Jaceuq 119 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Yaerdawq-anr Cantae-eu א AQLEV

א AQLEV

¹ Ya’we Miqyaer-euq zanrdawq-euq lafkhoer can-awr, Aerkhar maqza-eu garma-euq lafkhoer can-eu tsawrhaq-aq, guiqlanq huiq-eu mae.

² Nuima dawqtawvluf aqyawf-anr pov-awr, Aqyawf-euq dawqdzawr-anr cantae-eu tsawrhaq-aq, guiqlanq huiq-eu mae.

³ Aqyawfmaf yawbanq yawlaeq jeq khawf maqmrni, Aqyawf-euq garma-anr can-eu mae.

⁴ Nawq-euq maeqdawq-anr laejae-awr cantae laer, Nawr, nga’maf-anr khaertaq-euq mae.

⁵ Or-oq, ngar, nawq-euq zanrtaq khoftaq-anr mrcaw nya’ni, Ngaq-euq garma zifdanni lavzif naeqlaf-awq.

⁶ Ngar, nawq-euq zanrdawq khofdawq dawqtawv luf-anr hawtsovtaq ngae, Ngar daq maqga’ni yadaef taef-a.

⁷ Nawr tsaq-awr dawr-eu lafkhoer yarkhaq dar-eu garkawv ngar yasiq ngae, Nuima dawrcoeni ghae-eu lafkhoer nawq-anr jaceuq ma.

⁸ Ngar, nawq-euq zanrtaq khoftaq-anr cantae ma. Ngaq-anr taq byaerdzae tsaevtsaev naeqlaf.

Yaerdawq-anr Laqkhaq Caer-eu ב BEV

ב BEV

⁹ Zaqguq tiq ghaq yawqha-euq garma-anr shawrjaevni aqjox-aer daefnya-eu la? Nawq-euq dawq narhaq geuf-eu lafkhoer yadaef-eu mae.

¹⁰ Ngaq-euq nuima dawqtawvluf nawq-anr pov ma. Ngar, nawq-euq zanrdawq khofdawq-anr nae garbanq taqbi banq-ir naeqlaf.

¹¹ Ngar, nawq-anr iqbax maqya mrbanqni, Ngaq-euq nuima-euq lafkhoer, nawq-euq dawq shardawv taq-euq ma.

¹² Ya’we Miqyaer-or! Ngar, nawq-anr jaceuq ma. Ngaq-anr nawq-euq zanrtaq khoftaq maeqnaeq laf-awq.

¹³ Nawq-euq khaqmae nae dar-euq jeq dawqtawvluf, Ngaq-euq maeqluq nae dzawrpov ma.

¹⁴ Ngar, pyurshuir myawqganq dawqtawv luf-anr laqkhaq caer-eu lof-aer, Nawq-euq dawqdzawr-euq garma-anr laqkhaq caer-eu ma.

¹⁵ Ngar, nawq-euq maeqdawq dzardziv dziv-awr, Nawq-euq garma-anr hawtsov taq-euq ma.

¹⁶ Ngar, nawq-euq dawq maqngaer. Ngar, nawq-euq zanrtaq khoftaq-anr laqkhaqcaer ma.

Maeqbawq Bif-eu Yaerdawq ג GIRMEQLAR

ג GIRMEQLAR

¹⁷ Ngar yawdaef daef-awr, nawq-euq dawq-anr cantae nya’ni, Nawq-euq kuirlaf zaqkhav-anr guiqlanq bi keuvle naeqlaf-awq.

¹⁸ Ngar, nawq-euq zanrdawq-euq lafkhoer anr-eu zanqler paq-aer muiq-eu jeq mawrnya’ni, Ngaq-euq myavnuiv-anr pannaeq laf-awq.

¹⁹ Ngar-aq, mirtsaq-euq khoertav boermiq siqkhaq lof-aer daefluf-eu taef ma. Nawq-euq zanrdawq khofdawq, Ngaq-anr nae taq yurzaf naeqlaf.

²⁰ Nawr yarkhaq dar-eu jeq-anr siqnya mawf-eu mirnae, Aqmyanluf ngaq-euq nuima saflar tsawqpav-ir paq-aer javluf mir-a.

²¹ Nuima huiq-awr yaqkhaer yaq-eu gar yadaq-eu tsawrhaq hawr-eu, Nawq-euq zanrdawq khofdawq-anr garbanq banq-eu tsawrhaq-anr, nawr lmqnaeq-eu mae.

²² Ngar, nawq-euq dawqdzawr-anr cantae-eu mirnae, Hawdoer-eu jeq hawr-eu dawqdoer yurdzae naeqlaf-awq.

²³ Dzoeqda deuq khawf, nuir-awr ngaq-anr muir-eu jeq ngaeq-eu mae. Aerkhawf, nawq-euq kuirlaf zaqkhav-aq, Nawq-euq zanrtaq khoftaq-anr dzardzivdziv ma.

²⁴ Nawq-euq dawqdzawr-aq, Ngaq-anr maeqbawq bif-awr, Ngaq-anr laqkhaq bi caerlar-eu jeq khawf pyeuf-eu mae.

Yaerdawq-euq Garma-anr Caev-eu ד DAQLEV

ד DAQLEV

²⁵ Ngaq-euq nuima saflar khaqlaer-anr gapanq taq-euq nya. Nawq-euq dawq aertaq-euq lof-aer, Ngaq-anr lavdaef naeqlaf-awq.

