Jaceuq 142 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Miqyaer-anr Gurgaq-eu

Daqbir-euq Maqsaqkir , aqyawf khaqlo boe-anr jawr ngae-euq guiqlanq shardawq

¹ Ngar, ngaq-euq tersar nae Ya’we Miqyaer-anr gurgaq ma. Ngar, ngaq-euq tersar nae Ya’we Miqyaer-anr tanqshar-eu dawqdzawr mr ma.

² Ngar nuikhanr maqshir-eu jeq, aqyawf-euq maeqshi shaevdov lef-awr; Ngaq-euq gardzaq garkawv, aqyawf-euq maeqshi dzawrdov-euq ma.

³ Ngaq-euq saflar, ngaq-euq lafkhoer ghawqshaq-aer ghae-ir-awr javluf ngae, Nawr, ngaq-euq cankawv siqnya-eu mae. Ngar can-eu garma-anr, aqyawfmaf nae lanrju khmrzaf taq-euq mae.

⁴ Ngar, ngaq-euq armar paw hawghae ngae, Haeqsher-eq, ngaq-anr tiqghaq-iq maq siqnya-a; Ngar caevzafduq maqpar jav-aer, Ngaq-euq nuima saflar-euq garkawv sharnoeq naeqlaf-eu tiqghaq-iq maqjawr-a.

⁵ Ya’we Miqyaer-or! Ngar, nawq-anr gurgaq-eu ma. Ngar heulof-aer aer ma: “Nawr-aq, ngaq-euq caevzafduq pyeuf-awr, Yawdaefzaq jawr-eu mirtsaq-euq khoertav, ngaq-euq shaqbymr ma.

⁶ Ngar gur-eu gar narhaq naeqlaf-awq. Aqjeq mirnae aernar-aq, Ngar ardzaeq-aer aw-eu gar bi gheuka taq-euq nya; Ngaq-anr khaeq-awr khav-eu deuq-anr nae bibuq-ir naeqlaf-awq. Aqjeq mirnae aernar-aq, Aqyawfmaf, ngaq-euq navmaqtser ghaq khavdzaeq-eu mae.

⁷ Ngar, nawq-euq tsawrmyanr-anr jaceuq nya’ni, Ngaq-euq nuima saflar, kuv-anr nae sheudov naeqlaf-awq; Nawr, ngaq-anr nuijer jer-awr guiqlanq bif-eu mirnae, Tsaq-awr dawr-eu tsawrhaq deuq, ngaq-euq tiqjawq uiqlar taef-a.”