Jaceuq 15 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Miqyaer-euq Dawqpae Jawrnya-eu Tsawrhaq

Daqbir-euq cardawq

¹ Ya’we Miqyaer-or! Nawq-euq saqpar saeqghawv-euq lafkhoer aqsur ghaq yajawr-eu la? Nawq-euq shawr-eu gawqjawq-anr aqsur ghaq jawrnya-eu la?

² Dawrcoeni can-awr, tsaq-awr dawr-eu jeq mr-eu uqtaf, Yawqha-euq nuima-euq lafkhoer yawtsaq yawdawr ngaeq-eu tsawrhaq,

³ Aqyawf-euq maeqlar nae narkhan paw maq jabu maq jadoer-aer, Yawqha-euq dawqpae jawr-eu tsawrhaq-anr yawdoer jeq maqmr-eu uqtaf, Yawqha-euq dawqpae jawr-eu tsawrhaq-anr dawqdoer maqngaeq-eu tsawrhaq,

⁴ Aqyawf-euq myavnuiv-aq, yawdoer yawcawv tsawrhaq-anr hawdoer-awr, Ya’we Miqyaer-anr guv-eu tsawrhaq-anr taqhuiq-eu uqtaf, Yawqha nae kamq-euq jeq, yawqha-anr deuqlar-eu khawf maqpov maq parlar-eu tsawrhaq,

⁵ Jirjeuq ardzaeq yurdzaq-eu laer pyur maq bifdov ghae-aer, Yawlaeq maqanr-eu tsawrhaq-anr coeqlerni mr-eu gharduq lafnmf nmflar-eu gar maq hageuf-eu tsawrhaq yajawr-eu mae. Heudeuq mr-eu tsawrhaq-aq, tiqjawr-iq nyinyi-aer maq ghaelarni zifnya taef-a.