

¹⁶ Aqyawf yawgor-anr nae aqlaf cawqja lef-awr, Ngaq-anr nyaeftaeq-awr, myaq duidui-eu ircuf-euq lafkhoer nae, Ngaq-anr gheudov naeqlaf-euq mae.

¹⁷ Ghaq khav-awr ngaq-anr muir-eu deuq hawr-eu ngaq-anr byae-eu deuq-anr nae, Aqyawf, ngaq-anr bibuq-ir naeqlaf-euq mae. Aqjeq mirnae aernar-aq, aqyawf maf-aq, ngaq-euq gharduq ghaq ardzaeq-aer khav-eu mae.

¹⁸ Ngar shaqzanq daqluf-eu arnan aryamq-euq lafkhoer, aqyawfmaf, ngaq-anr caele-euq mae. Aerkhawf, Ya’we Miqyaer, ngaq-anr ngaeqghae naeqlaf-euq mae.

¹⁹ Aqyawf, ngaq-anr jerloni ghae-eu jawrduq-anr sheuqdov naeqlaf-euq mae; Aqyawf, ngaq-anr nuikhanr shir-eu mirnae, ngaq-anr bibuq-ir naeqlaf-euq mae.

²⁰ Ngar tsaq-awr dawr-eu gar geuxni, Ya’we Miqyaer, ngaq-anr mrpoeq lafsawq bifnaeq laf-awr; Ngaq-euq aqlaf shawr-eu gar tsaqni, ngaq-anr yawmuiq jeq janrkhof naeqlaf-eu mae.

²¹ Aqjeq mirnae aernar-aq, ngar, Ya’we Miqyaer-euq garma-anr can’ghae laf-awr, Ngar yawcawv jeq maqmr-aer, ngaq-euq Miqyaer-anr nae maqghawq-ir-aq.

²² Aqjeq mirnae aernar-aq, aqyawf nae dartsaev-euq jeq dawqtawvluf ngaq-euq maeqshi jav-awr, Ngar, aqyawf-euq zanrtaq khoftaq-anr maq daeqdzae haw-aq.

²³ Ngar, aqyawf-euq maeqshi aerkhar maqza’ni daef-awr, Yawlaeq yawca maqmrni yanr-euq ma.

²⁴ Khoer baqda’nae, aqyawf-euq maeqshi ngaq-euq aqlaf shawr-eu gar tsaq-awr, Ngar tsaq-awr dawr-eu gar tsaqni, Ya’we Miqyaer, ngaq-anr janrtsaq naeqlaf-euq mae.

²⁵ Ghawqshaq gaqnya-eu tsawrhaq-anr, nawr ghawqshaq gaqnya-eu bimawr-awr; Aerkhar maqza-eu tsawrhaq-anr, nawr-aq, aerkhar maqza nga laer bimawr-eu mae.

²⁶ Nuima shawr-eu tsawrhaq-anr, nawq-euq nuima shawr-eu gar bimawr-awr; Nuighof baw-eu tsawrhaq-anr, nawq-euq yawghof jeq bimawr-eu mae.

²⁷ Aqjeq mirnae aernar-aq, nawr, nuinanq nuiyu anr-eu tsawrhaq-anr bibuq-ir-awr, Nawr, nuima huiq-awr haw-eu deuq-anr gheuka naeq-euq mae.

²⁸ Nawr, ngaq-euq tsirkhmq keuqdof naeqlaf-eu mirnae; Ngaq-euq Miqyaer pyeuf-eu Ya’we Miqyaer, ngaq-euq yawzanr-anr yawshaef bi byalar-eu mae.

²⁹ Khoermirnae, ngar, nawq-anr ghoe-awr, guirmaf-anr nae caevpavdov nya-awr; Ngar, ngaq-euq Miqyaer-anr ghoe-awr nae meuqlanr tsawqdzeur nya-eu ma.

³⁰ Miqyaer heughaq-aq, aqyawf-euq garma byan duidui-awr; Ya’we Miqyaer-euq dawq-aq, aertaq-euq lof-aer tsaq nga laer mawrlar-eu mae. Aqyawf-aq, aqyawf-anr ghoe-eu deuq-euq gharduq, daeqdaqduq pyeuf-eu mae.

³¹ Ya’we Miqyaer maqngeur nar-aq, Miqyaer nuighaq aqsur ghaq la? Aqdui-euq Miqyaer maqngeur nar-aq, logur pyeuf-eu aqsur ghaq la?

³² Ngaq-anr ghaq bidm naeqlaf-awr, Ngaq-euq garma bimuiq bibyan naeqlaf-eu ghaq-aq, Miqyaer mae.

³³ Aqyawf, ngaq-euq aqkuir-anr, khaqtsaev-euq aqkuir lof-aer janrdur naeqlaf-awr; Ngaq-anr jawrduq yawgor-anr bijawr naeqlaf-euq mae.