²⁶ Ngaq-euq garma, ngar jadov ngae, Nawr narhaq naeqlaf-euq mae. Nawq-euq zanrtaq khoftaq ngaq-anr maeqnaeq laf-awq.

²⁷ Ngar, nawq nae zanqler paq-aer ghae-eu gardeuq mr-euq garkawv dzardzivdziv nya’ni, Nawq-euq maeqdawq-euq garma-anr bi ghovshaw naeqlaf-awq.

²⁸ Ngaq-euq nuima saflar, kantuivni ghae-awr guirbyov ghaeluf nya, Nawq-euq dawq aertaq-euq lof-aer ghaq biflanq naeqlaf-awq.

²⁹ Ngaq-anr nae jaqmyawf myawf-eu garma, yurdzae naeqlaf-awr, Guiqlanq yawdzanr-euq lafkhoer, nawq-euq zanrdawq bifnaeq laf-awq.

³⁰ Ngar, yawtsaq yawdawr-euq garma tsergeuf-awr, Nawq nae dartsaev-euq jeq, ngaq-euq maeqshi bijav-euq ma.

³¹ Ya’we Miqyaer-or! Ngaq-anr daq taqbi ga naeqlaf. Ngar, nawq-euq dawqdzawr-anr tuvtaeq taq-euq ma.

³² Nawr, ngaq-euq nuima panjer naeqlaf-euq mirnae, Ngar, nawq-euq zanrdawq khofdawq-euq garma-anr caev ma.

Yaerdawq-anr Nuigaq Anr-eu ה HE

ה HE

³³ Ya’we Miqyaer-or! Nawq-euq zanrtaq khoftaq-euq garma, ngaq-anr maeqnaeq laf-awq. Ngar arsaqsaq ngae keuvni cantae ma.

³⁴ Ngar, nawq-euq zanrdawq-anr aqdir cantae-awr, Ngaq-euq nuima dawqtawvluf mrcaw nya’ni, Ngaq-anr ghovshaw nya-eu jeq bifnaeq laf-awq.

³⁵ Ngar, nawq-euq zanrdawq khofdawq-euq lafkhoer daefcaw nya’ni cawba naeqlaf-awq. Aqjeq mirnae aernar-aq, ngar, nawq-euq zanrdawq khofdawq-anr laqkhaq caer-eu ma.

³⁶ Yawqjeq yawq-anr maerjuir juir-eu maqngeur-eu, Nawq-euq dawqdzawr-anr za’mawf-eu nuima bi anrlar naeqlaf-awq.

³⁷ Ngaq-euq myavnuiv gardanr maqtsoeq-eu jeq-anr hawluf-eu gar nae yurdzeur naeqlaf-awr, Nawq-euq garma-euq lafkhoer, ngaq-anr lavdaef naeqlaf-awq.

³⁸ Nawq-anr guv-awr nawq-euq kuirlaf zaqkhav geufluf-eu tsawrhaq-euq gharduq, Nawq-euq dawq aertaq-euq lof-aer bi pyeuflar-awq.

³⁹ Ngar guv-eu dawqdoer-anr yurdzae naeqlaf-awq. Aqjeq mirnae aernar-aq, nawr yarkhaq yawmuiq-aer dar-eu mae.

⁴⁰ Hawsher-eq, ngar, nawq-euq maeqdawq-anr nuigaq keuv duidui mir-a. Nawq-euq tsaq-awr dawr-eu lafkhoer, Ngaq-anr lavdaef naeqlaf-awq.

Yaerdawq-anr Ghoe-eu ו WAO

ו WAO

⁴¹ Ya’we Miqyaer-or! Nawq-euq ghawqshaq gaq-eu jeq khawf bi keuvle-awr, Nawq-euq dawq aertaq-euq lof-aer bibuq-ir naeqlaf-awq.

⁴² Khoernar-aq, ngar, nawq-euq dawq-anr ghoe-eu mirnae, Ngaq-anr dawqdoer ngaeqlar-eu deuq-anr aerkhofnya taef-a.

⁴³ Ngaq-euq khaqmae-anr nae yawtsaq yawdawr-euq dawq taq yurdovjir naeqlaf. Aqjeq mirnae aernar-aq, ngar, nawq-euq bifdawq-anr noeqtmq taq-euq ma.

⁴⁴ Ngar, nawq-euq zanrdawq tiqjawr-iq maqbyaer-aer, Li-eu maqbawni mqmaq maqbyav yarzir cantae ma.

⁴⁵ Ngar, nawq-euq maeqdawq-anr povtser-eu mirnae, Buq-ir-euq tsawrhaq lof-aer yadaef ma.

⁴⁶ Ngar, sanqpaq deuq-euq maeqshi, Nawq-euq dawqdzawr ngaeq-eu khawf, daq maqya ga-ar.

⁴⁷ Ngar-aq, ngar gaq-eu nawq-euq zanrdawq khofdawq-euq lafkhoer laqkhaqcaer ma.

⁴⁸ Ngar-aq, ngar gaq-eu nawq-euq zanrdawq khofdawq-euq gharduq, Ngaq-euq aqlaf bafdir-awr, Nawq-euq zanrtaq khoftaq-anr dzardzivdziv ma.

