Jaceuq 143 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Ngaq-anr Lavdaef Naeqlaf-awq

Daqbir-euq cardawq

¹ Ya’we Miqyaer-or! Ngaq-euq guiqlanq shardawq-anr narhaq naeqlaf-awq. Ngar tanqshar-eu jeq-anr nawq-euq naqbawr ciqkhmr naeqlaf-awq. Nawq-euq sarjax zif-awr, tsaq-awr dawr-eu lafkhoer, ngaq-anr dawq ngaeqkhof naeqlaf-awq.

² Nawq-euq kuirlaf zaqkhav-anr yarkhaq taq darnaeqlaf. Aqjeq mirnae aernar-aq, Nawq-euq maeqshi tsaq-awr dawr-eu tsawrhaq tiqghaq-iq maqjawr-a.

³ Muir-eu ghaq, ngaq-euq nuima saflar-anr khaeq-awr khavnaeq laf-awr, Ngaq-euq daefzir mirtsa nawqpyaev naeqlaf-euq mae; Aqyawf, ngaq-anr arhuba nae shirtaq-euq deuq-anr lof-aer, Zanrtsuini ghae-eu lafkhoer bijawr naeqlaf-euq mae.

⁴ Khoermirnae, ngaq-euq lafkhoer, ngaq-euq saflar ghaq juq-ir-awr, Ngaq-euq lafkhoer, ngaq-euq nuima shaqzanq mrluf mir-a.

⁵ Ngar, arhu-euq arnan aryamq-anr noeqmawr-awr, Ngar, nawq nae mr-euq gardeuq dawqtawv luf-euq garkawv dzardziv dziv-eu lafkhoer, Ngar, nawq-euq aqlaf nae gar mr-euq garkawv sharnoeq sharsawx luf-eu ma.

⁶ Ngar, ngaq-euq aqlaf nawr jawr-eu paw cawqdir laf-eu ma; Ngaq-euq nuima saflar, ircuf maef-eu mirtsaq lof-aer, nawq-anr maef mir-a. Sela.

⁷ Ya’we Miqyaer-or! Ngaq-anr yawkawr-aer dawq ngaeqkhof naeqlaf-awq; Ngaq-euq saflar, ghaq jirshaw-iq mir-a! Nawq-euq myavpyawq, ngaq-anr nae taq ciqzaf naeqlaf, Maqngeur nar-aq, ngar duqkhanq-anr ir-eu deuq-anr durlar-eu baw-mr.

⁸ Uqshawq paw, ngaq-anr nawq-euq ghoer-awr gaq-eu garkawv bigaq naeqlaf, Aqjeq mirnae aernar-aq, ngar, nawq-anr ghoe ma. Ngar, can paq-aer ghae-eu garma, ngaq-anr bi siqnya naeqlaf-awq, Aqjeq mirnae aernar-aq, ngar, ngaq-euq nuima saflar, nawq-anr ciqgornaeq ma.

⁹ Ya’we Miqyaer-or! Ngaq-anr muir-eu deuq-anr nae, ngaq-anr bibuq-ir naeqlaf-awq; Ngar-aq, nawq-euq lafkhoer jawrzaf ma.

¹⁰ Ngar, nawq-euq nuima tsaq-eu jeq mrnya’ni maeqnaeq laf-awq, Aqjeq mirnae aernar-aq, nawr-aq, ngaq-euq Miqyaer ma. Nawq-euq Saflar-aq yawmuiq mae. Ngaq-anr dawrcoeni ghae-eu deuq-euq mirtsaq-anr sheuqghae naeqlaf-eu mae.

¹¹ Ya’we Miqyaer-or! Nawq-euq tsawrmyanr gharduq, ngaq-anr lavdaef naeqlaf-awq! Nawq-euq tsaq-awr dawr-eu jeq-euq baqda’nae, Ngaq-euq nuima saflar, gardzaq garkawv-anr nae gheudov naeqlaf-awq.

¹² Nawr, ngaq-anr ghawqshaq gaq-eu lafkhoer, Ngaq-anr muir-eu deuq-anr deuvtsaev dzae-awr, Ngaq-euq nuima saflar-anr shaqzanq bi keuvle-euq deuq-anr lavcawv jir-awq. Aqjeq mirnae aernar-aq, Ngar-aq, nawq-euq kuirlaf zaqkhav ma.