Jaceuq 149 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Cardawq Yawshuif Nae Jaceuq-awq

¹ Haleluya! Ya’we Miqyaer-anr cardawq yawshuif carnaeq-awq. Tsawrshawrzaq uiqler taq-awr jawr-eu gar, aqyawf-anr jaceuq-awq.

² Aqyawf maf-anr bae-euq ghaq-euq lafkhoer, Irsaqleqlav laqkhaq bicaer luf-ur; Aqyawf maf-euq sanqpaq-euq baqda’nae, Ziroq-euq zaqdeuq bi lurgha bi caergha luf-ur.

³ Aqyawfmaf garnyae nyae-awr aqyawf-euq tsawrmyanr-anr jaceuq luf-ur; Aqyawfmaf, deur-mq hawr-eu tanqzaq zmq-awr, Aqyawf-anr carcar-aer jaceuq luf-ur.

⁴ Aqjeq mirnae aernar-aq, Ya’we Miqyaer-aq, Aqyawf-euq tsawrhaq-anr nuikhanr shir-eu mae; Aqyawf, nuinanq nuiyu anr-eu deuq-anr kakhof-eu jeq nae, Hawmuiq paq-aer lavmuiqnaeq taef-a.

⁵ Tsawrshawrzaq, yawshaef khanqsaer-euq lafkhoer laqkhaqcaer luf-ur; Yawqha-euq yufzar-anr jawr ngae, Tersar yawkhav-aer bi cardovlaf luf-ur.

⁶ Aqyawf maf-euq aqlaf-anr miseuq nyiq paw tav-eu micaer baf-awr, Aqyawf maf-euq khaqmae, Miqyaer-anr yawkhav-aer jaceuq luf-ur.

⁷ Aqcawq tsawrjeuq-anr janrdoerkhof naeq-awr, Tsawrhaqzaq-anr darnaeq-eu gharduq,

⁸ Aqyawf maf-euq sanqpaq-anr shmrcav nae paf-awr, Aqyawf maf-euq tsawrhuiq tsawrma-anr, Shmr-euq kuirnyaef lafnyaef nae nyaef-eu gharduq;

⁹ Aqyawf maf-anr boftaq-euq yarkhaq dar-eu jeq bi pyeuflar-eu gharduq; Heu-aq, aqyawf-euq tsawrshawr dawqtawv luf-anr taqhuiq-eu jeq pyeuf-eu mae. Haleluya!