Daef-eu Jeq Bif-eu Yaerdawq ז ZAQYINAV

ז ZAQYINAV

⁴⁹ Nawq nae ngaq-anr noeqtmq-eu jeq bifnaeq laf-euq, Nawq-euq kuirlaf zaqkhav-anr bif-euq dawq-anr taqngaer naeqlaf.

⁵⁰ Nawq-euq dawq ngaq-anr daef-eu jeq bifnaeq laf-awr. Ngar shaqzanq daqluf ngae, ngaq-anr nuima bi sarlar-eu jeq pyeuf-eu mae.

⁵¹ Nuima huiq-eu deuq, ngaq-euq garkawv yawkhav-aer jaja-aer uir-eu mae. Aerkhawf, ngar, nawq-euq zanrdawq-anr maq byaerdzae.

⁵² Ya’we Miqyaer-or! Arhu nawq nae yarkhaq dar-euq gar, Ngar noeqkeuv-awr, ngar nuisar za-euq ma.

⁵³ Tsawrcawv deuq, nawq-euq zanrdawq-anr byaerdzae-eu mirnae, Nuima paer duidui-eu jeq, ngaq-anr uvlanr le-euq mir-a.

⁵⁴ Ngar tiqkhaeq daef-eu nymr-euq lafkhoer, nawq-euq zanrtaq khoftaq-aq, Ngaq-euq cardawq pyeuf-eu mae.

⁵⁵ Ya’we Miqyaer-or! Uqcif paw, ngar, nawq-euq tsawrmyanr-anr noeqkeuv-awr, Nawq-euq zanrdawq-anr mrcaw-eu ma.

⁵⁶ Ngar, nawq-euq maeqdawq-anr mrcaw-euq mirnae, Ngar guiqlanq heu-anr za-euq ma.

Yaerdawq-anr Maqngaer ח HEV

ח HEV

⁵⁷ Ya’we Miqyaer-or! Nawr-aq, ngaq-euq shaqbymr ma. Ngar, nawq-euq dawq-anr mrcaw ma laer ngar sarjax dzaq ma.

⁵⁸ Ngaq-euq nuima dawqtawvluf, Nawq-euq ghoer mr-eu jeq-anr tanqshar-eu ma. Nawq nae sarjax dzaqtaq-euq lof-aer, Ngaq-anr ghawqshaq gaqnaeq laf-awq.

⁵⁹ Ngar, ngaq-euq garma deuq-euq garkawv shaernoeq-awr, Ngaq-euq aqkuir nawq-euq dawqdzawr jav-eu paw ciqpyawrlaf ma.

⁶⁰ Ngar maq nyinaqni yawkawr-aer, Nawq-euq zanrdawq khofdawq-anr mrcaw ma.

⁶¹ Tsawrcawv-euq arcav, ngaq-anr lanrju lof-aer khmrpaf lar-eu khawf, Ngar, nawq-euq zanrdawq-anr maqngaer.

⁶² Ngar, uqcif saerghanr tur-awr, nawq-anr jaceuq ma. Aqjeq mirnae aernar-aq, Nawq-euq yarkhaq dar-eu jeq-aq, tsaq-awr dawr-eu mae.

⁶³ Ngar-aq, nawq-euq maeqdawq-anr khar mrcaw-eu deuq hawr-eu, Nawq-anr guv-eu yawqghaq navluf naeq-aer cawq cawq-eu ma.

⁶⁴ Ya’we Miqyaer-or! Nawq-euq maqbyov-ir ni gaq-eu jeq, mirtsaq-euq khoertav byanluf-eu mae. Nawq-euq zanrtaq khoftaq, ngaq-anr maeqnaeq laf-awq!

Poeq-eu Yaerdawq ט TER

ט TER

⁶⁵ Ya’we Miqyaer-or! Nawr, nawq-euq dawq aertaq-euq lof-aer, Nawq-euq kuirlaf zaqkhav-anr yawmuiq-aer janrnaeq laf-eu mae.

⁶⁶ Ngar, nawq-euq zanrdawq khofdawq-anr jan-eu mirnae, Ngaq-anr yarkhaq yawmuiq-aer dar-eu jeq hawr-eu siqnya-eu tsawrganr maeqnaeq laf-awq.

⁶⁷ Ngar, shaqzanq yadaq-euq maeqhu, Garbanq banqyaf-euq khawf, nymq-mr-aq, Ngar, nawq-euq dawq-anr mrcaw-eu ma.

⁶⁸ Nawr-aq, muiq-awr yawmuiq jeq mr-eu mae. Ngaq-anr, nawq-euq zanrtaq khoftaq maeqnaeq laf-awq.

⁶⁹ Janrghae-eu tsawrhaq jaqmyawf myawf-awr, ngaq-anr aerdoer-eu khawf, ngaq-euq nuima dawqtawvluf, Nawq-euq maeqdawq-anr mrcaw ma.

⁷⁰ Aqyawf maf-euq nuima shaqtsur lof-aer shaqnar maqnoeq-eu khawf, Ngar, nawq-euq zanrdawq-euq lafkhoer laqkhaq caer-eu ma.

⁷¹ Ngar, nawq-euq zanrtaq khoftaq-anr dzawgeuf-eu gharduq, Ngaq nae shaqzanq yadaq-euq khoer-aq, yawmuiq mae.