³⁴ Aqyawf, ngaq-euq aqlaf guir mrnya’ni maeqnaeq laf-euq mirnae; Ngaq-euq lafdu guiqshuir kavpov ngofdav nya-eu ma.

³⁵ Nawr, ngaq-anr nawq-euq kakhof-eu daeqdaqduq khawf bifnaeq laf-euq mae; Nawq-euq armar laf nae ngaq-anr tovtur naeqlaf-awr; Nawr nanqyuni janrnaeq laf-euq mirnae, ngar huiqlar nya-euq ma.

³⁶ Ngar canluf-eu ngaq-euq cankawv, nawq nae lavjer naeqlaf-euq mirnae; Ngaq-euq aqkuir maq nawqjur-aq.

³⁷ Ngar, ngaq-anr muir-eu deuq-anr cantae-awr taemi-euq ma; Aqyawfmaf maq cawvjir-euq khoerkeuvni, ngar narkhan paw maq ghofkhoflar.

³⁸ Ngar, aqyawf maf-anr lavnar naeq-euq ma. Khoermirnae, aqyawfmaf maqpar turlarnya mae; Aqyawfmaf, ngaq-euq aqkuir-euq uqmov galuf-eu mae.

³⁹ Nawr, ngaq-anr guirdeuv bideuv-eu gharduq, ghaq bidm naeqlaf-awr; Nawr, ngaq-anr tur-awr muirlar-eu deuq-anr, ngaq-euq lafov bi gabyav lar-euq mae.

⁴⁰ Nawr, ngaq-anr muir-eu deuq-euq kawqlanr khawf, ngaq-anr bifnaeq laf-euq mirnae; Ngar, ngaq-anr byae-eu deuq-anr lavcawv nya-eu ma.

⁴¹ Aqyawfmaf gur-eu khawf, bibuq-ir-eu tiqghaq-iq maqjawr-a; Ya’we Miqyaer-anr kur-eu khawf, aqyawf oq maq toqnaeq-a.

⁴² Khoernar-aq, ngar, aqyawf maf-anr jaqlaer nae bi bawdzaeni, khaqlaer lof-aer diqnmv naeq-euq ma. Ngar, aqyawf maf-anr mirtsaq lof-aer, garma-anr shaevdzae-euq ma.

⁴³ Nawr, ngaq-anr mirkhanqzaq caedzaq-eu gar nae bibuq-ir naeqlaf-awr; Nawr, ngaq-anr tsawrjeuq deuq-euq uqduq bi geufnaeq laf-euq mae. Ngar maq siqnya-eu tsawrjeuq khawf, ngaq-anr gar mrnaeqlaf taef-a.

⁴⁴ Aqyawfmaf, ngaq-euq garkawv yagaq-euq naeq-aer, ngaq-euq dawq narhaq geuf-awr; Aqcawq tsawrjeuq, ngaq-euq maeqshi awbyav lar-eu mae.

⁴⁵ Aqcawq tsawrjeuq nuima gaka jir-awr, Aqyawf maf-euq caevzafduq-anr nae, guv duidui-eu lafkhoer dovle-eu mae.

⁴⁶ Ya’we Miqyaer daefluf mae! Ngaq-euq logur-anr jaceuq ma! Ngaq-anr kakhof-eu Miqyaer-anr ciqhuiq ciqmanr ma.

⁴⁷ Miqyaer-aq, ngaq-euq gharduq lafpov povkhof naeq-awr; Aqcawq tsawrjeuq, ngaq-euq lafov bijawrni janr-eu ghaq pyeuf-eu mae.

⁴⁸ Aqyawf, ngaq-anr muir-eu deuq-anr nae bibuq-ir naeqlaf-euq mae. Nawr, ngaq-anr muirlar-eu deuq-euq khoertav, ciqgor naeqlaf-awr; Nawr, ngaq-anr coeq-awr deuq-eu jeq mr-eu tsawrhaq-anr nae bibuq-ir naeqlaf-euq mae.

⁴⁹ Khoermirnae, Ya’we Miqyaer-or! Ngar, nawq-anr guiqlanqhuiq ma laer aer-eu ma; Mirkhanq tsawrjeuq deuq-euq ghanrcae, Nawq-euq tsawrmyanr-anr car-awr jaceuq-eu ma.

⁵⁰ Aqyawf, aqyawf-euq sanqpaq-anr yawmuiq-aer bibuq-ir-awr; Aqyawf nae tsaqtsov-euq tsawrhaq-anr ghawqshaq gaq-eu jeq bimawr-eu mae. Daqbir hawr-eu aqyawf-euq zaqdeuq-anr, mqmaq maqbyav yarzir biza taef-a.