Jaceuq 115 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Ya’we Miqyaer Hawr-eu Tanqpanq Aqma Mawrkawr

¹ Ya’we Miqyaer-or! Nga’maf-anr maqngeur-eu, nga’maf-anr maqngeur-eu; Nawq-euq tsawrmyanr yawshaef khanqsaer huiq luf-ur. Aqjeq mirnae aernar-aq, Nawq-euq ghawqshaq gaq-eu jeq hawr-eu, Nawq-euq yawtsaq yawdawr-euq baqda’nae mae.

² Aqjeq ghae-eu aqcawq tsawrjeuq heulof-aer narhaq-eu nga, “Aqyawf maf-euq Miqyaer aqgeugar jawr-eu la?”

³ Aerkhawf, aqdui-euq Miqyaer-aq, mq-euq khoertav jawr-awr; Aqyawf nuikhanr shir-eu jeq mr-eu mae.

⁴ Aqyawf maf-euq tanqpanq aqma mawrkawr-aq, pyur hawr-eu shuir nae janr-awr; Tsawrhaq-euq aqlaf nae taev-euq mawrkawr mae.

⁵ Khaqmae tsof-eu khawf, dawq maq ngaeqnya-aer; Myavnuiv tsof-eu khawf, maq mawrnya-a.

⁶ Naqbawr tsof-eu khawf, maq gaqnya-aer; Narmaerbanq tsof-eu khawf, maq baeflaf nya-a.

⁷ Aqlaf tsof-eu khawf, maq toeqciv nya-aer; Aqkuir tsof-eu khawf, maq cannya-eu uqtaf; Kuqbyanq-anr nae tersar maqbi dovlar nya-a.

⁸ Aqyawf maf-anr taev-euq deuq-aq, aqyawf maf-anr durlar-awr; Aqyawf maf-anr kharghoe-eu deuq khawf, khoerlof-aer pyeuf taef-a.

⁹ Irsaqleqlav-or! Ya’we Miqyaer-anr ghoe-awq. Aqyawf-aq, aqyawf maf-anr cawba-eu aqyawf maf-euq daeqdaqduq mae.

¹⁰ Aqloq-euq nymrkhanq-euq zaq-or! Ya’we Miqyaer-anr ghoe-awq. Aqyawf-aq, aqyawf maf-anr cawba-eu aqyawf maf-euq daeqdaqduq mae.

¹¹ Nawmaf, Ya’we Miqyaer-anr guv-eu deuq, Ya’we Miqyaer-anr ghoe-awq. Aqyawf-aq, aqyawf maf-anr cawba-eu aqyawf maf-euq daeqdaqduq mae.

¹² Ya’we Miqyaer, aqdui-euq garkawv sharnoeq-awr guiqlanq bi keuvle naeqlaf taef-a. Aqyawf, Irsaqleqlav-euq nymr-anr guiqlanq bi keuvle-awr; Aqyawf, Aqloq-euq nymr-anr guiqlanq bi keuvle taef-a.

¹³ Ya’we Miqyaer, huiqzaq nyirzaq maq tserpavni, aqyawf-anr guv-eu tsawrhaq-anr guiqlanq bi keuvle-eu mae.

¹⁴ Ya’we Miqyaer, nawmaf hawr-eu nawmaf-euq zaqdeuq-anr, tiqtiv sair tiqtiv bimyaq bi baerlar luf-ur.

¹⁵ Mq hawr-eu mir bae-euq Ya’we Miqyaer, Nawmaf-anr guiqlanq bi keuvle luf-ur.

¹⁶ Mq-aq, Ya’we Miqyaer-euq mq pyeuf-eu khawf, Mirtsaq tanqkhawr-aq, tsawrhaq-euq zaqdeuq-anr bifnaeq taq-euq mae.

¹⁷ Shir-euq tsawrhaq-aq, Ya’we Miqyaer-anr maqya jaceuq-a. Ciqcur savni ghae-eu jawrduq-anr irka-euq deuq khawf, maq jaceuq-a.

¹⁸ Aerkhawf, aqdui, Ya’we Miqyaer-anr jaceuq ma. Nymq-mr nae mqmaq maqbyav yarzir jaceuq ma. Haleluya!