Jaceuq 139 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Miqyaer, Tsawrhaqzaq-anr Siqnya-eu

Car-eu paw sheuqghae-eu aqyuif ghaq-anr bofnaeq-euq Daqbir-euq cardawq

¹ Ya’we Miqyaer-or! Nawr, ngaq-anr povtser duq-awr, ngaq-anr siqnya-eu mae.

² Nawr-aq, ngar nuir ngae hawr-eu yawf ngae khawf siqnya-eu mae; Nawr garmanr kaq-eu gar jawr-awr, ngaq-euq nuinoeq ghovshaw nya-eu mae.

³ Nawr-aq, ngaq-euq garma siqnya-awr, ngar ghaqnaq naq-eu khawf siqnya-eu mae; Nawr, ngaq-euq garma dawqtawv luf-anr siqnya-eu mae.

⁴ Aqjeq mirnae aernar-aq, ngaq-euq maeqlar tiqdawq-iq maqngaeq-euq khawf; Ya’we Miqyaer-or! Haeq, nawr siqnya jir-eu mae.

⁵ Nawr, ngaq-euq maeqhu maeqnan-aer tiqjawq jawr-awr, Nawq-euq aqlaf, ngaq-euq khoertav bafdav taq-euq mae.

⁶ Siqnya-eu tsawrganr heu-aq, ngaq-euq gharduq ardzaeq-aer zanqler paq-aer ghae-awr, Ngar maq yurmir nya-eu gar yawgor-anr jav-eu mae.

⁷ Ngar, nawq-euq Saflar-anr nae aqgeugar irbyov nya-eu? Ngar, nawq-euq maeqshi nae aqgeugar caevbyov nya-eu?

⁸ Ngar, mq-anr davler nar-aq, nawr khoergar jawr-eu mae; Ngar, ngaq-euq yufzar shiqbuir lanma-anr taq-ir nar-aq khawf, nawr khoergar jawr taef-a.

⁹ Ngar, uqshawq-euq aqdanr-anr dziq-awr, Kaq duidui-eu iqmalavshav-anr jawrbyov-ir-eu law-awr khawf,

¹⁰ Khoergar, nawr, nawq-euq armar laf nae ngaq-anr nyaeftaeq-awr, Nawq-euq aqlaf nae, ngaq-anr sheuqghae naeqlaf taef-a.

¹¹ “Yawzanr, ngaq-anr yawduq bawni dzaekaqle taef-a” laer ngar aernar-aq, Uqcif khawf, ngaq-euq tiqjawq yawshaef byalar taef-a.

¹² Ngeur mae. Yawzanr-aq, nawq-anr nae maq caevzaf nya-aer; Uqcif khawf, nan’ghanr paw lof-aer yawshaef bya-eu mae. Nawq-euq gharduq-aq, yawzanr hawr-eu yawbya nyiq jeqluf tiqgar dur-eu mae.

¹³ Aqjeq mirnae aernar-aq, ngaq-euq lafkhoer anr-eu jeq-aq, nawq nae shaev-awr, Ngar, ngaqma-euq uqmav-euq lafkhoer jawr ngae, Nawr, ngaq-anr dzeuf-euq mae.

¹⁴ Ngar, nawq-anr jaceuq ma. Aqjeq mirnae aernar-aq, Nawr, ngaq-anr guvlar paq-aer hawr-eu zanqler paq-aer bae naeqlaf-euq mae. Nawq nae mr-euq gardeuq-aq, muiq duidui-eu mae. Ngaq-euq nuima saflar, yawmuiq paq-aer siqnya ma.

¹⁵ Mirtsaq-euq dawqdan, ngaq-anr yawmuiq-aer shaev-awr dzeuf-eu lafkhoer, Yawzaf zaf-aer ghae-eu gar ngaq-anr bae ngae, Ngaq-euq mawrkawr-aq, nawq-anr nae zaftaq-euq maqngeur-a.

¹⁶ Ngaq-euq mawrdo-euq mawrkawr, maq kawrghaq-euq minav-aer, Nawq-euq myavnuiv, ngaq-anr mawrluf-eu mae. Kharngeur-eu jeq maq pyeuflar-euq minav-aer, Ngar yadaef yajawr-eu arnan aryamq deuq khawf, Dawqtawvluf, nawq-euq sanqbof-euq lafkhoer bofanr taq-euq mae.

¹⁷ Miqyaer-or! Nawr, ngaq-euq gharduq sharnoeq naeqlaf-eu jeq poeq-eu gar nae-aq; Kharngeur-eu jeq sawxluiv ngae, arnavni huiq-eu nga!

¹⁸ Ngar, nawq-euq nuinoeq heudeuq gui-eu le laer nar-aq, Kharshuif myavmaqtser myaq-eu gar ya’mawr taef-a. Ngar noeqlar ngae khawf, nawq naeq-aer jawr ma.

¹⁹ Miqyaer-or! Nawq nae tsawrcawv-anr bi saefdzaemawf mir-a. Nawmaf, shiq maef-eu tsawrhaq deuq-or! Ngar jawr-eu gar nae dov-ir-awq.

²⁰ Aqjeq mirnae aernar-aq, Aqyawfmaf, nawq-euq garkawv jadoer jacawv-awr, Nawq-anr muir-eu deuq, nawq-euq tsawrmyanr zmqcawv-eu mae.

²¹ Ya’we Miqyaer-or! Nawq-anr byae-eu deuq-anr, ngar maqbyae-eu nga laq? Nawq-anr muir-eu laer turlar-euq deuq-anr, ngar nuidav maqdav-eu nga lor?

²² Ngar, aqyawf maf-anr aerkhar maqza’ni byae-awr, Ngar, aqyawf maf-anr ngaq-anr muir-eu deuq laer sawxtaq-euq ma.

²³ Miqyaer-or! Ngaq-anr pyaevtser-awr, ngaq-euq nuima siqnya-awq; Ngaq-anr tsermr-awr, ngaq-euq nuinoeq-anr khawf siqnya-awq.

²⁴ Khoernar-aq, ngaq-euq lafkhoer yawcawv-euq garma anr-eu nga laq laer haw-awr, Ngaq-anr mqmaq maqbyav yarzir-euq garma-anr sheuqghae naeqlaf-awq.