Jaceuq 16 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Ngaq-euq Muiq-eu Shaqbymr

Mirtam , Daqbir-euq cardawq

¹ Miqyaer-or! Ngaq-anr hawpir naeqlaf-awq. Ngar, nawq-euq lafkhoer caevzaflar ma.

² Ngar, Sanqpaq Miqyaer-anr heulof-aer aer-eu ma, “Nawr-aq, ngaq-euq Ya’we Miqyaer ma. Nawr maqngeur nar-aq, ngar yawmuiq nuijeq tiqjeq-iq maqjav.”

³ Mirtsaq-euq khoertav jawr-eu tsawrshawr deuq-aq, muiq-awr jaq-eu mae. Ngar, aqyawf maf-anr laqkhaqcaer nya.

⁴ Miqyaer nuideuq-anr yawkawr-aer cantae-eu deuq-euq khoertav, keuvle-eu ghawqshaq-aer ghae-eu jeq myaqlar taef-a. Ngar, aqyawfmaf lof-aer shiq shaevka-awr dawr-eu, lawr-eu jeq maqlawr, Ngaq-euq maeqluq, aqyawf maf-euq miqyaer-euq tsawrmyanr maq ngaeqkeuv.

⁵ Ya’we Miqyaer-or, nawr-aq, ngaq-euq jeqbir-euq shaqbymr hawr-eu ngaq-euq khmqmaq ma. Nawr, ngaq-anr of-eu shaqbymr hawsav naeqlaf-euq mae.

⁶ Ngaq-euq mirkaq-aq, nuikhanr shirlar paq-aer ghae-eu jawrduq-anr gatsaq lar-awr, Aqdir ya’aer nar-aq, ngar muiq-eu jeqbir za-euq ma.

⁷ Ngar, ngaq-anr maeqbawq bifnaeq laf-eu Ya’we Miqyaer-anr jaceuq ma. Uqcif paw khawf, ngaq-euq nuima, yawqhar yawqha maeqdawq bifluf-eu mae.

⁸ Aqmyanluf, ngar, Ya’we Miqyaer-anr ngaq-euq maeqshi bijawr ma. Aqyawf, ngaq-euq armar paw jawr-eu mirnae, ngar nyinyi-aer maq ghaelarni zif-eu ma.

⁹ Khoermirnae, ngaq-euq nuima nuikhanr shir-awr, Ngaq-euq lafkhoer kharanr-eu jeq laqkhaq caer-eu uqtaf, Ngaq-euq shiqshaq khawf, sarlaevni daefluf-eu ma.

¹⁰ Aqjeq mirnae aernar-aq, nawr, ngaq-euq saflar-anr shir-eu mirkhanq-anr maq byaerdzae yaf-aer, Nawq-euq Yawshawr ghaq-anr buf-ir shov-ir-eu gar maqbi keuv-a.

¹¹ Nawr, ngaq-anr daef-eu jeq bif-eu garma toeqmaeq naeqlaf-euq mae; Nawq-euq maeqshi laqkhaq caer-eu jeq byan-awr; Nawq-euq armar laf-anr, mqmaq maqbyav yarzir lurgha caergha-eu jeq jav-eu mae.