Jaceuq 118 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Ya’we Miqyaer Muiq-eu Mirnae Jaceuq-eu

¹ Or-oq, Ya’we Miqyaer-aq, muiq-eu mirnae, Aqyawf-euq guiqlanq-anr jaceuq-awq! Aqyawf-euq ghawqshaq gaq-eu jeq-aq, mqmaq maqbyav yarzir zif-eu mae.

² Irsaqleqlav tsawrhaq deuq heulof-aer bi’aer-awq. “Aqyawf-euq ghawqshaq gaq-eu jeq-aq, mqmaq maqbyav yarzir zif-eu mae.”

³ Aqloq-euq nymrkhanqzaq heulof-aer bi’aer-awq, “Aqyawf-euq ghoer-awr gaq-eu jeq-aq, mqmaq maqbyav yarzir zif-eu mae.”

⁴ Ya’we Miqyaer-anr guv-eu deuq heulof-aer bi’aer-awq, “Aqyawf-euq ghoer-awr gaq-eu jeq-aq, mqmaq maqbyav yarzir zif-eu mae.”

⁵ Ngar nuima cawvluf ngae, Ya’we Miqyaer-anr kur-euq ma. Aqyawf, ngaq-anr narhaq naeqlaf-awr, Jerloni ghae-eu gar sheuqtaq naeqlaf-euq mae.

⁶ Ya’we Miqyaer, ngar jawr-eu paw jawr-eu mirnae, Ngar tiqjeq-anr-iq maqguv. Tsawrhaqzaq, ngaq-anr aqjeq janrlar nya-eu?

⁷ Ngaq-anr cawba-eu deuq-euq lafkhoer, ngaq-euq paw pyawq-eu ghaq-aq, Ya’we Miqyaer mae. Khoermirnae, ngar bi pyeuflar mawf-eu lof-aer, Ngaq-anr byae-eu deuq-euq khoertav keuvle-eu gar ya’mawr taef-a.

⁸ Tsawrhaqzaq-anr ghoe-eu navmaqtser, Ya’we Miqyaer-anr lafjeuq shar-eu-aq, muiqdzaeq-eu mae.

⁹ Dzoeqda deuq-anr ghoe-eu navmaqtser, Ya’we Miqyaer-anr ghoe-eu-aq, muiqdzaeq-eu mae.

¹⁰ Tsawrjeuq dawqtawvluf, ngaq-anr gajawq taq-euq mae. Aerkhawf, ngar, Ya’we Miqyaer-euq tsawrmyanr-anr ghoe-awr nae, Aqyawf maf-anr lavcawv ma.

¹¹ Aqyawfmaf, ngaq-anr gajawq taq-euq mae. Euq, aqyawfmaf, ngaq-anr gajawq taq-euq mae. Aerkhawf, ngar, Ya’we Miqyaer-euq tsawrmyanr-anr ghoe-awr nae, Aqyawf maf-anr lavcawv ma.

¹² Aqyawfmaf, byaq baqmaf lof-aer ngaq-anr gajawq taq-euq mae. Aerkhawf, aqgan bawduv-anr miqdzaq puiv-eu lof-aer, Tiqkhaeq larkhaeq taef-aer aqyawf maf-anr puivdzaqjir taef-a. Aqjeq mirnae aernar-aq, Ngar, Ya’we Miqyaer-euq tsawrmyanr-anr ghoe-awr nae, Aqyawf maf-anr lavcawv ma.

¹³ Aqyawfmaf, ngar gacoq paq-aer ngaq-anr yawkhav-aer daeqcoq lar-eu khawf, Ya’we Miqyaer, ngaq-anr cawba naeqlaf-euq mae.

¹⁴ Ya’we Miqyaer-aq, ngaq-euq ghaq hawr-eu ngaq-euq cardawq pyeuf-awr, Ngaq-anr bibuq-ir-eu ghaq khawf pyeuflar-euq mae.

¹⁵ Tsaq-awr dawr-eu tsawrhaq-euq saeqghawv-euq lafkhoer, Kakhof-eu jeq za-awr laqkhaq caer-eu tersar byanluf-eu mae. Ya’we Miqyaer-euq armar laf nae, Yawmuiq paq-aer deuvghaq-euq mae.

¹⁶ Ya’we Miqyaer-euq armar laf-aq, bi bafgor taq-euq mae. Ya’we Miqyaer-euq armar laf nae, Yawmuiq paq-aer deuvghaq-euq mae.

¹⁷ Ngar maq shirbyovni daef-awr, Ya’we Miqyaer nae mr-euq gardeuq-euq garkawv dawqdzawr mr ma.

¹⁸ Ya’we Miqyaer, ngaq-anr yawkhav-aer diqdiq-aer maeqpar naeqlaf-euq mae. Aerkhawf, aqyawf, ngaq-anr shir-eu gar maqbi keuv naeqlaf-aq.

¹⁹ Ngaq-anr tsaq-awr dawr-eu larghov deuq pannaeq laf-awq. Ngar urler-awr, Ya’we Miqyaer-anr jaceuqler ma.

²⁰ Heu-aq, tsaq-awr dawr-eu tsawrhaq urler-eu, Ya’we Miqyaer-euq larghov mae.

²¹ Nawr, ngaq-euq shardawq-anr narhaq naeqlaf-awr, Ngaq-euq gharduq kakhof-eu jeq pyeufnaeq laf-euq mirnae, Ngar, nawq-anr jaceuq ma.

²² Nymr tsov-eu deuq nae bafdzae taq-euq khaqlo khoersiq, Lafcoer-euq lozif pyeuflar-euq mae.

²³ Ya’we Miqyaer nae heulof-aer janr-euq mae. Heu-aq, aqdui-euq myavnuiv-euq gharduq arnavni zanqler paq-aer ghae-eu nga.

²⁴ Arnan heunan-aq, Ya’we Miqyaer nae bae-euq mae. Aqdui laqkhaq caer-awr lurgha caergha kar-eur.

²⁵ Ya’we Miqyaer-or! Ngar, nawq-anr guiqlanqshar ma. Bibuq-ir naeqlaf-awq. Ya’we Miqyaer-or! Ngar, nawq-anr guiqlanqshar ma. Bimuiq bi sanrlar naeqlaf-awq.

²⁶ Ya’we Miqyaer-euq tsawrmyanr-euq uqmov oeluf-eu ghaq-aq, guiqlanqhuiq luf-ur! Ya’we Miqyaer-euq nymr-anr nae, Nga’maf, nawq-anr dawq ngaeqghae naeq-eu ma.

²⁷ Miqyaer-aq, Ya’we Miqyaer pyeuf-eu mae. Aqyawf, aqdui-anr yawshaef bifnaeq laf-euq mae. Lawr-eu laer ghae-eu jeq-anr arcav nae tsanrlaf-awr, Lawrduq-euq lafcoer-euq uqcoer-anr paftawftaq ler-awq.

²⁸ Nawr-aq, ngaq-euq Miqyaer mae. Ngar, nawq-anr jaceuq ma. Nawr-aq, ngaq-euq Miqyaer mae. Ngar, nawq-anr ciqpoeq ciqgor ma.

²⁹ Or-oq, Ya’we Miqyaer-euq guiqlanq-anr jaceuq-awq. Aqjeq mirnae aernar-aq, Miqyaer-aq, yawmuiq mae. Aqjeq mirnae aernar-aq, Aqyawf-euq ghawqshaq gaq-eu jeq-aq, mqmaq maqbyav yarzir zif-eu mae.