⁷² Nawq-euq khaqmae-anr nae dovle-euq zanrdawq-aq, Pyur hawr-eu shuir marbyav artanr armyaer byav navmaqtser muiqdzaeq-eu mae.

Yaerdawq Dzardziv Dziv-eu י YOR

י YOR

⁷³ Nawq-euq aqlaf nae, ngaq-anr bae-awr taevmuiq naeqlaf-euq mae. Ngar, nawq-euq zanrdawq khofdawq-anr dzawgeuf nya’ni, ngaq-anr ghovshaw nya-eu jeq bifnaeq laf-awq.

⁷⁴ Ngar, nawq-euq dawq-anr noeqtmq-eu mirnae, Nawq-anr guv-eu tsawrhaq deuq, ngaq-anr mawr ngae, laqkhaqcaer taef-a.

⁷⁵ Ya’we Miqyaer-or! Nawq-euq yarkhaq dar-eu jeq-aq, tsaq-awr dawr-eu mae laer ngar siqnya ma. Nawr sarjax zif-eu lafkhoer, ngaq-anr shaqzanq bi keuvle-euq mae.

⁷⁶ Nawq-euq kuirlaf zaqkhav-anr, nawq nae sarjax biftaq-euq lof-aer, Maqtsaev-ir nya-eu nawq-euq gaq-eu jeq nae, Ngaq-anr nuima lavsar naeqlaf-awq laer ngar shar ma.

⁷⁷ Nawq-euq zanrdawq, ngaq-euq laqkhaq caer-eu jeq pyeuf-eu mirnae, Ngar yawdaef yadaefni, nawq-euq ghawqshaq gaq-eu jeq, Ngaq-anr bi keuvle laf-awq.

⁷⁸ Janrghae-eu tsawrhaq deuq, Ngaq-anr maqtsaq maqdawr-eu lafkhoer mrbanq naeqlaf-euq mirnae, Aqyawf maf-anr shafdawr-ir paq-aer janrnaeq-awq; Ngar ghaq-aq, nawq-euq maeqdawq-anr dzardziv dziv ma.

⁷⁹ Nawq-anr guv-eu tsawrhaq deuq, Nawq-euq dawqdzawr-anr siqnya-eu deuq, Ngar jawr-eu paw ciqpyawrlaf luf-ur.

⁸⁰ Ngar daq maqya ga paq-aer, Nawq-euq zanrtaq khoftaq-euq lafkhoer, Ngaq-euq nuima khoerheu aerkhar maqza’ni bijav luf-ur.

Noeqtmqduq Pyeuf-eu Yaerdawq כ KAR

כ KAR

⁸¹ Ngaq-euq nuima saflar, Nawq-euq kakhof-eu jeq-anr za’mawf duidui-awr; Ngar, nawq-euq dawq-anr noeqtmq-eu ma.

⁸² Nawq-euq dawq-anr haw-eu baqda’nae, Ngaq-euq myavnuiv, ghaq baqlar taq-euq mir-a; Ngar narhaq-eu, “Nawr, ngaq-euq nuima, aqmyan bi sarlar-eu laer ghae-eu le?”

⁸³ Aqjeq mirnae aernar-aq, Ngar uqkhoeq zawler-euq shaqkhov irpuq-anr dur-eu mir-a; Aerkhawf, ngar, nawq-euq zanrtaq khoftaq-anr maqngaer-aq.

⁸⁴ Nawq-euq kuirlaf zaqkhav armyav nan yadaef-eu la? Ngaq-anr khaeq-awr khav-eu tsawrhaq deuq-anr, Nawr yarkhaq aqmyan darnaeq-eu laer ghae-eu le?

⁸⁵ Janrghae-eu tsawrhaq, ngar bi gasaef-eu laer duqkhanq khanqtaq-euq mae; Aqyawfmaf, nawq-euq zanrdawq-anr maq daefcaw-a.

⁸⁶ Nawq-euq zanrdawq khofdawq dawqtawvluf zif duidui-eu mae. Ngaq-anr cawba naeqlaf-awq. Aqyawfmaf, maqtsaq maqdawr-eu lafkhoer, Ngaq-anr khaeqluf khavluf-eu mae.

⁸⁷ Ngar, mirtsaq-euq khoertav maqya daefni, Aqyawfmaf nae bi lavbyov-euq law mir-a. Aerkhawf, ngar, nawq-euq maeqdawq-anr maq byaerdzae-aq.

⁸⁸ Ngar, nawq-euq khaqmae-anr nae dovle-euq dawqdzawr-anr mrcaw nya’ni, Nawq-euq maqtsaev-ir ni gaq-eu jeq-euq lafkhoer, Daef-eu jeq bifnaeq laf-awq.

Yaerdawq-anr Maqngaer ל LAQMER

ל LAQMER

⁸⁹ Ya’we Miqyaer-or! Nawq-euq dawq-aq, mqmaq maqbyav yarzir mq-euq khoertav lavzif taq-euq mae.

⁹⁰ Nawr sarjax zif-eu jeq tiqzir sair tiqzir zif-awr, Nawq nae ciqtsaq taq-euq mirtsaq tanqkhawr maqpov maqparni jav-eu mae.

⁹¹ Nawq nae kadar naeq-euq baqda’nae, iqnan keuvni zifluf-eu mae. Aqjeq mirnae aernar-aq, Yawqjeq navluf nawq-euq kuirlaf zaqkhav pyeuf-eu mae.

