Jaceuq 148 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Mqmir, Miqyaer-anr Jaceuq

¹ Haleluya! Mq-anr jawr-awr nae Ya’we Miqyaer-anr jaceuq-awq; Yawgor-anr jawr-awr nae aqyawf-anr jaceuq-awq!

² Aqyawf-euq mqtav ghaqkhaer dawqtawvluf, aqyawf-anr jaceuq-awq; Aqyawf-euq guirmaf dawqtawvluf, aqyawf-anr jaceuq-awq!

³ Nanrma hawr-eu bala, aqyawf-anr jaceuq-awq; Yawshaef-euq aqguir dawqtawvluf, aqyawf-anr jaceuq-awq!

⁴ Nawmaf, mqdeuq-euq khoertav jav-eu ircuf hawr-eu, Mqdeuq-euq khoertav jav-eu mqdeuq, aqyawf-anr jaceuq-awq!

⁵ Heudeuq dawqtawvluf, Ya’we Miqyaer-euq tsawrmyanr-anr jaceuq luf-ur. Aqjeq mirnae aernar-aq, Aqyawf, dawq bif-awr heudeuq-anr bae-euq mae.

⁶ Aqyawf, heudeuq-anr mqmaq maqbyav yarzir, Li-eu maqbaw-aer zifni lavzif taq-awr, Aqyawf nae maqbyov-ir nya-eu zanrtaq khoftaq biftaq-euq mae.

⁷ Mirtsaq-euq khoertav jawr-eu deuq, Ya’we Miqyaer-anr jaceuq-awq! Nawmaf, huiq-awr manr-eu iqmalavshav-euq jeqzaq, Hawr-eu yawnaf-anr kharjawr-eu jeq khawf jaceuq-awq.

⁸ Miqdzaq hawr-eu uqyaer arsiq khawf, Ngaer hawr-eu mqdmr deuq khawf; Aqyawf-euq dawq mrbyan-eu mqjeq jaqlaer khawf jaceuq-awq.

⁹ Gawqjawq hawr-eu gawqdur dawqtawvluf; Arsiq arbawr hawr-eu siqdaq miqshuq dawqtawvluf khawf jaceuq-awq.

¹⁰ Bawrtsanq-euq jeqzaq hawr-eu cutaq-euq jeqzaq dawqtawvluf khawf, Mirtsaq-anr joejoe-aer can-eu jeq hawr-eu, Zaw-eu arjir deuq khawf jaceuq-awq.

¹¹ Mirkhanq-euq sanqpaq deuq hawr-eu tsawrhaqzaq dawqtawvluf khawf; Mirkhanq-euq dzoeqda hawr-eu yarkhaq dar-eu dawqtawvluf khawf, jaceuq-awq.

¹² Zaqmiq aqbur hawr-eu zaqyo aqli zaqguq dawqtawvluf khawf, Mawq-ir-euq tsawrhaq hawr-eu zaq yawnyir deuq khawf jaceuq-awq.

¹³ Aqyawfmaf, Ya’we Miqyaer-euq tsawrmyanr-anr jaceuq luf-ur. Aqyawf-euq yawshaef khanqsaer-aq, Mq hawr-eu mir navmaqtser gordzaeq-eu mirnae, Aqyawf-euq tsawrmyanr-anr taef-aer ciqpoeq ciqgor-eu tsaq mae.

¹⁴ Aqyawf, aqyawf-euq tsawrhaq deuq-euq, ghaq-euq uqcoer ciqgor-eu mae; Aqyawf-euq tsawrshawr dawqtawvluf—aqyawf-euq dawqpae jawr-eu tsawrhaq, Irsaqleqlav tsawrhaq khawf, aqyawf-anr jaceuq luf-ur. Haleluya!