Jaceuq 138 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Nuima Dawqtawvluf Jaceuq-eu

Daqbir-euq cardawq

¹ Ngar, ngaq-euq nuima dawqtawvluf nae nawq-anr ciqpoeq ciqgor ma. Ngar car-awr nae miqyaer nuideuq-euq maeqshi, nawq-anr jaceuq ma.

² Nawq-euq ghoer-awr gaq-eu jeq hawr-eu nawq-euq yawtsaq yawdawr-euq baqda’nae, Nawr, nawq-euq tsawrmyanr dawqtawv luf-euq khoertav nawq-euq dawq-anr taqhuiq taq-euq baqda’nae, Ngar, nawq-euq shawr-eu uqduq tanqnymr nymrma jav-eu paw ciqpyawr-awr uqduq tanq-eu lafkhoer, nawq-euq tsawrmyanr-anr jaceuq ma.

³ Ngar, nawq-anr kur ngae nan-anr nawr, ngaq-euq dawq narhaq naeqlaf-awr, Ngaq-euq nuima saflar ghaq bi anrlar-awr khaqduqni bi ghaelar naeqlaf-euq mae.

⁴ Ya’we Miqyaer-or! Mirkhanq sanqpaq deuq, nawq-euq khaqmae-anr nae dovle-euq dawq yagaq ngae, Aqyawfmaf dawqtawvluf, nawq-anr jaceuq taef-a.

⁵ Aqyawfmaf, Ya’we Miqyaer-euq garma-euq garkawv car taef-a; Aqjeq mirnae aernar-aq, Ya’we Miqyaer-euq yawshaef khanqsaer-aq, huiq-awr manr-eu mae.

⁶ Ya’we Miqyaer-aq, yawgor-anr jawr-eu khawf, Aqyawf, yaw’aw-anr jawr-eu deuq-anr noeqkeuv-eu mae; Aerkhawf, nuima huiq-eu deuq-anr-aq, garmanr kaq-eu gar nae siqnya-eu mae.

⁷ Ngar gardzaq garkawv-euq ghanrcae canluf khawf, Nawr, ngaq-anr tiq pov par lavdaef naeqlaf taef-a; Nawr, nawq-euq aqlaf cawqja-awr nae, ngaq-anr muir-eu deuq-euq nuima paer-eu gar caekhofnaeq taef-a. Khoernar-aq, nawq-euq armar laf, ngaq-anr bibuq-ir naeqlaf taef-a.

⁸ Ngaq-anr taf-eu garkawv deuq-aq, Ya’we Miqyaer mrbyan taef-a. Ya’we Miqyaer-or! Nawq-euq ghawqshaq gaq-euq jeq mqmaq maqbyav yarzir zif-eu mae. Nawq-euq aqlaf-euq gardeuq-anr taq ngaerbyov naeqlaf.