Jaceuq 126 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Yufmav Mav-euq Gar Dur-eu

Ledav ngae car-eu dawqcar

¹ Aqcawq nae bi nyaefbyov ghae-euq tsawrhaq, Ya’we Miqyaer nae, Ziroq-anr bi sheuqkhof laf-euq mirnae, yufmav mav-euq gar dur nya.

² Khoermirnae, aqdui-euq maeqlar dawqcar car-awr, Aqdui-euq khaqmae tiqbyanni, maq naqler-aer uir-euq ma. Khoerngae, mirkhanq tsawrjeuq deuq aer-eu, “Ya’we Miqyaer nae, aqyawf maf-euq gharduq huiq-eu jeq mr-euq ngar-a.”

³ Ya’we Miqyaer, aqdui-euq gharduq zawr huiq-eu jeq mr-euq mae. Aqdui laqkhaq arnavni caer paq-aer ghae-eu nga.

⁴ Ya’we Miqyaer-or! Lafov paw yoer-eu lawrbaq lof-aer, Bi nyaefbyov ghae-euq nga’maf-euq tsawrhaq sheuqkhof naeqlaf-awq.

⁵ Myavbir yoeryoer-aer saeq-eu tsawrhaq-aq, Laqkhaq caertavni yayaeq taef-a.

⁶ Siqyoeq saeq-eu laer, ngoerngoer-aer caer siqyoeq pi-awr dov-ir-eu tsawrhaq-aq, Yawduq bawni, caer caerdzanq pi-awr laqkhaq caertavni ya ghoflar taef-a.