Jaceuq 116 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Ngar, Ya’we Miqyaer-anr Gaq Mir-a

¹ Ngar, Ya’we Miqyaer-anr gaq mir-a. Aqjeq mirnae aernar-aq, aqyawf, ngar tanqshar-eu gar hawr-eu ngaq-euq tersar-anr narhaq naeqlaf-eu mae.

² Aqyawf-euq naqbawr, ngaq-anr ciqkhmr naeqlaf-eu mirnae; Ngar khardaef-eu khoerkeuvni, ngar, aqyawf-anr kur ma.

³ Ngar, gardzaq garkawv hawr-eu nuima cawv-eu jeq-anr ya’mawr-awr; Ngaq-anr shir-eu jeq-euq lanrju khmrjawq taq-euq uqtaf; Ngaq-anr shiqbuir lanma-euq gawr-eu jeq, nyaeftaeq taq-euq mae.

⁴ Khoerngae, ngar, Ya’we Miqyaer-euq tsawrmyanr kur-awr aer-eu, “Ya’we Miqyaer-or! Ngaq-euq nuima saflar-anr bibuq-ir naeqlaf laer ngar, nawq-anr shar-eu ma.”

⁵ Ya’we Miqyaer-aq, guiqlanq yawdzanr byan-awr, tsaq-awr dawr-eu mae. Aqdui-euq Miqyaer-aq, ghawqshaq gaqnya-eu mae.

⁶ Ya’we Miqyaer-aq, maqdzaw-euq zaq-anr hawpir-awr; Ngar yaw’aw-anr gaka ngae, aqyawf, ngaq-anr bibuq-ir naeqlaf-euq mae.

⁷ Ngaq-euq nuima saflar-or! Nawq-euq ghaqnaq naqduq-anr ghofkhof ler-awq. Aqjeq mirnae aernar-aq, Ya’we Miqyaer, nawq-anr yawkhav-aer muiqnaeq laf-euq mae.

⁸ Nawr, ngaq-euq nuima saflar-anr shir-eu jeq-anr nae bibuq-ir naeqlaf-awr; Ngaq-euq myavnuiv myavbir bi tsirler naeqlaf-euq uqtaf; Ngaq-euq aqkuir sanqtif maqbi tifni bibuq-ir naeqlaf-euq mae.

⁹ Ngar, daef-eu tsawrhaq jawr-eu mirtsaq-anr, Ya’we Miqyaer-euq maeqshi can ma.

¹⁰ Ngar heulof-aer ngaeq ngae khawf, ngar jan-euq ma. “Ngar shaqzanq naf duiduiluf nya.”

¹¹ Ngar yawkawr-aer ya’aer nar-aq, “Tsawrhaq dawqtawvluf jaqmyawf nga.”

¹² Ya’we Miqyaer, ngaq-anr muiqnaeq laf-euq dawqtawv luf-euq gharduq, Ngar, aqyawf-anr aqjeq ya janrkhof naeq-eu la?

¹³ Ngar kakhof-eu jeq-euq khmqmaq ciq-awr, Ya’we Miqyaer-euq tsawrmyanr-anr kur ma.

¹⁴ Aqyawf-euq tsawrhaq dawqtawv luf-euq maeqshi, Ngar, ngaq nae kamq-euq jeq, Ya’we Miqyaer-anr damqnaeq ma.

¹⁵ Ya’we Miqyaer-euq tsawrshawr deuq shir-eu-aq; Aqyawf-euq maeqshi zawr poeq-eu jeq pyeuf-eu mae.

¹⁶ Ya’we Miqyaer-or! Ngar-aq, aqdir nawq-euq kuirlaf zaqkhav ma; Ngar-aq, nawq-euq kuirlaf zaqkhav pyeuf-eu, nawq-euq aqbur zaqkhav-euq zaqyo ma. Nawr, ngaq-anr paftaq-euq shmrcav-anr puirpyaeq naeqlaf-euq mae.

¹⁷ Ngar, nawq-euq guiqlanq-anr jaceuq-eu lawrnaeq-eu jeq lawr-awr; Ngar, Ya’we Miqyaer-euq tsawrmyanr kur ma.

¹⁸ Aqyawf-euq tsawrhaq dawqtawv luf-euq maeqshi, Ngar, ngaq nae kamq-euq jeq, Ya’we Miqyaer-anr damqnaeq ma.

¹⁹ Yeqlursaqlaeq-or! Nawq-euq ghanrcae, Ya’we Miqyaer-euq nymr-euq povka damqnaeq ma. Haleluya!