Jaceuq 135 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Ya’we Miqyaer Muiq-eu Gar Jaceuq-eu

¹ Haleluya! Aqyawf-anr jaceuq-awq, Ya’we Miqyaer-euq kuirlaf zaqkhav deuq-or! Ya’we Miqyaer-euq tsawrmyanr-anr jaceuq-awq.

² Nawmaf, Ya’we Miqyaer-euq nymr-euq lafkhoer yawfluf-eu deuq, Aqdui-euq Miqyaer-euq nymr-euq povka jawr-eu deuq,

³ Ya’we Miqyaer-aq yawmuiq mirnae, Ya’we Miqyaer-anr jaceuq-awq; Aqyawf nuikhanr shir-eu mirnae, Car-awr aqyawf-euq tsawrmyanr-anr jaceuq-awq.

⁴ Aqjeq mirnae aernar-aq, Ya’we Miqyaer, aqyawf-euq gharduq Yaqkov-anr tserdov-awr, Aqyawf-euq poeq-eu myawqganq pyeufni, Irsaqleqlav-anr tserdov-euq mae.

⁵ Aqjeq mirnae aernar-aq, Ya’we Miqyaer-aq, huiq-awr manr-eu mae laer ngar siqnya ma; Aqdui-euq Sanqpaq Miqyaer-aq, Miqyaer nuideuq dawqtawv luf-euq khoertav dzaeq-eu mae.

⁶ Mq hawr-eu mir-euq khoertav khawf, Iqmalavshav hawr-eu naf-eu iqmalavshav dawqtawv luf-euq lafkhoer khawf, Ya’we Miqyaer, aqyawf nuima tsaq-eu jeq mr-eu mae.

⁷ Aqyawf, mqdzer mirdzer-anr nae ircuf-euq safkhoeq bi dovlar-awr, Uqyaer-euq gharduq mqjeq tsawqtaev bitaev-eu uqtaf, Aqyawf-euq myawqganq jeqhmq duq-anr nae jaqlaer bi dovle-eu mae.

⁸ Aqyawf nae Irjirtuv-euq huqbaw zaqyo hawr-eu huqbaw jeqzaq-anr lavsaef-euq mae.

⁹ Irjirtuv-or! Aqyawf, nawq-euq ghanrcae bisiq bimawr-eu jeq hawr-eu zanqler paq-aer ghae-eu jeq, Paqlawr hawr-eu aqyawf-euq kuirlaf zaqkhav dawqtawv luf-euq khoertav bi keuvle-euq mae.

¹⁰ Aqyawf, ghawqmya jeuq ghawqmya ca-anr ghaqler-awr, Baoq huiq-eu sanqpaq deuq-anr saef-euq mae.

¹¹ Aqmorliv-euq sanqpaq Sirhoq, Baqshaq-euq sanqpaq Awrgav hawr-eu, Kaqnaq mirkhanq-anr jawr-eu sanqpaq dawqtawv luf-anr saef-euq mae.

¹² Khoernar-aq, aqyawf maf-euq mirtsaq, jeqbir lof-aer bif-euq mae; Aqyawf-euq tsawrhaq pyeuf-eu Irsaqleqlav-anr jeqbir lof-aer bifnaeq-euq mae.

¹³ Ya’we Miqyaer-or! Nawq-euq tsawrmyanr mqmaq maqbyav yarzir zif-awr, Ya’we Miqyaer-or! Tiqzir sair tiqzir saq-eu maqbawni, nawq-euq tsawrmyanr jav taef-a.

¹⁴ Ya’we Miqyaer, aqyawf-euq tsawrhaq-anr yarkhaqdar ngae, Aqyawf, aqyawf-euq kuirlaf zaqkhav-anr ghawqshaqgaq taef-a.

¹⁵ Aqcawq tsawrjeuq-euq tanqpanq aqma mawrkawr-aq, Pyur hawr-eu shuir yur-awr tsawrhaq-euq aqlaf nae taev-euq taef mae.

¹⁶ Aqyawfmaf khaqmae tsof-eu khawf maq ngaeqnya-aer, Myavnuiv tsof-eu khawf maq mawrnya-a.

¹⁷ Aqyawfmaf naqbawr tsof-eu khawf maq gaqnya-aer, Khaqmae-anr nae saf khawf maq ghawrnya-a.

¹⁸ Aqyawf maf-anr taev-euq deuq-aq, aqyawf maf-anr durlar taef-a; Aqyawf maf-anr kharghoe-eu deuq khawf, aqyawf maf-anr durlar taef-a.

¹⁹ Irsaqleqlav-euq nymrkhanq-or! Ya’we Miqyaer-anr jaceuq-awq! Aqloq-euq nymrkhanq-or! Ya’we Miqyaer-anr jaceuq-awq!

²⁰ Leqbir-euq Nymrkhanq-or! Ya’we Miqyaer-anr jaceuq-awq! Ya’we Miqyaer-anr guv-eu nawmaf, Ya’we Miqyaer-anr jaceuq-awq!

²¹ Ziroq-anr nae Ya’we Miqyaer-anr jaceuq-awq. Yeqlursaqlaeq-euq lafkhoer jawr-eu ghaq-anr jaceuq-awq! Haleluya!