⁹² Ngar, nawq-euq zanrdawq-anr laqkhaq maqcaer-euq lawnmr-aq, Ngar shaqzanq daqluf ngae yacawv-ir-eu mae.

⁹³ Nawr, nawq-euq maeqdawq-anr ghoe-awr nae, Ngaq-anr daef-eu jeq bifnaeq laf-eu mirnae; Ngar, nawq-euq dawq-anr tiqjawr-iq maqngaer.

⁹⁴ Ngar-aq nawq-euq ma; Ngaq-anr kakhof naeqlaf-awq. Aqjeq mirnae aernar-aq, ngar, nawq-euq maeqdawq-anr sharpov ma.

⁹⁵ Tsawrcawv deuq, ngaq-anr lavcawv-eu laer gayuf-awr lofluf-eu khawf, Ngar, nawq-euq dawqdzawr-anr sharnoeq sharsawx ma.

⁹⁶ Ngaq nae ya’mawr-euq-aq, Yawqjeq navluf byan-awr kuf-eu khoer-aq, yawdui baw-eu mae. Aerkhawf, nawq-euq zanrdawq khofdawq-aq, jerloni ghae-eu mae.

Yaerdawq-euq Baqda’nae Dzaeq-eu מ MEM

מ MEM

⁹⁷ Or-oq, ngar, nawq-euq zanrdawq-anr arnavni gaq-eu nga! Nan’ga-i ngar, nawq-euq zanrdawq-anr dzardziv dziv-eu ma.

⁹⁸ Ngaq naeq-aer aqmyanluf, nawq-euq zanrdawq khofdawq jav-eu mirnae, Ngar, ngaq-anr muir-eu deuq-euq navmaqtser ganrdzaeq ma.

⁹⁹ Ngar, nawq-euq dawqdzawr deuq dzardziv dziv-eu mirnae, Ngar, ngaq-anr maeq-euq deuq dawqtawvluf navmaqtser ghovshawnya dzaeq-eu ma.

¹⁰⁰ Ngar, nawq-euq maeqdawq-anr mrcaw-eu mirnae, Ngar, tsawrmawq deuq-euq navmaqtser ghovshawnya dzaeq-eu ma.

¹⁰¹ Ngar, nawq-euq dawq-anr mrcaw mawf-eu mirnae, Yawdoer garma yawqkanr navluf-anr nae, Ngaq-euq aqkuir cawqkhof-eu ma.

¹⁰² Nawr, ngaq-anr maeqnaeq laf-euq mirnae, Ngar, nawq nae yarkhaq dar-euq jeq-anr maq byaerdzae-aq.

¹⁰³ Nawq-euq dawq-anr ngar myeufhaw ngae, arnavni coer-eu nya! Ngaq-euq khaqmae-euq gharduq, byaquir navmaqtser coer nya!

¹⁰⁴ Ngar, nawq-euq maeqdawq-euq baqda’nae, ghovshawnya lar-euq mirnae, Ngar, maqtsaq maqdawr-eu garma yawqkanr navluf-anr byae nya.

Yaerdawq-euq Yawshaef נ NUQ

נ NUQ

¹⁰⁵ Nawq-euq dawq-aq, ngaq-euq aqkuir-euq gharduq tsirkhmq pyeuf-awr, Ngaq-euq garma-anr yawshaef pyeuf-eu mae.

¹⁰⁶ Ngar, nawq-euq tsaq-awr dawr-euq zanrsanrkhof mrcaw ma laer, Kamq-awr yawduq lavbaw-euq ma.

¹⁰⁷ Ya’we Miqyaer-or! Ngar shirtaw taeqni ya daqluf-eu gar; Nawq-euq dawq aertaq-euq lof-aer, Ngaq-anr lavdaef naeqlaf-awq.

¹⁰⁸ Ya’we Miqyaer-or! Ngar, nawq-anr nuima keuv-eu lafkhoer ngaq-euq khaqmae nae, Jaceuq-eu jeq lawrnaeq-eu gar hageuf naeqlaf-awr, Nawq-euq yarkhaq dar-eu jeq, ngaq-anr maeqnaeq laf-awq.

¹⁰⁹ Aqmyanluf, ngar, ngaq-euq daefzir, Ngaq-euq aqlaf-euq lafkhoer yurluf-eu ma. Aerkhawf, ngar, nawq-euq zanrdawq-anr maqngaer.

¹¹⁰ Tsawrcawv, ngaq-anr lanrju khmrtaq-euq mae. Aerkhawf, ngar, nawq-euq maeqdawq-anr nae maq canbyov.

¹¹¹ Nawq-euq dawqdzawr-aq, ngaq-euq nuima gharduq laqkhaq caer-eu jeq pyeuf-eu mirnae, Mqmaq maqbyav yarzir ngaq-euq jeqbir pyeuf-eu mae.

¹¹² Ngar, mqmaq maqbyav yarzir arsaqsaq ngae keuvni, Ngaq-euq nuima, nawq-euq zanrtaq khoftaq-anr hageuf-awr mrcaw ma.

Yaerdawq-anr Mrcaw Ma ס SAQMEV

ס SAQMEV

¹¹³ Ngar, nuima nyiq siq tsof-awr povpov lavlav-aer ghae-eu tsawrhaq-anr byae nya. Aerkhawf, ngar, nawq-euq zanrdawq-anr gaq-eu ma.

