Jaceuq 147 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Miqyaer-anr Jaceuq-eu Yawmuiq Mae

¹ Haleluya! Aqdui-euq Miqyaer-anr car-awr jaceuq-eu-aq yawmuiq mae. Jaceuq-eu-aq, tsaqler-awr nuikhanr shirlar-eu mae.

² Ya’we Miqyaer, Yeqlursaqlaeq tsovmuiq-awr, Aqyawf, bi nyaefbyov ghae-euq Irsaqleqlav-anr sheuquiqlaf luf-eu mae.

³ Aqyawf, nuima tsawqpav-euq deuq-anr lavtaq naeq-awr, Aqyawf maf-euq marnar markhaeq-anr lanrcuf naeq-eu mae.

⁴ Aqyawf, aqguir armyav siq bitsaeq-eu laer sawxduq taq-awr, Aqyawf nae aqguir yawqsiq navluf-anr kurmyanr biftaq-euq mae.

⁵ Aqdui-euq Sanqpaq Miqyaer-aq, huiq-awr manr-eu uqtaf, Baoq anr-awr ghaq khav-eu mae. Aqyawf-aq, yawdui maqbawni ghovshaw nya-eu mae.

⁶ Ya’we Miqyaer-aq, nuinanq nuiyu anr-eu deuq-anr ciqgor naeq-awr; Tsawrcawv deuq-anr mirtsa biqkaghae naeq-eu mae.

⁷ Ya’we Miqyaer-anr carnaeq-awr, Aqyawf-euq guiqlanq-anr jaceuq-awq! Deur-mq diq-awr aqdui-euq Miqyaer-anr carnaeq-awr jaceuq-awq.

⁸ Aqyawf, mq-anr mqdmr nae gheutsanq-awr, Mirtsaq-euq gharduq uqyaer laeqhmq-awr bi yaerle-eu lafkhoer, Gawqjawq-anr yarmof bi daeflar-eu mae.

⁹ Aqyawf, bawrtsanq-euq jeqzaq-anr hawr-eu, Jeqshir khaqdzer-euq zaqdeuq manr ngae, Dzaqdzaq dawrdawr bifnaeq-eu mae.

¹⁰ Aqyawf, manqpaq, ghaq khav-eu gar laqkhaq caer-eu maqngeur-aer, Aqyawf, tsawrhaq-euq aqkuir-anr nuikhanr shir-eu maqngeur-a.

¹¹ Ya’we Miqyaer, aqyawf-anr guv-eu tsawrhaq deuq-anr nuikhanr shir-awr, Aqyawf ghawqshaq gaq-eu jeq-anr, Noeqtmq-eu tsawrhaq deuq-anr nuikhanr shir-eu mae.

¹² Yeqlursaqlaeq-or! Ya’we Miqyaer-anr jaceuq-awq! Ziroq-or! Nawq-euq Miqyaer-anr jaceuq-awq!

¹³ Aqjeq mirnae aernar-aq, Aqyawf, nawq-euq lanrkhaeq-euq ghovkaf-anr lavzif-awr, Aqyawf, nawq-euq lafkhoer jawr-eu, Nawq-euq zaqdeuq-anr guiqlanq bif-euq mae.

¹⁴ Aqyawf, nawq-euq mirkaq-anr, tsaqler dzoerler-eu jeq bijav-awr; Nawq-anr muiq duidui-eu dzaqla ghovcaer tiqlof bifnaeq-eu mae.

¹⁵ Aqyawf, mirtsaq tanqkhawr-anr aqyawf-euq khaerdawq khaerghae ngae; Aqyawf-euq dawq yawkhav-aer caevkawr nya-eu mae.

¹⁶ Aqyawf, yawr-euq cafhm lof-aer ghae-eu ngaer bif-awr; Aqyawf khaqlaertsar lof-aer ceuqgav byavkhawq ghae-eu mae.

¹⁷ Aqyawf, khaqlo lozaq lof-aer, aqyawf-euq uqyaer arsiq byavka lef-awr, Aqyawf nae pyaeqghae lef-euq yawtsaef-anr aqsur ghaq daqcoer-eu.

¹⁸ Aqyawf, aqyawf-euq dawq khaerdovghae ngae, khoerdeuq biguir-ir-awr, Aqyawf, jaqlaer bi bawlar-awr ircuf bi yoerle-eu mae.

¹⁹ Aqyawf, Yaqkov-anr aqyawf-euq dawq dawqdzawr mrnaeq-awr, Irsaqleqlav-anr aqyawf-euq zanrtaq khoftaq, Hawr-eu yarkhaq dar-eu jeq dzawrnaeq-euq mae.

²⁰ Aqyawf, aqcawq tsawrjeuq-anr heulof-aer maq janrnaeq-aq; Aqyawfmaf, Miqyaer-euq yarkhaq dar-eu jeq-anr maq siqnya-a. Haleluya!