Jaceuq 17 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Miqyaer-euq Aqdanr-euq Uqmov Caevzaf-eu

Daqbir-euq guiqlanq shardawq

¹ Ya’we Miqyaer-or! Dawr-awr tsaq-eu jeq shar-eu gar narhaq naeqlaf-awq. Ngar shar-eu dawq-anr narhaq naeqlaf. Jaqmyawf maershuir maqanr-eu ngaq-euq maeqluq-euq guiqlanq shardawq-anr, nawq-euq naqbawr ciqkhmr naeqlaf-awq!

² Ngaq-anr japir-eu jeq, nawq-euq maeqshi nae bi dovle-awq! Nawq-euq myavnuiv tsaq-eu jeq-anr hawmawr naeqlaf!

³ Nawr, ngaq-euq nuima-anr pyaevtserhaw ngae, Uqcif paw ngar jawr-eu gar oe-awr, Ngaq-anr tsermrhaw ngae, maqtsaq-eu jeq anr-eu maqmawr-aq. Ngar, ngaq-euq khaqmae nae yawbanq yawlaeq jeq maqngaeq laer noeqtsov taq-euq ma.

⁴ Tsawrhaqzaq mr-awr shar-eu jeq-anr tafler-awr nae, Nawq-euq maeqluq-anr nae dovle-euq dawq-anr ghoe-awr nae, Ngar coeqler civler-eu garma-anr jawdzeur nya-euq ma.

⁵ Ngaq-euq kuirtof, nawq-euq garma-anr zifdanni can-awr, Ngaq-euq aqkuir cirjur maqjur-ir haw-aq.

⁶ Nawr, ngaq-anr oq toqnaeq laf-eu mirnae, Miqyaer-or! Ngar, nawq-anr kur-eu ma. Nawq-euq naqbawr, ngar jawr-eu paw ciqkhmr naeqlaf-awr, Ngaq-euq dawq narhaq naeqlaf-awq.

⁷ Aqcawq tur-awr muirlar-eu mirnae, Nawq-euq lafkhoer caevzaf lar-eu tsawrhaq-anr, Armar laf nae kakhof-eu ghaq-or! Nawq-euq zanqler paq-aer muiq-eu ghawqshaq gaq-eu jeq bimawr naeqlaf-awq.

⁸ Nawr, nawq-euq myavnuiv myavsiq-anr hawpir-eu lof-aer, Ngaq-anr hawpir naeqlaf-awq. Ngaq-anr, nawq-euq aqdanr-euq narshmr-euq uqmov, bi caevzaf naeqlaf-awq.

⁹ Ngaq-anr coeqlar deuqlarni mr-eu tsawrcawv hawr-eu, ngaq-anr lavsaef mawf-awr, Muir-eu laer gajawq taq-euq deuq-anr nae, Ngaq-anr bibuq-ir naeqlaf-awq.

¹⁰ Aqyawfmaf, nuima piqtaeq-awr ghawqshaq gaq-eu jeq maqanr-aer, Aqyawf maf-euq khaqmae-aq, janrghae-eu dawq ngaeq-eu mae.

¹¹ Nymq-mr, nga’maf kuirtof ciqghae-eu paw, Aqyawfmaf gajawqlef taq-awr, nga’maf-anr mirtsa daeqcoq ghae-eu laer myavnuiv hawtsov taq-euq mae.

¹² Aqyawf gheupav gheushavlar mawf duidui-eu arlaqjaqshir lof-aer dur-awr, Dzurzaf taq-euq huiqlov lar-euq arlaqjaqshir-anr dur-eu mae.

¹³ Ya’we Miqyaer-or! Turlar-awq! Aqyawf-anr ciqdaq-awr, aqyawf-anr deuvghaq-awq! Tsawrcawv-anr nae ngaq-euq nuima saflar-anr, nawq-euq micaer nae bibuq-ir naeqlaf-awq.

¹⁴ Ya’we Miqyaer-or! Nawq-euq aqlaf nae Heulof-aer ghae-eu tsawrhaqzaq, heuzir-euq lafkhoer shaqbymr za-euq mirtsaqzaq-anr nae bibuq-ir naeqlaf-awq. Nawq nae aqyawf maf-euq uqmav-anr pyurshuir myawqganq tiqbyanni shardawv naeq-awr, Aqyawfmaf, yawqha-euq zaqdeuq-anr nuikhanr shir-eu uqtaf, Aqyawf maf-euq zaq-euq gharduq myawqganq zanqnaeq yaf-euq mae.

¹⁵ Aerkhawf, ngar lawnmr-aq, tsaq-awr dawr-eu lafkhoer nawq-euq myavpyawq-anr ya’mawr ma. Ngar noeqlar ngae, nawq-anr dur-eu shaevdzeuf za-euq mirnae, ngaq-euq nuima tmqjawvni ghae taef-a.