¹¹⁴ Nawr-aq, ngar caevzafduq hawr-eu ngaq-euq daeqdaqduq pyeuf-awr, Ngar, nawq-euq dawq-anr noeqtmq ma.

¹¹⁵ Yawdoer jeq mr-eu tsawrhaq deuq-or! Caev-awq, ngaq-euq dawqpae taqjawr. Aqjeq mirnae aernar-aq, Ngar, ngaq-euq Miqyaer-euq zanrdawq khofdawq-anr mrcaw ma!

¹¹⁶ Ngar yawdaef yadaefni, nawq-euq dawq aertaq-euq lof-aer, Ngaq-anr nyaefcuf naeqlaf. Ngaq nae noeqtmq-euq jeq-euq lafkhoer daq taqbi ga naeqlaf.

¹¹⁷ Ngar yabuq-ir ni, ngaq-anr ciqtur naeqlaf-awq; Khoernar-aq, ngar, nawq-euq zanrtaq khoftaq-anr aqmyanluf cantae ma.

¹¹⁸ Nawr, nawq-euq zanrtaq khoftaq-anr nae garbanq banq-ir-euq deuq-anr byaerdzae-eu mae. Aqjeq mirnae aernar-aq, aqyawf maf-euq maershuir-aq, jaqmyawf pyeuf-eu mae.

¹¹⁹ Nawr, mirtsaq-euq tsawrcawv dawqtawv luf-anr, Javguv javmeuq lof-aer shadzae-eu mirnae, Ngar, nawq-euq dawqdzawr-anr gaq-eu ma.

¹²⁰ Ngar, nawq-anr guv-eu mirnae, ngaq-euq shiqshaq yawdzuqdzuq mir-a. Nawr yarkhaq dar-eu gar ngar yawkhav-aer guv nya.

Yaerdawq Maeqnaeqlaf ע AQYINAV

ע AQYINAV

¹²¹ Ngar, dawr-awr tsaq-eu jeq hawr-eu tsaq-awr dawr-eu jeq mr-euq ma. Ngaq-anr khaeqlar-eu deuq-euq lafkhoer taq byaerdzaeyaf naeqlaf.

¹²² Nawq-euq kuirlaf zaqkhav yawmuiq jeq za’ni yawduq lavbaw naeqlaf-awq; Nuima huiq-eu tsawrhaq deuq nae taqbi khaeqnaeqlaf.

¹²³ Nawq-euq kakhof-eu jeq hawr-eu nawq-euq tsaq-awr dawr-eu dawq-anr, Yawkhav-aer povtser-euq mirnae, ngaq-euq myavnuiv, myavghaq baq mir-a.

¹²⁴ Nawq-euq kuirlaf zaqkhav-anr, Nawq-euq ghawqshaq gaq-eu jeq-anr geuxni janrnaeq laf-awr, Nawq-euq zanrtaq khoftaq maeqnaeq laf-awq.

¹²⁵ Ngar-aq, nawq-euq kuirlaf zaqkhav ma; Ngar, nawq-euq dawqdzawr-anr siqnya larni, Ngaq-anr ghovshaw nya-eu jeq bifnaeq laf-awq.

¹²⁶ Ya’we Miqyaer-or! Tsawrhaqzaq, nawq-euq zanrdawq-anr yawqngaef laer sawxtaq-euq mirnae, Nawr tiqjeqpaq janr-eu aryamq tsaqlar-euq mae.

¹²⁷ Ngar, shuir-anr navmaqtser, muiq-eu shuir-anr navmaqtser, Nawq-euq zanrdawq khofdawq-anr gaq-eu ma.

¹²⁸ Khoermirnae, ngar, yawqjeq navluf-anr taf-eu nawq-euq maeqdawq dawqtawvluf tsaq-eu ngar-a laer noeqduq-awr, Ngar, jaqmyawf-euq garma yawqkanr navluf-anr byae-eu ma.

Yawshaef Bif-eu Yaerdawq פ PE

פ PE

¹²⁹ Nawq-euq dawqdzawr-aq, zanqler paq-aer muiq-eu mirnae, Ngaq-euq nuima saflar cantae-eu ma.

¹³⁰ Nawq-euq dawq urlar ngae yawshaef bif-awr, Maqdzaw-euq zaq-anr ghovshaw-eu jeq bif-eu mae.

¹³¹ Ngar, ngaq-euq khaqmae mrnga-awr safma ghawrluf-eu ma; Aqjeq mirnae aernar-aq, Ngar, nawq-euq zanrdawq khofdawq-anr yawkhav-aer za’mawf nya.

¹³² Nawr, nawq-euq tsawrmyanr-anr gaq-eu tsawrhaq deuq-anr, Ngaeqghae naeq-eu zanrsanrkhof jav-eu lof-aer, Ngaq-anr haw-awr, ngaq-anr ghawqshaq gaqnaeq laf-awq.

¹³³ Ngaq-euq kuirtof-anr, nawq-euq dawq nae lavzif naeqlaf-awr, Yawlaeq yawca jeq aqgeu jeq nae maqkaq ngaq-anr taqbi ghaqlar naeqlaf.

¹³⁴ Ngar, nawq-euq maeqdawq-anr mrcaw nya’ni, Ngaq-anr khaeqlar-eu tsawrhaq-anr nae kakhof naeqlaf-awq.

