Jaceuq 140 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Tsawrdoer-anr Nae Bibuq-ir Naeqlaf

Car-eu paw sheuqghae-eu aqyuif ghaq-anr bofnaeq-euq, Daqbir-euq cardawq

¹ Ya’we Miqyaer-or! Tsawrdoer deuq-anr nae, ngaq-anr bibuq-ir laf; Coeqlar deuqlarni mr-eu deuq-anr nae, ngaq-anr bidzeur-ir naeqlaf.

² Aqyawfmaf, yawqha-euq nuima-euq lafkhoer bawqtov yawdoer jeq tov-awr; Aqyawfmaf, aqmyanluf guirdeuv deuv-eu laer tiqkawv lof-aer uiqler-eu mae.

³ Aqyawfmaf, yawqha-euq maeqlar arlawr-euq maeqlar lof-aer lavtav-awr; Aqyawf maf-euq maeqluq-euq lafkhoer paw, dof khav-eu arlawr uirnav-euq dof anr-eu mae. Sela.

⁴ Ya’we Miqyaer-or! Tsawrcawv-euq aqlaf-anr nae, ngaq-anr hawpir naeqlaf; Coeqler deuqler-eu jeq mr-eu deuq-anr nae, ngaq-anr bidzeur-ir laf. Aqyawfmaf, ngaq-euq kuirtof sanqtif bitif-ir le laer noeqtsov taq-euq mae.

⁵ Nuima huiq-eu tsawrhaq, ngaq-anr lanrju hawr-eu cavpyeuv khmrzaf taq-euq mae; Aqyawfmaf, garma gardzer bawghaf khmrtaq-awr, Ngaq-anr lafpeu khmrtaq-euq mae. Sela.

⁶ Ngar, Ya’we Miqyaer-anr heulof-aer aernaeq ma: “Ya’we Miqyaer-or! Nawr-aq, ngaq-euq Miqyaer ma. Ngar tanqshar-eu tersar-anr narhaq naeqlaf.

⁷ Ngaq-anr kakhof-eu ghaq khav-eu Sanqpaq Miqyaer pyeuf-eu Ya’we Miqyaer-or! Guirdeuv deuv-eu arnan-anr nawr, ngaq-euq uqduq-anr daeqkaq naeqlaf-euq mae.

⁸ Ya’we Miqyaer-or! Tsawrcawv deuq geufmawf-eu jeq taq bifnaeq; Aqyawfmaf yawdoer jeq tovtaq-euq khoer, taqbi irganrnya law; Maqngeur nar-aq, aqyawfmaf khanqsaer jaev-eu baw-mr. Sela.

⁹ “Ngaq-anr gajawq taq-euq deuq-euq uqduq-anr-aq, Aqyawf maf-euq maeqluq-euq yawdoer jeq nae gadav luf-ur;

¹⁰ Miqdzaq dofluf-eu miqdziv, aqyawf maf-euq khoertav bi gale-awr; Aqyawf maf-anr tiqjawr-iq maq ghofdovlar nya’ni, Naf-eu duqkhanq-euq lafkhoer, miqdzaq-euq lafkhoer dzae’anr ghae-awq.

¹¹ Aqcawq-anr jabu jadoer-eu tsawrhaq-aq, mirtsaq-euq khoertav taqbi ziflar; Yawdoer jeq shaqtae tae-eu lof-aer, coeqler deuqlerni mr-eu tsawrhaq-anr taemi luf-ur.”

¹² Ya’we Miqyaer, bikhaeq-euq deuq-anr hawpir naeq-awr, Irshaqzaq-anr dawr-awr tsaq-eu jeq janrnaeq mae laer ngar siqnya ma.

¹³ Yawduq bawni, tsaq-awr dawr-eu tsawrhaq-aq, nawq-euq tsawrmyanr-anr jaceuq-awr, Dawrcoeni daef-eu tsawrhaq-aq, nawq-euq maeqshi yajawr taef-a.