Jaceuq 113 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Ya’we Miqyaer-anr Dur-eu Aqsur Ghaq Jawr-eu La?

¹ Haleluya! Ya’we Miqyaer-euq kuirlaf zaqkhav deuq-or! Jaceuq-awq. Ya’we Miqyaer-euq tsawrmyanr-anr jaceuq-awq!

² Nymq-mr nae mqmaq maqbyav yarzir, Ya’we Miqyaer-euq tsawrmyanr-anr jaceuq luf-ur.

³ Nanrma dovlar-awr nanrma ga’anr-ir ngae keuvni, Ya’we Miqyaer-euq tsawrmyanr-anr ya jaceuq taef-a.

⁴ Ya’we Miqyaer-aq, tsawrjeuq dawqtawv luf-euq khoertav gordzaeq-awr; Aqyawf-euq yawshaef khanqsaer-aq, Mq navmaqtser gor-eu mae.

⁵ Yawgor-anr jawr-eu, aqdui-euq Miqyaer pyeuf-eu, Ya’we Miqyaer-anr dur-eu aqsur ghaq jawr-eu la?

⁶ Aqyawf nuima nanqyuni taq-awr, Mq hawr-eu mirtsaq-euq khoertav jav-eu jeq-anr hawka lef-eu mae.

⁷ Aqyawf, irshaqzaq-anr khaqlaer tsanq-anr nae gheutur naeq-awr; Shaqzaq zanqzaq-anr laertsar tawvbymr taq-euq gar nae ciqtur naeq-eu mae.

⁸ Miqyaer, aqyawf-anr dzoeqda deuq naeq-aer binuir-euq mae. Aqyawf-euq tsawrhaq-euq dzoeqda deuq naeq-aer binuir-euq mae.

⁹ Aqyawf, maqbaw aqma-anr nymr bi javlar-awr; Zaq jawrle-awr laqkhaq bicaer-eu mae. Haleluya!