Jaceuq 12 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Cawba Naeqlaf Laer Shar-eu

Car-eu paw sheuqghae-eu aqyuif ghaq-anr bofnaeq-euq, yaef cav tsof-eu deur-mq cuq zmq-eu, Daqbir-euq cardawq

¹ Ya’we Miqyaer-or! Cawba naeqlaf-awq. Aqjeq mirnae aernar-aq, tsawrmuiq maqpar jawr-aer, Tsawrhaq-euq zaqyo deuq-euq ghanrcae, sarjax zif-eu tsawrhaq byov-ir jir-euq mae.

² Aqyawfmaf, yawqghaq navluf, yawqha-euq dawqpae jawr-eu tsawrhaq-anr jaqmyawf myawf-awr, Nuima povpov lavlav-aer ghae-eu lafkhoer, jaceuq-eu janrgeuf-eu maeqluq nae ngaeq-eu mae.

³ Jaceuq-eu janrgeuf-eu maeqluq hawr-eu nuima huiq-eu lafkhoer ngaeq-eu maeqlar dawqtawv luf-anr, Ya’we Miqyaer yaeqdzaejir naeq luf-ur.

⁴ Aqyawfmaf aer-eu, “Nga’maf-euq maeqlar nae nga’maf ghaqler ma. Nga’maf-euq maeqluq, nga’maf-euq paw pyawq-eu mae. Aqsur ghaq, nga’maf-euq sanqpaq pargeuf lar-eu?”

⁵ Aerkhawf, Ya’we Miqyaer aer-eu, “Irshaqzaq bikhaeq bi khavluf-awr, shaqzaq zanqzaq manrluf-eu mirnae, Aqyawfmaf za’mawf duidui-eu lof-aer, Guvkhar maqza-eu jawrduq bif-eu gharduq, nymq-mr ngar tur ma.”

⁶ Ya’we Miqyaer-euq dawq-aq, Mirtsaq-euq miqdzaq tsawqbym-anr shif pov byan’ni shawr-euq pyur lof-aer shawr-eu dawq mae.

⁷ Ya’we Miqyaer-or! Nawr, aqyawf maf-anr hawpir naeq-awq. Li-eu maqbawni tiqzir sair tiqzir, nawr, aqyawf maf-anr hawlanr naeq-awq.

⁸ Tsawrhaqzaq yawdoer yawcawv jeq-anr ciqpoeq ngae, tsawrcawv deuq yawqpaw navluf canluf-eu mae.