¹³⁵ Nawq-euq kuirlaf zaqkhav-euq khoertav, Nawq-euq myavpyawq-euq yawshaef bya’naeq lef-awr, Nawq-euq zanrtaq khoftaq, ngaq-anr maeqnaeq laf-awq.

¹³⁶ Tsawrhaqzaq, nawq-euq zanrdawq-anr maq daefcaw-eu mirnae, Ngaq-euq myavnuiv-anr nae myavbir lawrgawv yoerluf-eu mae.

Sarjax Zif-eu Yaerdawq צ SADE

צ SADE

¹³⁷ Ya’we Miqyaer-or! Nawr-aq, tsaq-awr dawr-eu mirnae, Nawr yarkhaqdar ngae dawrcoeni dar-eu mae.

¹³⁸ Nawq nae bif-euq dawq, nawq-euq dawqdzawr-aq, Tsaq-awr dawr-eu uqtaf, sarjax zif duidui-eu mae.

¹³⁹ Ngaq-anr muir-eu deuq, nawq-euq dawq-anr ngaer-eu mirnae, Ngar nuima keuv-eu jeq, miqdzaq dofluf-eu lof-aer javluf mir-a.

¹⁴⁰ Nawq-euq dawq-aq, shawr duidui-eu mae. Khoermirnae, nawq-euq kuirlaf zaqkhav, nawq-euq dawq-anr gaq-eu ma.

¹⁴¹ Aqcawq, ngaq-anr taqnyir-awr hawdoer-eu khawf, Ngar, nawq-euq maeqdawq-anr maqngaer.

¹⁴² Nawq-euq tsaq-awr dawr-eu jeq-aq, Mqmaq maqbyav yarzir gmq-eu, tsaq-awr dawr-eu jeq pyeuf-awr; Nawq-euq zanrdawq-aq, yawtsaq yawdawr mae.

¹⁴³ Ngar, gardzaq garkawv hawr-eu nuima cawv duidui-eu jeq nae bi taemi-euq khawf, Nawq-euq zanrdawq khofdawq-aq, Ngaq-euq laqkhaq caerduq pyeuf-eu mae.

¹⁴⁴ Nawq-euq dawqdzawr-euq tsaq-awr dawr-eu jeq-aq, Mqmaq maqbyav yarzir zif-eu mae; Ngar yawdaef yadaefni, ngaq-anr ghovshaw nya-eu jeq bifnaeq laf-awq.

Yaerdawq Dzardziv Dziv-eu ק KOR

ק KOR

¹⁴⁵ Ya’we Miqyaer-or! Ngaq-anr narhaq naeqlaf-awq! Ngaq-euq nuima dawqtawvluf, Nawq-anr gur-awr sharluf-eu ma. Ngar, nawq-euq zanrtaq khoftaq-anr mrcaw ma.

¹⁴⁶ Ngar, nawq-anr gur-awr sharluf-eu ma; Ngaq-anr kakhof naeqlaf-awq, Ngar, nawq-euq dawqdzawr-anr mrcaw ma.

¹⁴⁷ Ngar, uqshawq paw nanrma maq dovlar-euq minav-aer tur-awr, Ngaq-anr cawba naeqlaf laer gurluf-eu ma; Ngar, nawq-euq dawq-anr noeqtmq ma.

¹⁴⁸ Ngar, nawq-euq dawq-anr dzardziv dziv-eu mirnae, Uqcif mirlan-aer ngaq-euq myavnuiv byaeluf-eu ma.

¹⁴⁹ Ya’we Miqyaer-or! Nawr ghawqshaq gaqnya-eu gar tsaqni, Ngaq-euq tersar-anr narhaq naeqlaf-awq; Nawr, dawr-awr tsaq-eu gar geuxni, ngaq-anr lavdaef naeqlaf-awq.

¹⁵⁰ Nawq-euq zanrdawq-anr nae garmanr kaq-eu gar jawr-awr, Yawdoer jeq-euq maeqnan cantae-eu tsawrhaq deuq, Ngaq-euq dawqpae oeluf-eu mae.

¹⁵¹ Ya’we Miqyaer-or! Nawr dawqpae jawrluf-eu mae; Nawq-euq zanrdawq khofdawq dawqtawvluf yawtsaq yawdawr mae.

¹⁵² Nawq-euq dawqdzawr-euq garkawv, mqmaq maqbyav yarzir zifni, Dawqpaeq lavzif taq-euq mae laer, Ngar arhuba nae siqnya-euq ma.

Yaerdawq-aq, Yawtsaq Yawdawr Mae ר LERSHAV

ר LERSHAV

¹⁵³ Ngar, nawq-euq zanrdawq-anr maqngaer-eu mirnae, Ngar shaqzanq ya daqluf-eu garkawv sharnoeq naeqlaf-awr, Ngaq-anr kakhof naeqlaf-awq.

¹⁵⁴ Ngaq-anr yarkhaq jadan naeqlaf-awr, Ngaq-anr kakhofdov naeqlaf-awq; Nawq-euq dawq aertaq-euq lof-aer, Ngaq-anr lavdaef naeqlaf-awq.

¹⁵⁵ Tsawrcawv deuq-aq, nawq-euq zanrtaq khoftaq-anr maqpov-eu mirnae, Kakhof-eu jeq-anr nae garmanr kaq-eu gar jawr-eu mae.

