Jaceuq 132 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Ya’we Miqyaer-euq Jawrduq Pyeuf-eu Ziroq

Ledav ngae car-eu dawqcar

¹ Ya’we Miqyaer-or! Daqbir-anr noeqmawr naeqlaf-awr, Aqyawf nae yadaq-euq shaqzanq dawqtawv luf-anr noeqkeuv naeqlaf-awq.

² Aqyawf, Ya’we Miqyaer-anr kamq-awr, Yaqkov-euq Baoq huiq-eu ghaq-anr sarjax dzaq-euq lafkhoer aer-eu;

³ “Ngar marmarni ngaq-euq nymr-anr maq ghofler. Sarsuqni yufnya-eu, ngaq-euq yufzar-anr khawf maq yufler.

⁴ Ngar, ngaq-euq myavnuiv-anr maqbi yufkhav-aer, Ngaq-euq myavnuiv-euq myavkhov khawf, yufyoer maqbi ngeur.

⁵ Ngar, Ya’we Miqyaer-euq gharduq jawrzar maq povmawr-aer, Yaqkov-euq Baoq huiq-eu ghaq, jawrduq maqjav-eu khoerkeuvni, Ngar ghaqnaq maqnaq.”

⁶ Hawsher-eq, nga’maf heu-euq garkawv Erpaqlaqta-anr yagaq-awr, Arbawr yar-euq daega-anr nga’maf ya’mawr-euq ma.

⁷ Aqdui, Ya’we Miqyaer-euq saqpar saeqghawv-anr urler kar-eur; Aqyawf-euq aqkuir cawqtaqduq-anr uqduq tanqler kar-eur.

⁸ Ya’we Miqyaer-or! Tur-awr nae nawq-euq baoq-euq dawqma sarjax bawqkeuv naeq-aer, Nawq-euq ghaqnaq naqduq-anr jawrle-awq.

⁹ Nawq-euq pirma deuq tsaq-awr dawr-eu maeqtsoeq bidm-awr, Nawq-euq tsawrshawr deuq laqkhaq caer-awr bigur law.

¹⁰ Nawq-euq kuirlaf zaqkhav Daqbir-anr noeqkeuv-awr, Nawq nae tsaqtsov-euq ghaq-euq myavpyawq, yawqpawyawq taqbi pyawr-ir naeqlaf.

¹¹ Ya’we Miqyaer, Daqbir-anr yawtsaq yawdawr-euq lafkhoer kamqtaq-euq mae; Aqyawf kamqtaq-euq heu-anr nae maqpov maq parlar-a. Aqyawf aer-eu, “Ngar, nawq-euq nuirmanq-anr, nawq-euq mawrdo-euq arsiq binuir ma.

¹² Nawq-euq zaqyo deuq, ngaq-euq dawqma sarjax-anr mrcaw-awr, Ngar maeq-eu ngaq-euq dawqdzawr-anr mrcaw nar-aq, Aqyawf maf-euq zaqyo deuq khawf, mqmaq maqbyav yarzir keuvni, Nawq-euq nuirmanq-anr ya’nuir taef-a.”

¹³ Aqjeq mirnae aernar-aq, Ya’we Miqyaer nae Ziroq-anr tserdov-awr, Aqyawf-euq jawrduq jawrzar bi pyeuflar mawf-eu mae.

¹⁴ Miqyaer aer-eu, “Heugar-aq, mqmaq maqbyav yarzir, ngaq-euq ghaqnaq naqduq ma. Ngar heugar jawrmawf-eu mirnae, ngar heugar jawr ma.

¹⁵ Ngar, dawq ngaeqghae naeq-awr, Ziroq kharmawf-eu jeq tiqbyan tiqlof biza-awr; Irshaqzaq-anr hawqmaef tiqlof bi dzaqdaev ma.

¹⁶ Ngar, Ziroq-euq pirma deuq-anr kakhof-eu maeqtsoeq bidm-awr, Tsawrshawr deuq laqkhaq caer-eu tersar yawkhav-aer yagur taef-a.

¹⁷ Ngar, heugar Daqbir-euq uqcoer tiq coer bi huiqlar-awr, Ngaq nae tsaqtsov taq-euq ghaq-euq gharduq, tsirkhmq tiq khmq laeqhmq taq-euq ma.

¹⁸ Ngar, aqyawf-anr muir-eu deuq-anr daqga-eu maeqtsoeq bidm ma. Aerkhawf, aqyawf-euq uqduq-anr khovluf-eu shuir-euq uqkhov-aq, yawshaef bya taef-a.”