Jaceuq 112 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Guiqlanq Huiq-eu Tsawrshawr

¹ Haleluya! Ya’we Miqyaer-anr guv-awr, Aqyawf-euq zanrdawq khofdawq-anr laqkhaq yawkhav-aer caer-eu tsawrhaq-aq, Guiqlanq huiq-eu mae.

² Aqyawf-euq zaqdeuq uvdeuq, mirtsaq-euq khoertav ghaq khav-awr; Dawrcoeni daef-eu deuq-euq nanqzir-aq, guiqlanqhuiq taef-a.

³ Aqyawf-euq nymr-euq lafkhoer pyurshuir myawqganq javlar-awr smrmuiq smrbaw bawlar-awr; Aqyawf-euq tsaq-awr dawr-eu jeq mqmaq maqbyav yarzir zif taef-a.

⁴ Miqyaer-aq, guiqlanq yawdzanr hawr-eu, Ghawqshaq gaq-eu jeq byan-eu uqtaf, tsaq-awr dawr-eu mae. Aqyawf dawrcoeni daef-eu tsawrhaq-euq gharduq, Yawzanr-euq lafkhoer yawshaef bi byalar-eu mae.

⁵ Tsawrhaq yawmuiq-aq, guiqlanq janr-eu lafkhoer ngaqnaeq parnaeq-awr; Aqyawf kharmr kharshar-eu jeq dawr-awr tsaq-eu lafkhoer mr-eu mae.

⁶ Yawduq bawni tsaq-awr dawr-eu tsawrhaq-aq, Tiqjawr-iq nyinyi-aer maq ghaelarni zif-awr; Aqcawq, aqyawf-anr li-eu maqbawni noeqkeuv taef-a.

⁷ Aqyawf yawdoer jeq-euq garkawv deuq ja-eu gar yagaq ngae maqguv-a. Aqyawf-euq nuima zifdanni ghae-awr, Ya’we Miqyaer-anr ghoe-eu mae.

⁸ Aqyawf-euq nuima lavzif taq-awr guv-eu jeq tiqpawf-iq maqanr-aer; Aqyawf geufmawf-eu lof-aer, Aqyawf-anr muir-eu deuq-euq khoertav keuvle ngae keuvni zif-eu mae.

⁹ Aqyawf, ghawqmya’ni saeq-awr, irshaqzaq-anr bifkhawq naeq-euq mae. Aqyawf-euq uqcoer yabi ciqpoeq ciqgor-awr yabi taqhuiq taqmanr taef-a. Aqyawf-euq tsaq-awr dawr-eu jeq li-eu maqbawni zif taef-a.

¹⁰ Tsawrcawv deuq heu-anr ya’mawr ngae, nuima cawv-awr; Yawqha-euq seuq-anr yawqha teufteuf-aer guirbyovghae taef-a. Tsawrcawv geufmawf-eu jeq-aq, yabyov-ir taef-a.