¹⁵⁶ Ya’we Miqyaer-or! Nawr nanqyuni ghawqshaq gaq-eu jeq huiq duidui mae; Nawr yarkhaq dar-eu gar tsaqni, ngaq-anr lavdaef naeqlaf-awq.

¹⁵⁷ Ngaq-anr muir-eu deuq hawr-eu, Ngaq-anr khaeq-awr khav-eu deuq, myaq duidui-eu khawf, Ngar, nawq-euq dawqdzawr-anr nae yawqpawyawq maq ciqpyawr.

¹⁵⁸ Ngar, sarjax maqzif-eu deuq-anr, hawmawr-awr nuima dav duidui nya; Aqjeq mirnae aernar-aq, aqyawfmaf, nawq-euq dawq-anr maqmr caw-a.

¹⁵⁹ Ngar, nawq-euq maeqdawq-anr arnavni gaq-eu nga laer sharnoeq naeqlaf-awr; Ya’we Miqyaer-or! Nawr ghawqshaq gaqnya-eu gar tsaqni, ngaq-anr lavdaef naeqlaf-awq.

¹⁶⁰ Dawqtawv-euq uqduq aer ngae, Nawq-euq dawq-aq, yawtsaq yawdawr mae; Nawq nae tsaq-awr dawr-eu lafkhoer yarkhaq khardar-eu jeq-aq, mqmaq maqbyav yarzir gmq-eu mae.

Yaerdawq-anr Laqkhaq Caer-eu ש SHIQNAV

ש SHIQNAV

¹⁶¹ Dzoeqda deuq, ngar tiqjeq-iq maqlaeq-eu gar, ngaq-anr khaeqlar-eu khawf, Ngaq-euq nuima-aq, nawq-euq dawq-anr yawkhav-aer zanqler mir-a.

¹⁶² Pyurpanq shuirpanq mawr-euq tsawrhaq tiq ghaq laqkhaq caer-eu lof-aer, Ngar, nawq-euq dawq-anr laqkhaq caer-eu ma.

¹⁶³ Ngar, jaqmyawf myawf-eu jeq-anr nuidav dav-awr byae-eu ma. Aerkhawf, ngar, nawq-euq zanrdawq-anr gaq-eu ma.

¹⁶⁴ Nawr yarkhaq dar-eu tsaq-awr dawr-eu mirnae, Ngar, nawq-anr tiq nan shif pov jaceuq ma.

¹⁶⁵ Nawq-euq zanrdawq-anr gaq-eu deuq-aq, Nuisar of-eu jeq huiq duidui-awr, Tiqjeq-iq, aqyawf maf-anr sanqtif maqbi tifler nya-a.

¹⁶⁶ Ya’we Miqyaer-or! Ngar, nawq-euq kakhof-eu jeq-anr noeqtmq-awr, Ngar, nawq-euq zanrdawq khofdawq mrcaw luf-eu ma.

¹⁶⁷ Ngar, nawq-euq dawqdzawr-anr yawkhav-aer gaq-awr, Ngaq-euq nuima saflar nae cantae luf-eu ma.

¹⁶⁸ Ngaq-euq garma dawqtawvluf, nawq-euq maeqshi jav-awr, Ngar, nawq-euq maeqdawq hawr-eu dawqdzawr-anr mrcaw luf-eu ma.

Yaerdawq-anr Tsergeuf-eu ת TAO

ת TAO

¹⁶⁹ Ya’we Miqyaer-or! Ngar gur-awr shar-eu nawr jawr-eu gar bi larkeuv naeqlaf-awq. Nawq-euq dawq aertaq-euq lof-aer, Ngaq-anr ghovshaw nya-eu jeq bifnaeq laf-awq.

¹⁷⁰ Ngaq nae tanqshar-euq dawq, Nawq-euq maeqshi bi larkeuv-awr; Nawq-euq dawq aertaq-euq lof-aer, ngaq-anr bibuq-ir naeqlaf-awq.

¹⁷¹ Nawr, ngaq-anr zanrtaq khoftaq maeqnaeq laf-euq mirnae, Ngaq-euq maeqluq-anr nae jaceuq-eu dawqkawq bi yoerdovlef ma.

¹⁷² Nawq-euq zanrdawq khofdawq dawqtawvluf, Tsaq-awr dawr-eu mirnae, ngaq-euq maeqlar, Nawq-euq dawq-euq garkawv ngaeq ma.

¹⁷³ Ngar, nawq-euq maeqdawq-anr tsergeuf-eu mirnae, Nawq-euq aqlaf, ngaq-anr cawba naeqlaf-awq.

¹⁷⁴ Ya’we Miqyaer-or! Ngar, nawq-euq kakhof-eu jeq-anr lofluf-eu ma; Nawq-euq zanrdawq-aq, ngaq-euq laqkhaq caerduq pyeuf-eu mae.

¹⁷⁵ Ngaq-euq nuima saflar, nawq-anr jaceuq nya’ni, Yawdaef bidaef naeqlaf-awq; Nawq nae yarkhaq dar-euq jeq, ngaq-anr bi cawba naeqlaf-awq.

¹⁷⁶ Ngar, nawq-euq zanrdawq khofdawq-anr maqngaer-euq mirnae, Byov-ir-euq yawrzaq lof-aer garma canbanq taq-euq, Nawq-euq kuirlaf zaqkhav-anr povkhofle naeqlaf-awq.