Jaceuq 146 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Nuima-or, Ya’we Miqyaer-anr Jaceuq-awq

¹ Haleluya! Ngaq-euq nuima saflar-or! Ya’we Miqyaer-anr jaceuq-awq!

² Ngar yawdaef daefluf ngae, Ya’we Miqyaer-anr jaceuq ma; Ngar yawdaef khardaef-eu khoerkeuvni, Car-awr ngaq-euq Miqyaer-anr jaceuq ma.

³ Nawr, dzoeqda deuq-anr taqghoe. Nawr, maq cawba nya-eu tsawrhaqzaq-anr khawf taqghoe.

⁴ Aqyawf maf-euq saf tsaev ngae, mirtsaq-anr parya ghofur-ir-awr; Khoerngae nan, aqyawf-euq bawqtov byovjir-eu mae.

⁵ Yaqkov-euq Miqyaer nae bi cawba-euq tsawrhaq-aq, guiqlanq huiq-eu mae; Aqyawf-euq Miqyaer pyeuf-eu Ya’we Miqyaer-anr noeqtmq-eu tsawrhaq-aq, guiqlanq huiq-eu mae.

⁶ Miqyaer-aq, mq khawf, mir khawf, iqmalavshav khawf, Heudeuq-euq lafkhoer kharjawr kharjav-eu jeq-anr khawf bae-euq mae. Aqyawf, li-eu maqbawni yawtsaq yawdawr-anr nyaeftaeq taq-eu mae.

⁷ Aqyawf, bi nyaefsuf taq-euq deuq-euq gharduq, Dawr-awr tsaq-eu jeq bi dovlar-awr; Maef-eu tsawrhaq-anr dzaqdzaq dawrdawr bifnaeq-awr, Ya’we Miqyaer, kuv-anr ur-eu tsawrhaq deuq-anr pyaeqnaeq-eu mae.

⁸ Ya’we Miqyaer, myavbaef-anr bi danrlar-awr; Ya’we Miqyaer, awbyav-eu tsawrhaq-anr ciqtur naeq-eu mae. Ya’we Miqyaer, tsaq-awr dawr-eu tsawrhaq-anr gaq-eu mae.

⁹ Ya’we Miqyaer, boermiq siqkhaq deuq-anr hawpir naeq-awr, Murcoeq aqnmr hawr-eu miqcoeq miqma deuq-anr ngaeqghae naeq-eu mae. Aerkhawf, aqyawf, tsawrcawv-euq garma-anr nanrpov-aer lavpov naeq-eu mae.

¹⁰ Ya’we Miqyaer-aq, mqmaq maqbyav yarzir uvlanr-eu ghaq pyeuf-eu mae; Ziroq-or! Nawq-euq Miqyaer yawqzir navluf-anr uvlanr taef-a. Haleluya!