Jaceuq 141 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Tsawrdoer-anr Nae Bibuq-ir Naeqlaf

Daqbir-euq cardawq

¹ Ya’we Miqyaer-or! Ngar, nawq-anr kur-eu ma. Ngar, nawq-anr kur-eu gar, Ngaq-euq tersar-anr naqbawr ciqkhmr-awr narhaq naeqlaf-awr; Ngar jawr-eu gar yawkawr-aer oe naeqlaf-awq.

² Ngaq-euq guiqlanq shardawq, nawq-euq maeqshi dofdamq-euq jeq lof-aer bipyeuf-awr; Ngaq-euq aqlaf bafdir-eu-aq, uqcif uqtaw paw lawr-eu jeq lof-aer bi pyeufnaeq laf-awq.

³ Ya’we Miqyaer-or! Ngaq-euq khaqmae-anr hawlanr naeqlaf-awr, Ngaq-euq maeqluq-euq larghov-anr hawpir naeqlaf-awq.

⁴ Ngar, yawlaeq yawca jeq mr-eu tsawrhaq naeq-aer yawcawv jeq mr-ir paq-aer, Ngaq-euq nuima yawdoer jeq tiqjeq-anr-iq taqbi pyawr-ir naeqlaf. Khoeruqtaf, aqyawfmaf dzaq-eu dzarkuir deuq taqbi dzaq-ir naeqlaf.

⁵ Tsaq-awr dawr-eu tsawrhaq nae ngaq-anr bidiq-awq; Khoer-aq, ghawqshaq gaq-eu jeq pyeuf taef-a. Aqyawf nae ngaq-anr bidaeq-awq; Khoer-aq, zawr muiq-eu tsir lof-aer pyeuf-awr; Ngaq-euq uqduq maq hageuf-aer taqbi ghae naeqlaf. Aqjeq mirnae aernar-aq, Ngar guiqlanq sharshar-aer tsawrcawv deuq-euq gardeuq-anr deuvluf-eu ma.

⁶ Aqyawf maf-euq yarkhaq dar-eu tsawrhaq-aq, baqghapyaf-anr nae bi daeqka ghae-awr; Ngaq-euq dawqdeuq yawcoer mirnae, aqyawfmaf yagaq taef-a.

⁷ Tsawrhaq nae mirtsaq duqpoq-eu laer duqtaq-euq lof-aer; Nga’maf-euq shaqyoeq, lmqbymr maeqkhaeq-anr tiqgar tiqhmq-aer galuf-eu mae.

⁸ Aerkhawf, Sanqpaq Miqyaer pyeuf-eu Ya’we Miqyaer-or! Ngaq-euq myavnuiv-aq, nawq-anr hawtsov taq-euq ma; Ngar, nawq-euq lafkhoer caevzaf ma; Ngaq-euq nuima saflar-anr taq byaerdzae naeqlaf.

⁹ Ngaq-anr aqyawfmaf nae khmrtaq-euq lanrju-anr taqbi pafler naeqlaf. Yawlaeq yawca jeq mr-eu deuq-euq yadmq-anr nae bidzeur-ir laf.

¹⁰ Ngar yabuq yalaw-ir luf ngae, Tsawrcawv deuq, yawqha nae khmrtaq-euq lanrju-anr bi paflerjir luf-ur.